ഗൂഗിള് മാപ്പ് നോക്കിയെത്തിയത് മരുഭൂമിയില്
Photo Credit: twitter
ജിപിഎസ് സഹായത്തോടെ യാത്രതിരിച്ച ഷലോയിം സിയോണ്സെയാവട്ടെ വഴി തെറ്റിയെത്തിയത് മരുഭൂമിയില്. ഫോര് ഡ്രൈവ് വാഹനങ്ങള്ക്ക് മാത്രം സഞ്ചരിക്കാന് കഴിയുന്ന സ്ഥലത്ത് തന്റെ ചെറിയ കാറില് യാത്ര തുടരാനാവാതെ മരുഭൂമിയില് തനിച്ചാവുകയായിരുന്നു ഇദ്ദേഹം. എന്തു ചെയ്യണമെന്നറിയാതെ കനത്ത വെയിലില് വാഹനത്തിനകത്ത് ഏറെ നേരം കാത്തിരുന്നെങ്കിലും ആരും അതുവഴി വന്നില്ല.
സഹായത്തിനെത്തിയത് പ്രദേശവാസി
Photo Credit: youtube
അതുവഴി പോവുകയായിരുന്ന പ്രദേശവാസിയായ യുഎഇ സ്വദേശി അലി അല് കുത്ബിയാണ് മുഭൂമിയില് കുടുങ്ങിയ വിദേശിയെ കാണുകയും അദ്ദേഹത്തെ രക്ഷപ്പെടുത്തുകയും ചെയ്തത്. മജ്ലിസില് കൊണ്ടു പോയി സല്ക്കരിച്ച യുട്യൂബറെ തന്റെ വാഹനത്തില് സുഹൃത്തുക്കള്ക്കൊപ്പം അല് മദാമില് അദ്ദേഹത്തെ കൊണ്ടു പോവുകയും ചെയ്തു. തന്നെ സഹായിച്ച ഇമാറാത്തിയോടുള്ള ഇഷ്ടവും നന്ദിയും യുട്യൂബര് തന്നെയാണ് വീഡിയോയിലൂടെ ലോകത്തെ അറിയിച്ചത്. മജ്ലിസില് വെച്ച് അറബി ചായയും പലഹാരങ്ങളും ഊദ് അത്തറും നല്കി സ്വീകരിച്ചതും സ്വന്തം ഫോര് ഡ്രൈവ് വാഹനത്തില് അല് മദാമില് കൊണ്ടു പോയതും അവിടത്തെ മനോഹരമായ കാഴ്ചകളുമൊക്കെ ഷലോയിം തന്റെ വീഡിയോയില് ചിത്രീകരിച്ചിരുന്നു. ഇസ്രായേലും യുഎഇയും തമ്മില് കഴിഞ്ഞ മാസം ഒപ്പുവച്ച സമാധാന കരാറിന്റെ പശ്ചാത്തലത്തില് ഈ വീഡിയോ ഉടന് തന്നെ വൈറലാവുകയായിരുന്നു.
വെെറലായി യുട്യൂബറുടെ വീഡിയോ
Photo Credit: youtube
വീഡിയോ ശ്രദ്ധയില്പ്പെട്ട യുഎഇ ഉപപ്രധാനമന്ത്രിയും ആഭ്യന്തര മന്ത്രിയുമായ ലഫ്റ്റനന്റ് ജനറല് ശെയ്ഖ് സെയ്ഫ് ബിന് സായിദ് അല് നഹ്യാന്, യുഎഇ പൗരന്റെയും സുഹൃത്തുക്കളുടെയും ആതിഥ്യമര്യാദയെ പുകഴ്ത്തിക്കൊണ്ട് ട്വീറ്റ് ചെയ്തതോടെ സംഭവം വലിയ വാര്ത്താ പ്രാധാന്യം നേടുകയും ചെയ്തു.
ഇസ്രായേല് സ്വദേശിയാണെങ്കിലും യുഎസ് പാസ്പോര്ട്ടുള്ള ഷലോയിം, ലോകത്തിന്റെ വിവിധ ഭാഗങ്ങളില് സഞ്ചരിച്ച് അവിടങ്ങളിലെ കാഴ്ചകള് വീഡിയോയിലൂടെ പുറം ലോകത്തെത്തിക്കുന്ന യുട്യൂബറാണ്. അല്മദാമിലെ കാഴ്ചകളാണ് ജനങ്ങളുമായി പങ്കുവയ്ക്കാന് ആഗ്രഹിച്ചതെങ്കിലും അവിടേക്കുള്ള യാത്ര തന്നെ അതിനെക്കാള് മനോഹരമായ അനുഭവമാണ് തനിക്ക് സമ്മാനിച്ചതെന്നും അദ്ദേഹം പറഞ്ഞു.
ഇനിയും കാണാമെന്ന പ്രതീക്ഷയില്
Photo Credit: youtube
മണിക്കൂറുകളോളം ഒന്നിച്ച് ചെലവഴിച്ച ശേഷം അല് കുത്ബിക്ക് നന്ദി പറഞ്ഞ് പരസ്പരം മെബൈല് നമ്പര് കൈമാറിയാണ് ഇരുവരും പിരിഞ്ഞത്. യുഎഇ സംസ്ക്കാരവും ആതിഥ്യമര്യാദയും പ്രകൃതിയും കാഴ്ചകളുമെല്ലാം ഷലോയിമിന് ഏറെ ഇഷ്ടമായതായി അല് കുത്ബി പറഞ്ഞു. ഇനി യുഎഇയിലേക്കു വരുമ്പോള് തന്റെ വീട്ടിലേക്ക് വരാതിരിക്കരുതെന്ന് പറഞ്ഞാണ് 30കാരനായ അല് കുത്ബി തന്റെ പുതിയ സുഹൃത്തിനെ യാത്രയാക്കിയത്