കൃത്യ സമയത്ത് ഭക്ഷണം കഴിച്ചില്ലെങ്കിൽ എന്ത് സംഭവിക്കും?

ശാരീരിക പ്രവർത്തനങ്ങൾ കൃത്യമായി നടക്കുന്നതിനായി ശരീരത്തിന് ഭക്ഷണത്തിന്റെ രൂപത്തിൽ നിരന്തരമായ ഇന്ധനം ആവശ്യമാണ്. ഇതിന്റെ വിതരണം ശരിയായ പാറ്റേണിൽ ആണെങ്കിൽ അത് ശരീരത്തിന് ഗുണം ചെയ്യുന്നതായി മാറും. മറിച്ച് ഇതേ പാറ്റേണിൽ വീഴ്ചകൾ വരുമ്പോൾ ശരീരം അസ്വാഭാവികതകൾ പുറത്തു കാട്ടാൻ തുടങ്ങും. ശരീരഭാര വർദ്ധനവ്, അനാരോഗ്യതകൾ തുടങ്ങിയ പ്രശ്നങ്ങൾ ഇതിനു പുറകേ വന്നു തുടങ്ങുകയും ചെയ്യും. കൃത്യമായ ഇടവേളകൾ നിശ്ചയിച്ച ഭക്ഷണം കഴിക്കേണ്ടത് എന്തുകൊണ്ടാണെന്ന് അറിയാമോ?

പ്രത്യേകിച്ചും കുട്ടികളിലും മറ്റും വളർച്ചയുടെ പ്രായത്തിൽ കൃത്യമായ ഇടവേളകളിൽ ഉള്ള ഭക്ഷണശീലം ശാരീരിക വളർച്ചയ്ക്ക് അത്ഭുതകരമായ ഗുണങ്ങൾ നൽകുന്നുണ്ടെന്ന് നിരവധി പഠനങ്ങൾ തെളിയിച്ചിട്ടുണ്ട്. ശരിയായ ഭക്ഷണക്രമം എല്ലാ വ്യക്തികളിലും ശാരീരിക ഊർജ്ജസ്വലതയുടെയും ദീർഘായുസ്സിന്റെയും കാര്യത്തിൽ സ്വാധീനം ചെലുത്തുന്നുണ്ട് എന്ന് പഠനങ്ങൾ പറയുന്നു. സമയക്രമം ഇല്ലാത്ത ഭക്ഷണശീലം ഒരാളുടെ ഗ്ലൂക്കോസിൽ നിലയിൽ മോശം ഏറ്റക്കുറച്ചിലുകൾക്ക് കാരണമാകുമെന്ന് ചൂണ്ടികാണിക്കപ്പെടുന്നുണ്ട്.

സർക്കാഡിയൻ റിഥം എന്നത് ഒരു വ്യക്തിയുടെ ഉറക്ക-ഉണർവ് ചക്രത്തെ നിയന്ത്രിക്കുന്നതാണ്. ഇത് ഓരോ 24 മണിക്കൂറിലും ആവർത്തിക്കപ്പെടുന്നു. ഓരോ വ്യക്തിയുടെയും സർക്കാഡിയൻ ക്ലോക്ക് വ്യത്യസ്തമായിരിക്കും. ഒരു വ്യക്തിയുടെ ഉറക്കത്തിന്റെയും ഉണർവിന്റെയും പാറ്റേൺ ശരീരത്തിലെ ആന്തരിക പ്രക്രിയകൾ എങ്ങനെ പ്രവർത്തിക്കണമെന്ന് നിർണ്ണയിക്കുന്നു. അതിനാൽ ഒരാൾ അവരുടെ സർക്കാഡിയൻ സൈക്കിൾ അനുസരിച്ച് ആകണം ഭക്ഷണ സമയം ക്രമീകരിക്കാനും ഒരു ഭക്ഷ്യ ടൈംടേബിൾ ഉണ്ടാക്കുകയും ചെയ്യേണ്ടത്.

ഒരാളുടെ സർക്കാഡിയൻ റിഥം പറയുന്നതനുസരിച്ച് ഉറക്കമുണർന്ന ശേഷം എപ്പോഴാണ് രാവിലത്തെ പ്രഭാതഭക്ഷണം കഴിക്കേണ്ടത് എന്ന കാര്യം അറിയാമോ. ഇത് കണക്കുകൂട്ടാനായി മുൻപത്തെ അത്താഴവും ഇപ്പോഴത്തെ പ്രഭാതഭക്ഷണവും തമ്മിലുള്ള ഇടവേള സമയം കണ്ടെത്തണം. ഇത് 12 മണിക്കൂർ ആയിരിക്കണം എന്ന് ഉറപ്പാക്കണം. ഉദാഹരണത്തിന് തലേ ദിവസം രാത്രി 8 മണിക്ക് ആണ് അത്താഴം കഴിച്ചത് എങ്കിൽ അടുത്ത ദിവസം രാവിലെ 8 മണിക്ക് ആയിരിക്കണം പ്രഭാത ഭക്ഷണം കഴിക്കേണ്ടത്. നിങ്ങൾ രാവിലെ നേരത്തെ തന്നെ എഴുന്നേൽക്കുകയാണെങ്കിൽ പോലും തലേദിവസത്തെ രാത്രിയിലെ അത്താഴം കഴിഞ്ഞതിന് 12 മണിക്കൂർ പൂർത്തിയാക്കിയതിന് ശേഷം മാത്രമേ പ്രഭാതഭക്ഷണം കഴിക്കാവൂ. കഴിയുന്നതും നേരത്തെ തന്നെ ഉറങ്ങാനും നേരത്തെ എഴുന്നേൽക്കാനും ശ്രമിക്കുക. ഇത് ഈയൊരു പ്രവർത്തി കൂടുതൽ എളുപ്പം ആക്കി മാറ്റുക മാത്രമല്ല ഒരു വ്യക്തിയെ ആരോഗ്യവാനാക്കുകയും ചെയ്യും. ദിവസത്തിലെ ആദ്യ ഭക്ഷണമായ പ്രഭാതഭക്ഷണം പോഷക സമൃദ്ധമായിരിക്കുകയും വേണം.

നമ്മൾ കഴിക്കുന്ന ഭക്ഷണം ദഹിപ്പിക്കാൻ നമ്മുടെ ദഹനവ്യവസ്ഥയ്ക്ക് കുറഞ്ഞത് ഏകദേശം 4 മണിക്കൂർ എങ്കിലും വേണ്ടിവരും. അതുകൊണ്ടുതന്നെ പ്രഭാതഭക്ഷണം കഴിച്ചു കഴിഞ്ഞ് ഏറ്റവും കുറഞ്ഞത് 4 മണിക്കൂർ കഴിഞ്ഞ ശേഷം ഉച്ചഭക്ഷണം കഴിക്കുന്നതാണ് നല്ലത്. അതുപോലെ തന്നെ പ്രഭാതഭക്ഷണത്തിനും ഉച്ചഭക്ഷണത്തിനും ഇടയിലുള്ള ദൈർഘ്യം ഒരു പരിധിയിലധികം വർദ്ധിപ്പിക്കാതിരിക്കാനും ശ്രദ്ധിക്കണം. ഇത് ദഹന വ്യവസ്ഥിതിയിൽ അസ്വാഭാവികതകൾ സൃഷ്ടിച്ചുകൊണ്ട് അസിഡിറ്റി പോലുള്ള പ്രശ്നങ്ങൾക്ക് കാരണമാകും.

അത്താഴവും ഉച്ചഭക്ഷണവും തമ്മിലുള്ള ഇടവേള ഏറ്റവും കുറഞ്ഞത് 4 മണിക്കൂർ ആയിരിക്കണം. 4 - 6 മണിക്കൂറിൽ കൂടുതൽ ഇത് നീട്ടിവെക്കരുത്. കാരണം ഇത് അടുത്ത ദിവസത്തെ പ്രഭാതഭക്ഷണ സമയത്തെ ബാധിക്കും. സാധാരണയായി എല്ലാ ആരോഗ്യ വിദഗ്ധരും ശുപാർശ ചെയ്യുന്നത് അത്താഴം ലളിതവും ലഘുവും ആക്കി മാറ്റാനാണ്. എല്ലാവരിലും പ്രത്യേകിച്ചും ശരീരഭാരം കുറയ്ക്കാൻ ലക്ഷ്യമിടുന്നവർക്ക് ഇത് കൂടുതൽ പ്രയോജനകരമാണ്.

Also read: മത്തിയും അലുവായും അല്ല, മത്തിക്കറി കൂട്ടണം...

എല്ലാ മനുഷ്യ ശരീരത്തിനും ഒരുപോലെ മുകളിൽ സൂചിപ്പിച്ച സമയ ഇടവേളകളുമായി പൊരുത്തപ്പെടാൻ കഴിഞ്ഞെന്നുവരില്ല. അത്തരം ഘട്ടങ്ങളിൽ ആണ് ലഘുഭക്ഷണങ്ങളുടെ പ്രാധാന്യം തിരിച്ചറിയേണ്ടത്. ഇടയ്ക്കിടെ വീണ്ടും വിശപ്പ് അനുഭവപ്പെടുമ്പോൾ കഠിനമായ രീതിയിൽ ഭക്ഷണം കഴിക്കുന്നത് ഒഴിവാക്കാനായി ലഘുഭക്ഷണങ്ങൾ തിരഞ്ഞെടുക്കുക. പ്രത്യേകിച്ചും അമിതഭാരമുള്ള ആളുകളിൽ ശരീരഭാരം കുറയ്ക്കുന്നതിനുള്ള മാർഗമായി ഇത് പ്രവർത്തിക്കും. അത്തരം സന്ദർഭങ്ങളിൽ, ആരോഗ്യകരമായ ലഘുഭക്ഷണങ്ങൾ കഴിക്കാം. തടി കുറയ്ക്കാൻ ആഗ്രഹിക്കുന്നവർക്ക് നട്ട്സും പഴങ്ങളും ആരോഗ്യകരമായ ലഘുഭക്ഷണമായി കണക്കാക്കപ്പെടുന്നു. ശരീരഭാരം നിയന്ത്രിച്ചു നിർത്തുക എന്നത് ആരോഗ്യകരമായ ജീവിത ശൈലി പിന്തുടരുന്നതിൻറെ ഭാഗമാണ്. ഇതിനായി നാം കഴിക്കുന്ന ഭക്ഷണത്തിന്റെ ഗുണനിലവാരത്തിലും അളവിലും സമയത്തിലും പ്രത്യേകം ശ്രദ്ധ നൽകേണ്ടതുണ്ട്