നീ എന്താ മോളേ ഒന്നും പറയാഞ്ഞത്; ആ കുഞ്ഞുമക്കളെ നിനക്ക് ഓർത്തൂടായിരുന്നോ; അവർക്കിനി ആരുണ്ട്; അപർണ്ണയുടെ മരണം ഉൾക്കൊള്ളാനാകാതെ പ്രിയപ്പെട്ടവർ

എന്തിന് ആയിരുന്നെടീ ഈ ആരോടും പറയാതെ ഉള്ള പോക്ക്. അവസാനം കഴിഞ്ഞ ദിവസം കണ്ടത് ഇന്നും കണ്മുന്നിൽ പെണ്ണേ നീ. ഒരു വിളിപ്പാട് അകലെ ഉണ്ടായിട്ട് പോലും അറിഞ്ഞില്ലല്ലോ, ഒന്നും പറഞ്ഞില്ലലോ നീ. പ്രിയപ്പെട്ടവൾ ആരോടും പറയാതെ വിട പറഞ്ഞു. ആദരാഞ്ജലികൾ.

ആരാണ് എന്റെ മോളെ, വാക്കുകൾ ഇല്ല മുത്തേ നിന്നെ മനസ്സിലാക്കാത്തത് ആരായിരുന്നു- എന്നുതുടങ്ങി നിരവധി പോസ്റ്റുകൾ ആണ് അപർണ്ണയെക്കുറിച്ച് സ്നേഹിതരും സഹപ്രവർത്തകരും പങ്കിടുന്നത്.

കുടുംബത്തിന് ഒപ്പമുള്ള സ്നേഹനിമിഷങ്ങൾ ആണ് അപർണ്ണ പങ്കിടുന്നവയിൽ അധികവും. ലൊക്കേഷൻ കാഴ്ചകളും, കുഞ്ഞുങ്ങളുടെ ചിത്രങ്ങളും എല്ലാം പങ്കിടുന്ന അപർണ്ണ കുറച്ചു ദിവസങ്ങളായി പങ്കിടുന്ന പോസ്റ്റുകളിൽ ഏറെ നിരാശ നിറഞ്ഞ പോസ്റ്റുകളുമുണ്ട്. എന്നാൽ എന്താണ് ആ സങ്കടം എന്ന് അപർണ്ണ തന്റെ പ്രിയപ്പെട്ടവരോട് പോലും പറഞ്ഞിട്ടില്ലെന്ന് വ്യക്തം.

മേഘതീർത്ഥം, മുദ്ദുഗൗ, അച്ചായൻസ്, കോടതിസമക്ഷം ബാലൻ വക്കീൽ, കൽക്കി തുടങ്ങി നിരവധി സിനിമകളിലും ചന്ദനമഴ, ആത്മസഖി എന്നീ സീരിയലുകളിലും അഭിനയിച്ച അപർണ്ണ ചെയ്ത പോലീസ് വേഷങ്ങൾ ഏറെ ശ്രദ്ധിക്കപ്പെട്ടിരുന്നു. വില്ലത്തി വേഷങ്ങൾ ചെയ്യാൻ ഏറെ ഇഷ്ടപ്പെട്ടിരുന്ന അപർണ്ണ മോഡലിങ്ങിലും ശ്രദ്ധ വച്ചിരുന്നു.

എന്റെ സ്ട്രെങ്ത് എന്റെ ഭർത്താവാണ് എന്ന് കാണിച്ചുകൊണ്ടും സ്വയം മോട്ടിവേറ്റ് ചെയ്യുന്നതുമായ ഒട്ടനവധി പോസ്റ്റുകളും അപർണ്ണ പങ്കിട്ടിട്ടുണ്ട്. ത്രയയും കൃതികയും ആണ് അപർണ്ണയുടെ മക്കൾ. കുഞ്ഞുങ്ങളെ എങ്ങനെ തനിച്ചാക്കാൻ സാധിച്ചു എന്നാണ് ആരാധകർ കമന്റുകളിടുന്നത്.

അതേസമയം അപർണ്ണയുടെ അസ്വാഭാവിക മരണത്തിന് കേസെടുത്ത് പോലീസ് അന്വേഷണം ആരംഭിച്ചിട്ടുണ്ട്.