റിയോയില്‍ സെൽഫിപ്രളയം; കായികമന്ത്രി ഇന്ത്യയെ നാണം കെടുത്തി

മോശം പെരുമാറ്റത്തിന്റെ പേരില്‍ ഇന്ത്യന്‍ കായികമന്ത്രി വിജയ് ഗോയലിനെതിരേ നടപടി സ്വീകരിക്കുമെന്ന മുന്നറിയിപ്പുമായി റിയോ ഒളിമ്പിക്‌സ് ഓര്‍ഗനൈസിംഗ് കമ്മിറ്റി രംഗത്ത്. അക്രഡിറ്റഡ് മേഖലയില്‍ അനുവാദമില്ലാത്തവരുമായി കടന്നു ചെന്നു എന്നതാണ് ഗോയലിനെതിരായ ആരോപണം. ബോക്‌സിംഗ്, ജിംനാസ്റ്റിക്, അമ്പെയ്ത്ത് തുടങ്ങിയ വേദികളിലാണ് ഗോയലും സംഘവും അനധികൃതമായി കടന്നു ചെന്നത്. തുടര്‍ന്നും സമാന അനുഭവം ഉണ്ടായാല്‍ ഗോയലിന്റെ രജിസ്‌ട്രേഷന്‍ റദ്ദാക്കി റിയോയില്‍ നിന്ന് മടക്കി അയയ്ക്കുമെന്നും ഒളിമ്പിക്‌സ് അധികൃതര്‍ അറിയിച്ചു.

ഇന്ത്യന്‍ സംഘത്തലവന്‍ രാകേഷ് ഗുപ്തയ്ക്ക് ഒളിമ്പിക്‌സ് ഓര്‍ഗനൈസിംഗ് കോണ്ടിനെന്റല്‍ മാനേജര്‍ സാറ പീറ്റേഴ്‌സണ്‍ നല്കിയ ഔദ്യോഗിക കുറിപ്പിലാണ് ഗോയലിനെതിരായ ആരോപണം. സന്ദേശം ഗോയലിനെ അറിയിക്കണമെന്നും മേലില്‍ ഇതാവര്‍ത്തിക്കരുതെന്നും കുറിപ്പില്‍ വ്യക്തമാക്കുന്നു. ബോക്‌സിംഗില്‍ ഇന്ത്യയുടെ വിജയ് കുമാര്‍ ലിത്വാനിയയുടെ യെവാല്‍ഡാസ് പെട്രോസ്‌കാസിനെതിരേ ജയിച്ചപ്പോള്‍ ഗോയലും സംഘവും അനുമോദിക്കാന്‍ എത്തിയിരുന്നു. ഗോയലിനൊപ്പം അദ്ദേഹത്തിന്റെ ഭാര്യയും റിയോയില്‍ ഉണ്ട്.

എന്നാല്‍ ആരോപണം നിഷേധിച്ച് മന്ത്രി രംഗത്തുവന്നു. തന്റെ ഒപ്പം വന്നവര്‍ക്കെതിരേയാണ് ആരോപണമെന്നും ഒളിമ്പിക്‌സ് നിയമങ്ങളൊന്നും താന്‍ തെറ്റിച്ചിട്ടില്ലെന്നും മന്ത്രി പറഞ്ഞു.