സർക്കാർ

തമിഴ് നാടിന്‍റെ ശ്വാസം സിനിമയും രാഷ്ട്രീയവുമാണെന്നു പറഞ്ഞാല്‍ അതിശയോക്തിയാകാന്‍ തരമില്ല. സിനിമയിലുള്ളവര്‍ രാഷ്ട്രീയത്തില്‍ ഇറങ്ങി മുഖ്യമന്ത്രിമാര്‍ വരെ ആകുന്നതും, രാഷ്ട്രീയക്കാര്‍ താരങ്ങളാകുന്നതും നമ്മള്‍ കണ്ടതാണ്. സമീപ കാലത്ത്, കൃത്യമായി പറഞ്ഞാല്‍ ജയലളിതയുടെ മരണത്തിനു ശേഷം തമിഴ്നാട് രാഷ്ട്രീയത്തിലുണ്ടായ വിടവ് , അവസരമാക്കാന്‍ ശ്രമിക്കുന്ന അനേകം താരങ്ങളെയും സമീപകാലത്ത് കാണുന്നുണ്ട്. രാഷ്ട്രീയം പ്രമേയമായ ചിത്രങ്ങളും അനവധി. ഈ പരിസരത്ത് നിന്ന് കൊണ്ടു തന്നെയാകണം വിജയ്‌യെ ചേര്‍ത്ത്പിടിച്ച് കൊണ്ടു , “സര്‍ക്കാര്‍” എന്ന പേര് തന്നെ നല്‍കി കൊണ്ടു മുരുകദാസ് പുതിയ ചിത്രവുമായി എത്തിയത്.

ലോക പ്രശസ്ത കമ്പനിയുടെ സി ഇ ഒ യാണ് വിജയ്‌ കഥാപാത്രം സുന്ദര്‍.”കോര്‍പ്പറേറ്റ് ക്രിമിനല്‍” എന്ന് വിളിക്കാവുന്ന സുന്ദര്‍ മനസ്സ് വെച്ചാല്‍ ഏതു കമ്പനിയെയും തകര്‍ക്കാന്‍ കഴിയും. പൊതു തെരഞ്ഞെടുപ്പില്‍ ചെന്നൈയില്‍ വോട്ട് ചെയ്യാന്‍ സുന്ദര്‍ എത്തുമ്പോഴാണ് അറിയുന്നത് തന്‍റെ വോട്ടവകാശം മറ്റൊരാള്‍ക്ക് നൽകപ്പെട്ടിരിക്കുന്നു. വോട്ടവകാശം നിഷേധിക്കപ്പെട്ടത് കൊണ്ട്, സെക്ഷന്‍ 49 മുന്‍നിര്‍ത്തി കോടതിയെ സമീപിക്കുന്ന സുന്ദറിൻ്റെ ഇടപെടലുകള്‍ കൊണ്ടു തമിഴ്‍‍നാട്ടില്‍ റീ-ഇലക്ഷന്‍ നടത്തപ്പെടുന്നു. പൊതുജനങ്ങളുടെ പങ്കാളിത്തത്തോടെ തിരഞ്ഞെടുപ്പിനെ നേരിടുന്ന സുന്ദര്‍ അത്, അഴിമെതിക്കെതിരെയുള്ള പോരാട്ടമായി മാറ്റപ്പെടുന്നു. സുന്ദറിൻ്റെ വിപ്ലവം വിജയം കാണുമോ?


കത്തി, തുപ്പാക്കി എന്നിവയുടെ വിജയത്തിന് ശേഷം എ ആര്‍ മുരുകദാസ്- വിജയ്‌ ഒന്നിക്കുന്ന സര്‍ക്കാര്‍ വിജയിയുടെ ആരാധകരെ ആവേശം കൊള്ളിക്കാന്‍ നിര്‍മിച്ച കമ്പ്ലീറ്റ്‌ എൻ്റര്‍ടെയ്‍‍നറാണ്. കിടിലന്‍ ഡയലോഗുകളും ആക്ഷന്‍ രംഗങ്ങളും കൊണ്ടു വിജയ്‌ വീണ്ടും കയ്യടി നേടുകയാണ്‌ സര്‍ക്കാരില്‍. ആദ്യ പകുതി മസാല സിനിമകളുടെ ചേരുവകള്‍ കൊണ്ടു സമ്പന്നമായപ്പോള്‍ രണ്ടാം പകുതിയിലാണ് കാതലുള്ള സംഭവങ്ങള്‍ തുറന്നു കാട്ടിയത്. മത്സ്യബന്ധന തൊഴിലാളികളുടെ വേദനകള്‍ പങ്കിട്ടു കൊണ്ടു ഇമോഷണല്‍ രംഗങ്ങളും ചിത്രം കാര്യമായി കൈകാര്യം ചെയ്തിട്ടുണ്ട്.


മുന്‍ സിനിമകളില്‍ നിന്ന് എ ആര്‍ മുരുദാസിൻ്റെ സംവിധാന മികവ് പിന്നോട്ട് പോകുന്ന പാകപ്പിഴകള്‍ സിനിമയില്‍ ഏറെയുണ്ടുതാനും. നായകനെ മാത്രം ഉയര്‍ത്തികാട്ടാനുള്ള തത്രപ്പാടില്‍ പ്രതി നായകര്‍ - രാധാരവിയും, പാലാ കറുപ്പയ്യയും ദുര്‍ബലരായാണ് തോന്നിയത്. യാതൊരു ഔചിത്യവും ഇല്ലാതെ പാട്ടുകള്‍ കുത്തിനിറച്ച ചിത്രം, പറയാന്‍ ശ്രമിച്ച കഥക്കിടയിലെ കല്ലുകടി മാത്രമായി തോന്നി. സംഘട്ടന രംഗങ്ങളിലെ അമാനുഷികത വിജയ്‌ സിനിമകളുടെ കൂടെ പിറപ്പായതിനാല്‍ കൂടുതല്‍ ഒന്നും പറയാനില്ല. എ.ആര്‍ റഹ്മാന്‍ എന്ന സംഗീത മാന്ത്രികന്‍റെ മിഴിവുകളും ചിത്രത്തില്‍ കണ്ടില്ല. കീര്‍ത്തി സുരേഷ് സുന്ദരിയായി കാണപ്പെട്ടെങ്കിലും കാര്യമായി ഒന്നും ചെയ്യാന്‍ ഉണ്ടായിരുന്നില്ല.


എ ആര്‍ മുരുകദാസിന്‍റെ മുന്‍ വിജയ ചിത്രങ്ങള്‍ നല്‍കിയ പ്രതീക്ഷകള്‍ ഇല്ലാതെ, തകര്‍ത്താടുന്ന വിജയിയെ മാത്രം കാണാന്‍ പോകുന്നവരെ സര്‍ക്കാര്‍ നിരാശപ്പെടുത്തില്ല. അവര്‍ക്ക് ആഘോഷിക്കാന്‍ പാകപ്പെടുത്തിയ ചിത്രം തന്നെയാണ് സര്‍ക്കാര്‍.



പാക്കപ്പ്:
സര്‍ക്കാരിൻ്റെ നോട്ടു നിരോധത്തെയും ജി എസ് ടി യെയും വിമര്‍ശിച്ച “മെര്‍സല്‍ “ ഇറങ്ങിയപ്പോള്‍ , വിജയ്‌യുടെ രാഷ്ട്രീയ പ്രവേശനം ചര്‍ച്ചയായിരുന്നു. “സര്‍ക്കാര്‍” കണ്ടു കഴിയുമ്പോള്‍ നമ്മള്‍ ഒന്നുടെ ചോദിച്ചു പോകും “അണ്ണന്‍, രാഷ്രീയത്തില്‍ ഉടനെ ഇറങ്ങുമല്ലേ?”