വല്യേട്ടനെ പോലെ സച്ചിന്....
സൗരവ് ഗാംഗുലിക്ക് പകരം രാഹുല് ദ്രാവിഡ് ഇന്ത്യന് ടീമിന്റെ നായക സ്ഥാനത്ത് എത്തിയ കാലം. പാക്കിസ്ഥാനില് ദ്രാവിഡിന്റെ ടീം ഇന്ത്യ കളിക്കാന് പോയത് പുതിയ ഒരു പറ്റം യുവതാരങ്ങളുമായിട്ട്. ആ ടീമിന്റെ വല്യേട്ടന് സ്ഥാനം സച്ചിന് ടെണ്ടുല്ക്കര്ക്ക്. പെഷാവറിലെ ഇന്നിംഗ്സില് സച്ചിനിലെ ആ വല്യേട്ടന് ഉണര്ന്നു കളിച്ചത് പോലെ അനുഭവപ്പെടും. വിരേന്ദര് സെവാഗ് (5) പെട്ടെന്ന് പുറത്തായപ്പോള് സച്ചിന് 113 പന്തുകളില് 100 റണ്സുമായി ടീമിനെ മുന്നോട്ട് നയിച്ചു. ദ്രാവിഡിന് മുമ്പെ ക്രീസിലെത്തിയ ഇര്ഫാന് പത്താനും (65) എം എസ് ധോണിയും (68) യുവരാജ് സിംഗും (38) അവസരോചിത ഇന്നിംഗ്സ് കാഴ്ചവെച്ചത് സച്ചിന്റെ തണലില് നിന്നു കൊണ്ടായിരുന്നു.
വലിയ തകര്ച്ച ഒഴിവാക്കി....
ടീം സ്കോര് അഞ്ച് റണ്സിലെത്തിയപ്പോള് ഇന്ത്യക്ക് വിരേന്ദര് സെവാഗിനെ നഷ്ടമായി. മുഹമ്മദ് ആസിഫ് തകര്പ്പന് ഫോമില് പന്തെറിഞ്ഞ ദിവസമായിരുന്നു അത്. ആസിഫിന്റെ പന്തിന്റെ ലൈനും ലെംഗ്തും വേഗതയുമൊന്നും സെവാഗിന് തിരിച്ചറിയാന് കഴിഞ്ഞില്ല. വിക്കറ്റ് കീപ്പര് കമ്രാന് അക്മലിന് ക്യാച്ചായാണ് മടക്കം. ക്യാപ്റ്റന് ഇന്സമാം ഉല് ഹഖ് ബൗളര്മാര്ക്ക് തുടക്കത്തില് പിന്തുണ ലഭിക്കുന്ന പിച്ചില് സച്ചിനെ കുടുക്കാന് വ്യത്യസ്ത തന്ത്രങ്ങള് പയറ്റി. സച്ചിന് മുന്നില് എന്നും തലകുനിച്ചിട്ടുള്ള നവേദ് ഉല് ഹസനെ പെട്ടെന്ന് പിന്വലിച്ച് ഉമര്ഗുലിനെയും അബ്ദുല് റസാഖിനെയും അഫ്രീദിയെയും അര്ഷാദ് ഖാനെയും ഷുഹൈബ് മാലിക്കിനെയും മാറി മാറി പരീക്ഷിച്ചു. തകര്ച്ച ഒഴിവാക്കാന് സച്ചിന് തുനിഞ്ഞിറങ്ങിയതോടെ അതെല്ലാം പാഴ് വേലയായി.
സ്ട്രൈക്ക് കൈമാറി സച്ചിന്....
അപകടം തിരിച്ചറിഞ്ഞ് ബാറ്റ് ചെയ്യാനായിരുന്നു ഇര്ഫാന് പത്താനും ധോണിക്കും സച്ചിന് നല്കിയ നിര്ദേശം. ഓരോ ബൗണ്ടറി നേടുമ്പോഴും സച്ചിന് അടുത്ത് വന്ന് പ്രചോദിപ്പിക്കുമായിരുന്നുവെന്ന് പത്താന് പിന്നീട് ഓര്മ പങ്കുവെക്കലില് പറഞ്ഞിരുന്നു. 65 പന്തുകളില് 65 റണ്സെടുത്ത പത്താന്റെ പ്രകടനം മികച്ചതായിരുന്നു. പന്ത്രണ്ട് ഫോറുകളും ഒരു സിക്സുമായിരുന്നു പത്താന്റെ ഇന്നിംഗ്സിന് കരുത്തേകിയത്. ധോണി ആക്രമിച്ചു കളിക്കുമ്പോള് സച്ചിന് അതാസ്വദിച്ചു. 53 പന്തുകളിലായിരുന്നു ധോണി 68 റണ്സടിച്ചത്. പതിനൊന്ന് ഫോറുകളും ഒരു സിക്സും ഉള്പ്പെടുന്ന ഇന്നിംഗ്സ്. യുവരാജെത്തിയപ്പോള് സ്കോറിംഗ് വേഗത കൂട്ടാനാവശ്യപ്പെട്ടു. 28 പന്തില് 39 റണ്സുമായി യുവി ആടിത്തിമിര്ത്തതോടെ സ്കോര് മുന്നൂറിലേക്ക് അടുത്തു.
സച്ചിന് മുപ്പത്തൊമ്പതാം സെഞ്ചുറി....
എഴുപത്തിരണ്ടാം അര്ധസെഞ്ചുറി നേടിയ സച്ചിന് സെഞ്ചുറി പൂര്ത്തിയാക്കുമെന്ന് വ്യക്തമായിരുന്നു. ബൗളര്മാര്ക്ക് മേല് വ്യക്തമായ ആധിപത്യം സച്ചിനുണ്ടായിരുന്നു. പത്ത് ഫോറുകളും ഒരു സിക്സും നേടിയ സച്ചിന് അനാവശ്യമായി ക്രീസ് വിട്ടിറങ്ങിയില്ല. മുപ്പത്തൊമ്പതാം സെഞ്ചുറി സച്ചിന് തികച്ചത് ഉത്തരവാദിത്വമുള്ള ഇന്നിംഗ്സിനുള്ള മാതൃക സൃഷ്ടിച്ചു കൊണ്ടായിരുന്നു. അര്ഷാദ് ഖാന്റെ പന്തില് എല്ബിഡബ്ല്യു ആവുകയായിരുന്നു. ടീം സ്കോര് 305 ലാണ് സച്ചിന് പുറത്തായത്. വാലറ്റത്ത് വലിയ തകര്പ്പനടികള് ഇല്ലാതെ പോയത് ടീം സ്കോര് 350 കടത്തിയില്ല.
സല്മാന് ഭട്ടിന്റെ സെഞ്ചുറി...
സച്ചിന്റെ ഇന്നിംഗ്സിന് പാക്കിസ്ഥാന്റെ ഗംഭീര മറുപടിയായിരുന്നു സല്മാന് ഭട്ടിന്റെ സെഞ്ചുറി. 111 പന്തുകളില് 101 റണ്സടിച്ച ഭട്ട് 15 ബൗണ്ടറികളും നേടി. കൂറ്റനടികള്ക്കൊന്നും ഭട്ട് തയ്യാറായില്ല. സച്ചിനെ പോലെ ഒരറ്റത്ത് മോശം പന്തുകളെ മാത്രം ആക്രമിച്ചു കളിച്ചു. 67 പന്തില് 90 റണ്സടിച്ച ഷുഹൈബ് മാലിക്ക് ഇന്ത്യക്കായി പത്താനും ധോണിയും യുവരാജും കളിച്ച ഇന്നിംഗ്സിനുള്ള മറുപടി നല്കിയതോടെ പാക്കിസ്ഥാന് റണ് ചേസില് പിടിമുറുക്കി. മധ്യനിര തകര്ന്നെങ്കിലും എല്ലാവരും മിനിമം സ്കോര് ഉറപ്പ് വരുത്തിയത് പാക്കിസ്ഥാനെ തുണച്ചു. 16 പന്തില് 18 റണ്സുമായി പുറത്താകാതെ നിന്ന യൂുനിസ് ഖാന്റെ സാന്നിധ്യം ജയം ഉറപ്പാക്കി.