മഹിജയെ കാണാൻ ആ മകനെത്തിയത് തനിയെ; ജിഷ്ണുവും ഇതുപോലെ ആയിരുന്നെന്ന് മഹിജ

തിരുവനന്തപുരം: ജിഷ്ണു പ്രണോയിയുടെ അമ്മ മഹിജയെ കാണാന്‍ ആ ഏഴാം ക്ലാസുകാരന്‍ എത്തിയത് തനിയെ. മകന്‍ നഷ്ടപ്പെട്ട അമ്മമനസിനെ കാണാനെത്തിയ അലന്‍റെ മുഖത്ത് തന്‍റെ മാതാപിതാക്കള്‍ ജയിലഴിക്കുള്ളിലായതിെന്‍റ ഒറ്റപ്പെടലൊന്നും കാണാനില്ല. മറിച്ച് നിശ്ചയദാര്‍ഢ്യം മാത്രമായിരുന്നു ആ മുഖത്ത് പ്രതിഫലിച്ചത്. മരിച്ച ജിഷ്ണുവിന് നീതി തേടി ജിഷ്ണുവിന്‍റെ കുടുംബം നടത്തുന്ന സമരത്തിനു പിന്തുണ നല്‍കിയതിന് തടവറയിലായ എസ്.യു.സി.ഐ നേതാവ് എം. ഷാജര്‍ഖാന്‍റെയും മിനിയുടെയും ഏക മകനാണ് അലന്‍.

മാതാപിതാക്കള്‍ ജയിലിലായതോടെ പാര്‍ട്ടിപ്രവര്‍ത്തകര്‍ക്കൊപ്പമാണ് അലനിപ്പോൾ കഴിയുന്നത്. ശനിയാഴ്ച ഉച്ചക്ക് രണ്ട് മണിയോടെയാണ് അലന്‍ മെഡിക്കല്‍ കോളജിലെ 14ാം വാര്‍ഡില്‍ നിരാഹാരമനുഷ്ഠിക്കുന്ന മഹിജയെ കാണാനെത്തിത്. കണ്ടപാടെ മഹിജ അലനെ കെട്ടിപ്പിടിച്ച് ചുംബിച്ച് അടുത്തിരുത്തി. വിഷമിക്കേണ്ടെന്നും ഞങ്ങെളല്ലാം ഒപ്പമുണ്ടെന്നും ചേർത്തു നിർത്തി പറഞ്ഞ് ആശ്വസിപ്പിച്ചു.

‘ചെറുപ്പത്തില്‍ ജിഷ്ണുവിനെ കാണാനും മോനെപ്പോലെയായിരുന്നെന്നും നിറകണ്ണുകളോടെ മഹിജ പറഞ്ഞു. അതേ മുടിയും മുഖവുമാണ് അലനെന്നും മഹിജ പറഞ്ഞു.ജിഷ്ണുവിന്‍റെ സഹോദരി അവിഷ്ണക്കും കുടുംബത്തിനും നീതിയാവശ്യപ്പെട്ടും കള്ളക്കേസില്‍ കുടുക്കി എസ്.യു.സിഐ നേതാക്കളായ ഷാജര്‍ഖാനെയും മിനിയെയും ജയിലിലടച്ച പൊലീസ് നടപടിയില്‍ പ്രതിഷേധിച്ചും എഐ.ഡി.എസ്.ഒ സെക്രേട്ടറിയറ്റിന് മുന്നില്‍ നടത്തുന്ന സമരത്തിനിടയില്‍ നിന്നാണ് അലന്‍ ആശുപത്രിയിലെത്തിയത്. മഹിജ ഇപ്പോൾ തീവ്യപരിചരണവിഭാഗത്തില്‍ കഴിയുകയാണ്.

Alen Visited Mahija in the Hospital

Alen, Son of m shajarkhan and Mini, who arrested for Justice for jishnu protest, visited Jishnu Pranoy's mother Mahija