തൃശൂർ ലോക്സഭാ തിരഞ്ഞെടുപ്പ് ഫലം (Thrissur Lok Sabha Election Result)

തൃശൂർ ലോക്സഭ തിരഞ്ഞെടുപ്പ് വിവരങ്ങൾ

കോൺഗ്രസും കമ്യൂണിസ്റ്റും മാറി മാറി ഭരിക്കുന്ന ലോക്സഭാ മണ്ഡലമാണ് തൃശൂർ. 1952 മുതൽ 2019 വരെയുള്ള ലോക്സഭാ തെരഞ്ഞെടുപ്പുകളിൽ ചിത്രം വ്യക്തമാണ്. നിലവിൽ കോൺഗ്രസിനൊപ്പമുള്ള തൃശൂർ ലോക്സഭാ മണ്ഡലം ഗുരുവായൂർ, മണലൂർ, ഒല്ലൂർ, തൃശൂർ, നാട്ടിക, ഇരിങ്ങാലക്കുട, പുതുക്കാട് എന്നീ നിയമസഭ മണ്ഡലങ്ങൾ ഉൾപ്പെടുന്നതാണ്. സംസ്ഥാനത്തെ പ്രധാനപ്പെട്ട മണ്ഡലങ്ങളിലൊന്നാണ് തൃശൂർ. തൃശൂർ ലോക്‌സഭാ മണ്ഡലത്തിന് കീഴിൽ വരുന്ന തൃശൂർ വാശിയേറിയ പോരാട്ടം നടക്കുന്ന നിയമസഭാ മണ്ഡലം കൂടിയാണ്. നഗരസഭയിലെ 1 മുതൽ 11 വരെ, 14 മുതൽ 22 വരെ, 32 മുതൽ 39 വരെ & 43 മുതൽ 50 വരെ എന്നീ വാർഡുകൾ ഉൾക്കൊള്ളുന്നതാണ് ഈ മണ്ഡലം. 2019 ലെ ലോക്സഭ തെരഞ്ഞെടുപ്പിൽ ബിജെപിക്ക് വേണ്ടി നടനായ സുരേഷ് ഗോപിയായിരുന്നു തൃശൂരിൽ മത്സരിച്ചത്. മണ്ഡലത്തിൽ ബിജെപിയുടെ വോട്ട് നില 2014 ലേതിനേക്കാൾ മൂന്നിരട്ടിയോളം വർധിപ്പിച്ച് ശ്രദ്ധേയമായ പോരാട്ടം അദ്ദേഹം കാഴ്ചവെച്ചു. 17.5 ശതമാനം വർധനവോടെ 2,93,822 വോട്ടായിരുന്നു മണ്ഡലത്തിൽ സുരേഷ് ഗോപിക്ക് ലഭിച്ചത്. 4,15,089 വോട്ടുകൾ നേടിയ ടിഎൻ പ്രതാപൻ വിജയിച്ചപ്പോൾ 3,21,456 വോട്ടുമായി എൽഡിഎഫിന് വേണ്ടി മത്സരിച്ച സിപിഐ സ്ഥാനാർഥി രാജാജി മാത്യൂ തോമസ് രണ്ടാമതെത്തി.

കേരളത്തിന്റെ സാംസ്‌കാരിക തലസ്ഥാനം എന്ന പേരിൽ പ്രസിദ്ധമായ ഒരു നഗരമാണ് തൃശൂർ. കേരളത്തിന്റെ മധ്യത്തിൽ സ്ഥിതിചെയ്യുന്ന ഈ നഗരം ജില്ലയുടെ ഭരണസിരാകേന്ദ്രം കൂടിയാണ്. തൃശൂർ നഗരം സമുദ്രനിരപ്പിൽനിന്ന് ഏകദേശം 2.83 മീ ഉയരത്തിൽ 10.52°N 76.21°Eലായാണ് സ്ഥിതിചെയ്യുന്നത്. തേക്കിൻകാട് മൈതാനം എന്നറിയപ്പെടുന്ന ഒരു ചെറിയ കുന്നിൻപ്രദേശത്തിനു ചുറ്റുമായാണ് തൃശ്ശൂർ നഗരം രൂപംകൊണ്ടിരിക്കുന്നത്. തൃശ്ശൂരിന്റെ ഭൂമിശാസ്ത്രത്തിലെ ഒരു പ്രധാന സവിശേഷതയാണ് കോൾ നിലങ്ങൾ. ഇവയെ കൂടാതെ നിരവധി ജലാശയങ്ങളും തോടുകളും കനാലുകളും തൃശൂർ നഗരത്തിലുണ്ട്.

നഗരത്തിന്റെ മധ്യഭാഗത്തായി ഒരു ചെറുകുന്നിൻപുറത്ത് ശ്രീവടക്കുംനാഥൻ ക്ഷേത്രം സ്ഥിതി ചെയ്യുന്നു. തൃശൂർ ജില്ലക്ക് ആകെ 7 താലൂക്കുകളാണ് (തൃശ്ശൂർ, മുകുന്ദപുരം, ചാവക്കാട്, കൊടുങ്ങല്ലൂർ, തലപ്പിള്ളി, ചാലക്കുടി, കുന്നംകുളം) ഉള്ളത്. ഇരിങ്ങാലക്കുട, ചാവക്കാട്, കൊടുങ്ങല്ലൂർ, ചാലക്കുടി, കുന്നംകുളം, ഗുരുവായൂർ, വടക്കാഞ്ചേരി എന്നിവയാണ് നഗരസഭകൾ. ജില്ലയിൽ 17 ബ്ലോക്ക് പഞ്ചായത്തുകളും 87 ഗ്രാമപഞ്ചായത്തുകളുമുണ്ട്. തൃശൂർ പൂരം, വെടിക്കെട്ട്, പുലിക്കളി എന്നിവ വളരെ പ്രശസ്തമാണ്.

തൃശ്ശൂർ നഗരം കോർപ്പറേഷൻ ഭരണത്തിലാണ്. കോർപ്പറേഷൻ ഭരണാധികാരി മേയർ ആണ്. ജില്ലാപഞ്ചായത്ത് പ്രസിഡന്റ് ആണ് കോർപ്പറേഷൻ, മുനിസിപ്പാലിറ്റി മേഖലകൾ ഒഴികെയുള്ള മറ്റ് പ്രദേശങ്ങളുടെ ഭരണം നടത്തുന്നത്. ജില്ലാപഞ്ചായത്തിന് കീഴിൽ ബ്ലോക്ക് പഞ്ചായത്തുകളും മറ്റ് എല്ലാ പഞ്ചായത്തുകളും ഉൾപ്പെടുന്നു. തൃശൂർ ജില്ലക്ക് ആകെ ഏഴ് താലൂക്കുകളാണ് (തൃശൂർ, മുകുന്ദപുരം, ചാവക്കാട്, കൊടുങ്ങല്ലൂർ, തലപ്പിള്ളി, ചാലക്കുടി,കുന്നംകുളം) ഉള്ളത്. ഇരിങ്ങാലക്കുട, ചാവക്കാട്, കൊടുങ്ങല്ലൂർ, ചാലക്കുടി, കുന്നംകുളം, ഗുരുവായൂർ, വടക്കാഞ്ചേരി എന്നിവയാണ് മുൻസിപ്പാലിറ്റികൾ. ജില്ലയിൽ 17 ബ്ലോക്ക് പഞ്ചായത്തുകളും 87 ഗ്രാമപഞ്ചായത്തുകളും ഉണ്ട്. താലൂക്ക് അടിസ്ഥാനപ്പെടുത്തിയും പട്ടണങ്ങളുടെ പ്രാധാന്യം അനുസരിച്ചും ഭരണ സംവിധാനം തരപ്പെടുത്തിരിയിരിക്കുന്നു.

വരാനിരിക്കുന്ന ലോക്‌സഭാ തെരഞ്ഞെടുപ്പിൽ ബിജെപി നോട്ടമിട്ട് വെച്ചിരിക്കുന്ന മണ്ഡലങ്ങളിലൊന്നാണ് തൃശൂർ. 2019 ലെ ലോക്‌സഭാ തെരഞ്ഞെടുപ്പിൽ സിപിഐയുടെ രാജാജി മാത്യു തോമസിനെ 93,633 വോട്ടുകൾക്ക് പരാജയപ്പെടുത്തിയാണ് കോൺഗ്രസിന്റെ ടിഎൻ പ്രതാപൻ പാർലമെന്റിലേക്ക് പ്രവേശിച്ചത്. സിപിഐയ്ക്ക് ഉണ്ടായിരുന്ന ഏക ലോക്‌സഭാ സീറ്റാണ് കോൺഗ്രസ് നേടിയത്. ടിഎൻ പ്രതാപൻ 4,15,089 വോട്ടും രാജാജി മാത്യു തോമസ് 3,21,456 വോട്ടുമാണ് നേടിയത്. ബിജെപി ഇറക്കിയ സുരേഷ് ഗോപി പിടിച്ചത് 2,93,822 വോട്ടുകളാണ്. സിറ്റിങ് എംപി സിഎൻ ജയദേവന് പകരമാണ് അന്ന് രാജാജി മാത്യു തോമസിനെ എൽഡിഎഫ് ഇറക്കിയത്. രാജാജി മാത്യു തോമസിനും സുരേഷ് ഗോപിക്കും ഇടയിലെ വോട്ട് വ്യത്യാസം വെറും 27,634 ആയിരുന്നു. രാജാജിക്ക് ലഭിച്ചത് 321,456 വോട്ടും സുരേഷ് ഗോപിക്ക് 293,822 വോട്ടുമാണ്. ഒട്ടേറെ പൂരങ്ങളും ഉത്സവങ്ങളും നടക്കുന്ന മണ്ഡലമായതിനാൽ മറ്റ് വിഷയങ്ങൾക്കൊപ്പം ശബരിമലയായിരുന്നു മുഖ്യചർച്ചയായത്.

തൃശൂരിന്റെ മണ്ണിൽ എൽഡിഎഫിന്റെ പി ബാലചന്ദ്രനാണ് 2021 ലെ അസംബ്ലി തെരഞ്ഞെടുപ്പിൽ വിജയക്കൊടി പാറിച്ചത്. ലീഡ് നില പല തവണ മാറിമറിഞ്ഞ് ഒടുവിൽ വിജയം പി ബാലചന്ദ്രനൊപ്പം നിൽക്കുകയായിരുന്നു. 1115 വോട്ടുകൾക്കാണ് പി ബാലചന്ദ്രൻ വിജയിച്ചത്. യുഡിഎഫ് സ്ഥാനാർഥി പത്മജാ വേണുഗോപാൽ രണ്ടാമതും എൻഡിഎ സ്ഥാനാർഥി സുരേഷ് ഗോപിയും മൂന്നാം സ്ഥാനത്തുമായി. പല സമയത്തും സുരേഷ് ഗോപി ഒന്നാം സ്ഥാനത്ത് എത്തിയെങ്കിലും അവസാനം ബാലചന്ദ്രനൊപ്പം ആയിരുന്നു അന്ന് വിജയം. മന്ത്രി വിഎസ് സുനിൽ കുമാറിന്റെ സിറ്റിങ് സീറ്റായിരുന്നു തൃശൂർ. 2016 ലെ തെരഞ്ഞെടുപ്പിൽ 53,664 വോട്ടുകളാണ് വിഎസ് സുനിൽ കുമാറിന് ലഭിച്ചത്. കോൺഗ്രസ് സ്ഥാനാർത്ഥിയായ പദ്മജ വേണുഗോപാലാണ് രണ്ടാമതെത്തിയത്. 46,677 വോട്ടുകളാണ് അവർക്ക് ലഭിച്ചത്. 24,748 വോട്ടുകൾ നേടി ബിജെപി സ്ഥാനാർത്ഥിയായ ബി ഗോപാലകൃഷ്ണൻ മൂന്നാമതെത്തി.

കേരളത്തിൽ ഏറ്റവുമധികം ചർച്ച ചെയ്യപ്പെടുന്ന മണ്ഡലമായ തൃശൂരിൽ സുരേഷ് ഗോപിയെതന്നെ സ്ഥാനാർഥിയാക്കുമെന്നാണ് ബിജെപി സംസ്ഥാന അധ്യക്ഷൻ കെ സുരേന്ദ്രൻ പറയുന്നത്. കഴിഞ്ഞ തെരഞ്ഞെടുപ്പിന് ശേഷം തൃശൂർ കേന്ദ്രീകരിച്ച് സജീവമായി പ്രവർത്തിക്കുന്ന സുരേഷ് ഗോപിക്ക് ജനങ്ങളുമായുള്ള ഇടപെടൽ മൂലം ജനപ്രീതി വർധിച്ചതായാണ് ബിജെപി നേതൃത്വത്തിന്റെ വിലയിരുത്തൽ. അഞ്ച് വർഷത്തേക്ക് തൃശൂർ മാത്രം തന്നാൽ പോര കേരളം കൂടി തരണമെന്നാണ് നടൻ കൂടിയായ സുരേഷ് ഗോപി പറയുന്നത്. 2024 ൽ താൻ തന്നെ സ്ഥാനാർഥിയാകുമെന്ന് ഉറപ്പിച്ച സുരേഷ് ഗോപിയ്ക്ക് എതിരാളികളായി ടിഎൻ പ്രതാപനും വിഎസ് സുനിൽ കുമാറുമാകും ഉണ്ടാകുക.

ജനുവരി രണ്ടിന് നരേന്ദ്രമോദി പങ്കെടുക്കുന്ന ചടങ്ങ് സുരേഷ് ഗോപിയുടെ തെരഞ്ഞെടുപ്പ് പ്രചാരണത്തിന്റെ ആക്കം കൂട്ടുമെന്നുറപ്പ്. തൃശൂരിൽ സുരേഷ് ഗോപിയേക്കാൾ എന്തുകൊണ്ടും സ്വാധീനമുള്ള രണ്ടുപേരാണ് പ്രതാപനും സുനിലും. ഓരോ വർഷവും കുടമാറ്റങ്ങൾക്ക് സാക്ഷ്യം വഹിക്കുന്ന നഗരത്തിൽ താമരക്കുട വിരിയുമോയെന്ന് കണ്ടറിയാം...

മാവേലിക്കര മണ്ഡലം | മലപ്പുറം മണ്ഡലം | പത്തനംതിട്ട മണ്ഡലം | കൊല്ലം മണ്ഡലം | വടകര മണ്ഡലം | ഇടുക്കി മണ്ഡലം | തിരുവനന്തപുരം മണ്ഡലം | ആലത്തൂർ മണ്ഡലം | തൃശൂർ മണ്ഡലം | ആലപ്പുഴ മണ്ഡലം | കോട്ടയം മണ്ഡലം | ആറ്റിങ്ങൽ മണ്ഡലം | കണ്ണൂർ മണ്ഡലം | വയനാട് മണ്ഡലം | കാസർകോട് മണ്ഡലം | എറണാകുളം മണ്ഡലം | ചാലക്കുടി മണ്ഡലം | പാലക്കാട് മണ്ഡലം | പൊന്നാനി മണ്ഡലം | കോഴിക്കോട് മണ്ഡലം