വസൂരിമാല തെയ്യം കെട്ടി അച്ഛനും മക്കളും

ആധിയും വ്യാധിയും പടരുന്ന കാലത്ത് വസൂരിമാലയായി അനുഗ്രഹം നല്‍കി അച്ഛനും മക്കളും. കതിരൂരിലെ എം.വി. ജിതേഷ് പണിക്കരും മക്കളുമാണ് ചുണ്ടങ്ങാപ്പൊയില്‍ കടമ്പില്‍ കുട്ടിശാസ്തപ്പന്‍ ക്ഷേത്രത്തില്‍ ഉത്സവത്തിന് വസൂരിമാല തെയ്യം കെട്ടി ഭക്തരെ അനുഗ്രഹിച്ചത്. കതിരൂരിലെ എം.വി. ജിതേഷ് പണിക്കരും മക്കളായ അഭിജിത്തും ധ്രുവജിത്തുമാണ് വസൂരിമാല തെയ്യം കെട്ടിയത്.അഭിജിത്തും ധ്രുവജിത്തും നേരത്ത വിഷ്ണുമൂര്‍ത്തി തെയ്യം കെട്ടി യിരുന്നു. അഭിജിത്ത് പ്ലസ് ടു വിദ്യാര്‍ഥിയും ധ്രുവജിത്ത് പത്താം ക്ലാസ് വിദ്യാര്‍ഥിയുമാണ്. ക്ഷേത്രത്തില്‍ വസൂരിമാലയുടെ രണ്ട് നേര്‍ച്ച തെയ്യം കൂടി വന്നതോടെയാണ് മൂന്നുപേരും ഒന്നിച്ച് തെയ്യം കെട്ടിയത്. വടക്കെ മലബാറിലെ കാവുകളിൽ അപൂർവ്വമായേ വസൂരി തെയ്യം കെട്ടാറുള്ളു. ആധികളും വ്യാധികളും മാറ്റുന്നതിനും നാടിനും നാട്ടാർക്കുമുള്ള ദോഷങ്ങളകറ്റാനുമാണ് വസൂരിമാല കെട്ടിയാടുന്നത്. നീണ്ട മുടിയും പൂക്കൾ കൊണ്ടുള്ള മാലകളും ചടുലമായ ചുവടുകളും ആർപ്പുവിളിച്ചു കൊണ്ടുള്ള അവതരണവുമാണ് വസൂരിമാലയുടെത്. വസൂരിമാലയുടെ അനുഗ്രഹം വാങ്ങാനായി സ്ത്രീകളും കുട്ടികളുമടക്കമുള്ള നുറുകണക്കിനാളുകളാണ് ചുണ്ടങ്ങാപ്പൊയിൽ കുടിൽ കുട്ടി ശാസ്ത്രപ്പൻ ക്ഷേത്രത്തിലെത്തിയത്.