വർഷ മുതൽ അപ്പു വരെ: മലയാള സിനിമയിലെ ശ്രദ്ധ നേടിയ വൺ സൈഡഡ് പ്രണയങ്ങൾ

നിറം സിനിമയിലെ വർഷയെ മറന്നിട്ടില്ലലോ അല്ലെ? എബിയെ ജീവനായി സ്നേഹിച്ച വർഷ. ഇടയ്ക്കിടെ അശ്രദ്ധകൊണ്ട് വീഴുകയും പറ്റിക്കപ്പെട്ടു കാശ് നഷ്ടപ്പെടുകയും ഒക്കെ ചെയ്യുമെങ്കിലും എബിയോടുള്ള വർഷയുടെ പ്രണയം സത്യം തന്നെ ആയിരുന്നു. കുഞ്ഞു കുഞ്ഞു സമ്മാനങ്ങൾ എബിക്ക് വാങ്ങുകയും അച്ഛനെ കാണുവാൻ അദ്ദേഹത്തെ ക്ഷണിക്കുകയും ഒക്കെ ചെയ്തിട്ടും പ്രണയം നിരസിക്കപ്പെടുന്ന ഒരു പാവം. മറ്റൊരു വശം പറഞ്ഞാൽ എബി - സോന ബന്ധം പ്രണയം ആണെന്ന് ആദ്യം പറഞ്ഞതും വർഷ തന്നെയാണ്, അവളിലൂടെയാണ് സോന എബിക്ക് തന്നോടുള്ള പ്രണയം മനസിലാക്കുകയും ചെയ്യുന്നത്. സിനിമയിൽ ജോമോൾ ആണ് വർഷ എന്ന കഥാപാത്രം അഭിനയിക്കുന്നത്, ഇപ്പോഴും ഓർത്തിരിക്കുന്ന താരത്തിന്റെ നല്ലൊരു കഥാപാത്രം തന്നെയാണ് ഇത്.

മൊയ്തീന്റെയും കാഞ്ചനയുടെയും ശക്തമായ പ്രണയത്തിനു ഇടയിൽ മങ്ങിപ്പോയ ഒരു പ്രണയമാണ് അപ്പുവിന്റേത്. കുഞ്ഞുനാൾ മുതൽ മനസ്സിൽ കൊണ്ട് നടന്ന പ്രണയം, ഒടുവിൽ ഒരു കത്തിൽ എഴുതി പറഞ്ഞപ്പോൾ ഒരുപാട് വൈകിയിരുന്നു എന്ന് അപ്പു അറിഞ്ഞില്ല. പിന്നീട് വർഷങ്ങൾക്കിപ്പുറം തന്റെ പ്രണയിനി കഷ്ടതകൾ അനുഭവിക്കുന്നു എന്നറിഞ്ഞു അവൾക്കു മുന്നിൽ പിന്നെയും വിവാഹ അഭ്യർത്ഥനയുമായി പോകുന്ന അപ്പു വേറെ ലെവൽ തന്നെയാണ്.

'ബാംഗ്ളൂരിന് വന്ന വൺ ബ്ലാക് കോഫി പ്ലീസ്' ആറാം തമ്പുരാൻ സിനിമയിലെ പ്രിയ രാമന്റെ കഥാപാത്രം നയൻതാരയെ ഓർമയില്ലേ? നായികക്കു കുറച്ചു അസൂയ ഒക്കെ ഉണ്ടാക്കി എങ്കിലും തനിക്ക് ജഗനോടുള്ള പ്രണയം വെളിപ്പെടുത്തിയ നയൻസിന്റെ രംഗം വളരെ ഹൃദ്യമായിരുന്നു. നായകന് പ്രിയപ്പെട്ട സിത്താർ സമ്മാനമായി നൽകി, അവനു വേണ്ടി മൈലുകൾ താണ്ടി വന്നു തന്റെ ഇഷ്ടം തുറന്നു പറഞ്ഞ ഈ കാമുകി കുറച്ചു അണ്ടർറേറ്റഡ് ആയിപ്പോയില്ലേ?

സത്യൻ അന്തിക്കാട് ചിത്രം കൊച്ചു കൊച്ചു സന്തോഷങ്ങളിലെ സെലിനെ ഓർമയില്ലേ? കാവ്യാ മാധവൻ അവതരിപ്പിച്ച കഥാപാത്രം. ഒരു കുഞ്ഞു ഉണ്ട് എന്നറിഞ്ഞിട്ടും തന്നെക്കാൾ പ്രായം കൂടിയ ആളെന്ന് അറിഞ്ഞിട്ടും സെലിന് ഗോപനോട് തോന്നിയ സ്നേഹം എത്ര മനോഹരമായിരുന്നു. അവസാനം ഗോപനെയും ആശയും ഒന്നിപ്പിച്ചപ്പോൾ കണ്ണ് നിറഞ്ഞുകൊണ്ട് ഇറങ്ങി പോയ സെലിനെ സിനിമ ശ്രദ്ധിച്ച ആരും മറന്നിട്ടുണ്ടാകില്ല എന്നുറപ്പാണ്.

മീനാക്ഷി തന്റെ ആത്മാർഥ സുഹൃത്തിന്റെ പെണ്ണാണെന്ന് അറിയാതെ ആണെങ്കിലും അവളെ ജീവന് തുല്യം സ്നേഹിച്ച ആളാണ് തെങ്കാശിപട്ടണത്തിലെ ദാസൻ. മദ്യപാനവും അടിപിടിയും ഒക്കെ ജീവിതത്തിലേക്ക് ഒരു പെണ്ണ് വന്നതോടെ ഉപേക്ഷിച്ച ഈ ലാൽ കഥാപാത്രവും ഒരു പാവം കാമുകൻ തന്നെയായിരുന്നു, ഒരു വൺ സൈഡ് ലവ്.

കൃഷ്ണനെ ജീവനായി സ്നേഹിച്ച മാളവികയും ഒരു പാവം കാമുകി ആയിരുന്നു. കൃഷ്ണനെക്കുറിച്ചു കവിതകൾ എഴുതിയും മനസിലെ സ്നേഹം പറയാതെ പറഞ്ഞും ഒക്കെ ഈ ഗീതു മോഹൻദാസ് കഥാപാത്രം തിരിച്ചു കിട്ടില്ലെന്നറിഞ്ഞിട്ടും ആ മുറ്റത്തെ നന്മമരത്തെ വല്ലാതെ സ്നേഹിച്ചു.

കാർത്തുമ്പിയുടെ മനസ്സിൽ മാണിക്കനാണെന്നു അറിയാതെ ആണ് കൃഷ്ണൻ അവളെ സ്നേഹിച്ചു തുടങ്ങിയത്. എന്നാൽ പിന്നീട് സത്യമെല്ലാം അറിഞ്ഞപ്പോൾ തന്റെ സ്നേഹം നിരസിക്കപ്പെട്ടപ്പോഴാണ് കൃഷ്ണൻ വില്ലനായി മാറിയത്. എന്തായാലും സിനിമയുടെ അവസാനം തന്നെ സ്നേഹിക്കുന്ന ആളെ തന്നെ കൃഷ്ണൻ വിവാഹം കഴിച്ചത് ചിത്രത്തിന് നല്ലൊരു ക്ളൈമാക്സ് നൽകി.