ടാറ്റ വീണ്ടും പണി തന്നു; ടാറ്റ നെക്സോൺ, ടിയാഗോ, ടിഗോർ വാഹനങ്ങളുടെ വില വർധിപ്പിച്ചു

ഈ മാസം ആദ്യം ടാറ്റ മോട്ടോഴ്‌സ് പുറത്തിറക്കിയ പ്രസ്താവന അനുസരിച്ച് ഇൻപുട്ട് ചെലവുകളിലുണ്ടായ വർധനവാണ് വീണ്ടും വില വർധിപ്പിക്കാൻ കമ്പനിയെ പ്രേരിപ്പിച്ചത്. 2023 ജൂലൈയിൽ ടാറ്റ കാറുകളുടെ ശരാശരി വില വർധന 0.6 ശതമാനമാണ്. തിരഞ്ഞെടുത്ത വേരിയന്റുകൾക്കാണ് ടാറ്റ വില വർധിപ്പിച്ചിരിക്കുന്നത്. ജൂലൈ 16 വരെയുള്ള കാലയളവിൽ വാഹനം ബുക്ക് ചെയ്തവർക്കും ജൂലൈ 31ന് മുമ്പ് വാഹനം ഡെലിവറി എടുക്കുന്നവർക്കും വില വർധനവ് ബാധകമാകില്ല.

Read More: ഹ്യുണ്ടായ് കാറുകൾക്ക് ഒരു ലക്ഷം രൂപ വരെ കിഴിവ്; ഈ ഓഫർ ഇനി ദിവസങ്ങൾ കൂടി മാത്രം​

ഇന്ത്യൻ വിപണിയിൽ ഏറ്റവും കൂടുതൽ വിൽപ്പനയുള്ള സബ് 4 മീറ്റർ എസ്‌യുവിയാണ് ടാറ്റ നെക്‌സോൺ. ഈ വാഹനത്തിന് ശക്തമായ സുരക്ഷാ ഫീച്ചറുകളുണ്ട്. ഗ്ലോബൽ NCAP ക്രാഷ് ടെസ്റ്റുകളിൽ 5 സ്റ്റാർ റേറ്റിങ് നേടിയ വാഹനമാണ് ഇത്. ജൂലൈ 17 മുതൽ ടാറ്റ നെക്സോൺ എസ്‌യുവിക്ക് 20,000 രൂപ വരെയാണ് കമ്പനി വില വർധിപ്പിച്ചിരിക്കുന്നത്. ഈ വാഹനത്തിന്റെ ബേസ്-സ്പെക്ക് XE വേരിയന്റിന് 20,000 രൂപ വില കൂടിയിട്ടുണ്ട്. XMA+(S) ഡീസൽ വേരിയന്റിന് 5,000 രൂപയുടെ വിലവർധനവാണ് ലഭിച്ചിട്ടുള്ളത്.

ടാറ്റ നെക്സോൺ എസ്‌യുവിയുടെ മറ്റ് വേരിയന്റുകൾക്ക് 10,000 രൂപ വരെയാണ് വർധിച്ചിട്ടുള്ളത്. ചില വേരിയന്റുകൾക്ക് വില വർധിപ്പിച്ചിട്ടുമില്ല. ഈ വാഹനത്തിന്റെ വെയിറ്റിങ് പിരീഡ് നിലവിൽ ഏകദേശം 15 ആഴ്ച വരെയാണ്. നെക്സോൺ 1.2 ലിറ്റർ ടർബോ പെട്രോൾ എഞ്ചിൻ ഓപ്ഷനിലും 1.5 ലിറ്റർ ടർബോ ഡീസൽ എഞ്ചിനിലും ലഭ്യമാകും. പെട്രോൾ എഞ്ചിൻ 120 പിഎസ് പവറും 170 എൻഎം ടോർക്കുമാണ് ഉത്പാദിപ്പിക്കുന്നത്. ടാറ്റ നെക്സോൺ ഡീസൽ എഞ്ചിൻ 115 പിഎസ് പവറും 260 എൻഎം ടോർക്കും ഉത്പാദിപ്പിക്കുന്നു.

Read More: ഥാറും ബൊലേറോയും അടക്കമുള്ള മഹീന്ദ്ര വാഹനങ്ങൾക്ക് ഈ മാസം വമ്പിച്ച വിലക്കിഴിവുകൾ​

അഞ്ച് വേരിയന്റുകളിൽ ലഭ്യമാകുന്ന ടാറ്റ ടിയാഗോയ്ക്ക് പെട്രോൾ, സിഎൻജി പതിപ്പുകളുണ്ട്. ടാറ്റയുടെ ഏറ്റവും കൂടുതൽ വിറ്റഴിക്കപ്പെടുന്ന കാറാണ് ടിയാഗോ. ഈ വാഹനത്തിന്റെ മൊത്തം വിൽപ്പന അടുത്തിടെ 5 ലക്ഷം കടന്നിരുന്നു. ടിയാഗോ, ടിയാഗോ എൻആർജി വേരിയന്റുകളുടെ വില ജൂലൈ 17 മുതൽ വർധിച്ചിട്ടുണ്ട്. XE, XT (O), XT, XM, XZ പ്ലസ് എന്നിവയാണ് ടിയാഗോയുടെ വേരിയന്റുകൾ. XE, XT (O), XE സിഎൻജി എന്നിവയാണ് വില വർധിക്കാത്ത വേരിയന്റുകൾ

ടാറ്റ ടിയാഗോയുടെ ചില വേരിയന്റുകൾക്ക് 2,000 രൂപ മുതൽ 4,000 രൂപ വരെയാണ് വില വർധിപ്പിച്ചിരിക്കുന്നത്. ടിയാഗോ എൻആർജിക്കും കമ്പനി വില കൂട്ടിയിട്ടുണ്ട്. ഈ വാഹനം XT, XZ വേരിയന്റുകളിൽ ലഭ്യമാണ്. വില വർധനവോടെ ടിയാഗോ സീരീസിന്റെ വില ഇപ്പോൾ 5.60 ലക്ഷം രൂപ മുതലാണ് ആരംഭിക്കുന്നത്. ടിയാഗോ എൻആർജിയുടെ എക്സ് ഷോറൂം വില ഇപ്പോൾ 6.70 ലക്ഷം രൂപ മുതൽ ആരംഭിക്കുന്നു. നിലവിൽ 4 ആഴ്ചയാണ് ടിയാഗോയുടെ വെയിറ്റിങ് പിരീഡ്. 2023 ജൂലൈയിൽ ടാറ്റ ടിഗോറിന്റെ വില 5,000 രൂപ വരെയാണ് വർധിപ്പിച്ചിരിക്കുന്നത്.

Read More: ഹൈബ്രിഡ് എന്ന ആഗ്രഹത്തിന് വലിയ വില നൽകണം, മാരുതി സുസുക്കി ഗ്രാൻഡ് വിറ്റാരയ്ക്ക് വില കൂട്ടി​