മകളെ കൊന്ന് മലയാളി ദമ്പതികൾ ജീവനൊടുക്കിയ നിലയിൽ, സംഭവം കർണാടകത്തിലെ റിസോർട്ടിൽ

മടിക്കേരി: കർണാടകത്തിലെ മടിക്കേരിയിൽ മകളെ കൊലപ്പെടുത്തിയ ശേഷം മലയാളി ദമ്പതികൾ ആത്മഹത്യ ചെയ്ത നിലയിൽ. കൊല്ലം സ്വദേശി വിനോദ് ബാബുസേനൻ (43), ഭാര്യ ജിബി അബ്രഹാം (38), ഇവരുടെ മകൾ ജെയിൻ മരിയ ജേക്കബ് (11) എന്നിവരെയാണ് സ്വകാര്യ റിസോർട്ടിലെ കോട്ടേജിൽ മരിച്ച നിലയിൽ കണ്ടെത്തിയത്. ആത്മഹത്യാക്കുറിപ്പ് പോലീസ് കണ്ടെടുത്തു. സാമ്പത്തിക പ്രശ്നങ്ങളാണ് ആത്മഹത്യയിലേക്ക് നയിച്ചതെന്നാണ് പോലീസ് പറയുന്നതെന്ന് ടൈംസ് ഓഫ് ഇന്ത്യ റിപ്പോർട്ട് ചെയ്തു. ശനിയാഴ്ച രാവിലെയാണ് ദമ്പതികളെ തൂങ്ങിമരിച്ച നിലയിലും കുട്ടിയെ മരിച്ച നിലയിലും കണ്ടെത്തിയത്. എസ്‍യുവി കാറിലെത്തിയ കുടുംബം വെള്ളിയാഴ്ച വൈകുന്നേരം ആറുമണിയോടെയാണ് റിസോർട്ടിലെ കോട്ടേജ് എടുത്തത്. വിശ്രമത്തിനുശേഷം ഇവർ റിസോർട്ടിനു പുറത്തുകൂടി നടന്നിരുന്നു. ഈ സമയം മൂവരിലും അസ്വാഭാവികത തോന്നിയിരുന്നില്ലെന്ന് റിസോർട്ട് മാനേജർ ആനന്ദ് പറഞ്ഞതായി പോലീസ് പറഞ്ഞു.


വൈകുന്നേരം റിസോർട്ടിനു സമീപത്തെ കടയിലേക്ക് പോയ ശേഷമാണ് മൂവരും അത്താഴത്തിന് എത്തിയത്. ശനിയാഴ്ച 10 മണിയോടെ മടങ്ങുമെന്നും ഇവർ അറിയിച്ചിരുന്നു. 10 മണി കഴിഞ്ഞിട്ടും ഇവരെ കാണാതായതോടെ ജീവനക്കാർ വാതിലിൽ തട്ടിവിളിച്ചെങ്കിലും അനക്കമുണ്ടായില്ല. 11 മണിയോടെ ജനൽ തുറന്ന് നടത്തിയ പരിശോധനയിൽ ദമ്പതികളെ തൂങ്ങിമരിച്ച നിലയിൽ കണ്ടെത്തുകയായിരുന്നുവെന്ന് പോലീസ് വ്യക്തമാക്കി.



മൃതദേഹം പോസ്റ്റുമോർട്ടത്തിനായി ആശുപത്രിയിലേക്ക് മാറ്റി. ബന്ധുക്കളെ വിവരമറിയിച്ചിട്ടുണ്ട്. കൊല്ലത്ത് ബിസിനസ് നടത്തുകയായിരുന്നു ദമ്പതികൾ. സംഭവത്തിൽ മടിക്കേരി റൂറൽ പോലീസ് കേസെടുത്ത് അന്വേഷണം ആരംഭിച്ചു.

ആത്മഹത്യ ഒന്നിനും പരിഹാരമല്ല
നിങ്ങള്‍ ഒറ്റയ്ക്കല്ല. സഹായം തേടാം ഉടനെ. ദയവായി വിളിക്കൂ;
ദിശ ഹെല്‍പ്പ്‍ലൈന്‍ - 1056 (ടോള്‍ ഫ്രീ)

Read Latest National News and Malayalam News