നീ അറിയാറുണ്ടോ? നീ വിതുമ്പുന്നതു അമ്മ അറിയാറുണ്ട് അഭീ; കുഞ്ഞു തെന്നലായി അമ്മ നിന്റെ മുടിയിഴകളെ തഴുകുന്നുണ്ട്!

ബിഗ് ബോസ് സീസൺ ആറ് ഫൈനൽ എപ്പിസോഡുകളിലേക്ക് അടുക്കുകയാണ്. മത്സരാർഥികളിൽ പലരും എവിക്ഷനിലൂടെ പുറത്തുപോവുകയും, വീടിനുളളിൽ കഴിയുന്നവരെ തേടി വീട്ടുകാർ എത്തുന്നതും എല്ലാം പുത്തൻ ബിഗ് ബോസ് വിശേഷങ്ങൾ ആണ്. എന്നാൽ ഇതിനൊക്കെ പുറമെ കഴിഞ്ഞദിവസം ആയിരുന്നു വീക്കെൻഡ് എപ്പിസോഡ് നടന്നത്. മദേഴ്‌സ് ഡേ സ്പെഷ്യൽ എപ്പിസോഡിൽ തങ്ങളുടെ അമ്മമാർക്ക് ഒരു കത്താണ് മതസാരാർത്ഥികൾ നൽകിയത്. പലരും ഇമോഷണൽ ആകുന്നതും, പലരും അമ്മമാരേ കുറിച്ച് വാചാലരാവുന്നതും കണ്ടതാണ്. അഭിഷേക് അമ്മക്ക് എഴുതിയ കത്താണ് സോഷ്യൽ മീഡിയ ഇടങ്ങളിൽ ഏറെ ചർച്ച ആയതും. ഇപ്പോഴിതാ അഭിക്ക് 'അമ്മ എഴുതിയ കത്ത് എന്ന പേരിൽ ബിഗ് ബോസ് ആരാധകരിൽ ഒരാൾ പങ്കുവച്ച കത്തിന്റെ പൂർണ്ണരൂപം വായിക്കാം.

അഭിഷേക് അമ്മയ്‌ക്കെഴുതിയ കത്തിന് ഒരു മറുപടി ...Big Boss ഒന്ന് വായിച്ചു കേൾപ്പിക്കാമോ അഭിഷേകിനെ ഈ കത്ത് ...വൈലോപ്പിള്ളിയുടെ മാമ്പഴം എന്ന കവിത വായിച്ചു കഴിയുമ്പോൾ 'കണ്ണ് നനച്ച ഒരു വിങ്ങൽ സമ്മാനിക്കും' കുഞ്ഞു നഷ്ട്ടപ്പെട്ടു പോയ അമ്മയെ കുറിച്ച് ഓർക്കുമ്പോൾ മനസ്സ് !!!! ...പക്ഷെ അഭിഷേക് നിങ്ങൾ ജീവിത ഗന്ധിയായ ഒരു കത്ത് എഴുതിയത് വായിച്ച നേരം ഒരു വിങ്ങൽ ഉടലെടുത്തതാണ് ...പക്ഷെ 'നഷ്ടപ്പെടലിന്റെ ഒറ്റപ്പെടലിലും' പ്രചോദനത്തിന്റെ പ്രത്യയശാസ്ത്രത്തിലേക്കു വിരൽ ചൂണ്ടുന്ന നിങ്ങളോടു ബഹുമാനം തോന്നുന്നു !!! ...


ആദ്യമേ പറയട്ടെ നിങ്ങളോടു സഹതാപം ഒട്ടുമില്ല ...പക്ഷെ നിങ്ങളെ മനസ്സിലാക്കാൻ സാധിക്കുന്നു ... പച്ചയായ മനുഷ്യൻ ആണെന്ന് സുവ്യക്തത കൈവരുന്നു തെളിച്ചമുള്ള വാക്കുകളിലൂടെ ...അമ്മക്കെഴുതിയ കത്ത് മിഴികളെ ഈറനണിയിപ്പിച്ചു, അത് നിങ്ങളെ ഓർത്തല്ല, മറിച്ചു 'അമ്മ നിങ്ങളെ ഒന്ന് വളർന്നു വലുതായി ഇന്ന് കാണുന്ന അഭിഷേക് ആയി കണ്ടിരുന്നെങ്കിൽ എന്ന് ഓർത്തിട്ടു .. ...
ഒരു മൂന്നാം ക്ലാസ്സുകാരൻ ഉള്ളിലങ്ങനെ ഒരു തേങ്ങലായി കിടന്നു ഇന്നലെ രാത്രി മുഴുവൻ ... എഴുതണം എന്ന് തോന്നി ...'അമ്മ സ്നേഹമാണ് ..അതുകൊണ്ടു സ്നേഹം ഉറവ വറ്റിയിട്ടില്ലാത്തവരിലെല്ലാം നിങ്ങളോടുള്ള വാത്സല്യം നിറയട്ടെ എന്ന് ...

ആര് 'നോക്ക് കുത്തി' എന്ന് പറഞ്ഞിട്ട് പോയാലും നിങ്ങൾ ആത്മ നിയന്ത്രണം ഉള്ള മികച്ച പോരാളി ആണ് ... ഓരോ ടാസ്കിലും മികച്ച പ്രകടനങ്ങൾ കാഴ്ച വെച്ച നിങ്ങളെ വിജയം ആശ്ലേഷിക്കട്ടെ ...
നിങ്ങൾക്കായി പ്രാർത്ഥിക്കാൻ കേരളത്തിൽ ഇന്ന് എത്രയോ അമ്മമാരുണ്ട്.....


തത്വമസി എന്നാൽ നീ തേടിയത് നിന്നിൽ തന്നെ ഉണ്ടെന്നു ആണ് ..'അമ്മ നിന്നിൽ തന്നെ ഉണ്ട് ...
കത്ത് വായിച്ചതെല്ലാം കേട്ടു ... ആകാശത്തിന്റെ അഗാധതയിൽ 'അമ്മ നിനക്ക് വേണ്ടി സാന്ത്വനമാവുന്നതു മഴയായ് പൊഴിയുമ്പോഴാണ് ... ആകാശ ചെരുവിലെ ചന്ദ്രകാന്തമായി നിലാവിന്റെ പൊയ്കയിലേറി നീ ഉറങ്ങിയോ എന്ന് 'അമ്മ വന്നു അന്വേഷിക്കുമ്പോൾ നിറഞ്ഞ മനസ്സോടെ നിന്നെ നോക്കി 'അമ്മ പുഞ്ചിരിക്കാറുണ്ട്, നീ അറിയാറുണ്ടോ ?നീ വിതുമ്പുന്നതു 'അമ്മ അറിയാറുണ്ട് അഭീ ..ഒരു കുഞ്ഞു തെന്നലായി 'അമ്മ നിന്റെ മുടിയിഴകളെ തഴുകി മെല്ലെ കടന്നു പോവാറുണ്ട് ...

നീ ഒറ്റയ്ക്കാവുമ്പോൾ 'അമ്മ ഋതുക്കൾക്കൊപ്പം നിന്നെ തേടി വരാറുണ്ട് ശൈത്യമായും, വേനലായും, ഹേമന്ദമായും ,ശിശിരമായും അങ്ങനെ അങ്ങനെ ...നിനക്കറിയുമോ അഭീ, ചക്രവാള സീമയിലെ ചുവപ്പു അമ്മയുടെ സിന്ദൂരമാണ് ... പുലരിയിലെ കിരണങ്ങൾ നിന്നെ വന്നു കിടക്കയിൽ ആലിംഗനം ചെയ്യാറില്ലേ അത് അമ്മയുടെ തേജസ്സാണ്.... ആഴിയുടെ അഗാതതയെക്കാൾ സ്നേഹം ഉണ്ട് അമ്മയ്ക്കു മോനോട് ... ജനിമൃതികളെ അതിജീവിക്കുന്ന സ്നേഹം ...ആയുർ ആരോഗ്യ സൗഖ്യമുണ്ടാവട്ടെ ...'അമ്മ ഇപ്പോഴും എപ്പോഴും നിന്നിലും നിനക്ക് ചുറ്റും സ്നേഹമായി നിലകൊള്ളുന്നു .... നീ എല്ലാവരാലും സ്നേഹിക്കപ്പെടട്ടെ- എന്നുപറഞ്ഞുകൊണ്ടാണ് പോസ്റ്റ് അവസാനിക്കുന്നത്.

അഭി പങ്കിട്ട കത്ത്


പ്രിയപ്പെട്ട അമ്മ..അമ്മയ്ക്ക് സുഖമാണെന്ന് കരുതുന്നു. ഞാൻ അങ്ങനെ ലെറ്ററൊന്നും എഴുതില്ലെന്ന് അറിയാമല്ലോ. അമ്മയുടെ പേര് പറഞ്ഞ് ഞാൻ എവിടെയും സെന്റി അടിക്കാറുമില്ല. പക്ഷേ ബിഗ് ബോസ് ഇങ്ങനെ ഒരു ടാസ്ക് തന്നു. ഒരു ഹായ്, മിസ് യു , ബൈ തരാം എന്നാണ് കരുതിയത്. പക്ഷേ ഇവിടെയുള്ള ചില സുഹൃത്തുക്കൾ പറഞ്ഞു മനസു തുറന്ന് എഴുതാൻ. അമ്മയുടെ ഓർമകൾ എനിക്കുള്ളത് മൂന്നാം ക്ലാസിൽ പഠിക്കുമ്പോഴുള്ളതാണ്. അതാണ് എന്റെ അവസാനത്തെ ഓർമകളും. ടിവി കാണുമ്പോൾ ഓഫാക്കി പഠിക്കാൻ പറയുന്നതും സന്ധ്യാനാമം ചൊല്ലിക്കുന്നതും പഠിപ്പിക്കുന്നതും ആ സമയത്ത് വാഷ് ബേസിനിൽ പോയി ചോര ഛർദ്ദിക്കുന്നതും വയ്യാതെ ആശുപത്രിയിൽ വീൽ ചെയറിൽ പോകുന്നതും ലാസ്റ്റ് വെള്ളതുണി കൊണ്ടും വിറക് കൊണ്ട് മൂടിയും യാത്ര ആകുന്നതാണ്. ആകെ ഉള്ള ഓർമകളിൽ പ്രധാനപ്പെട്ടത് ഇതൊക്കെയാണ്. അമ്മ പോയതിൽ പിന്നെ എന്റെ ജീവിതം മാറി മറിഞ്ഞു. അച്ഛനാണ് പാരൻസ് മീറ്റിങ്ങിന് വരാറ്. പത്താം ക്ലാസ് ആയപ്പോൾ അച്ഛനോട് വരണ്ടെന്ന് പറയും. അത് അമ്മയുടെ കാര്യം ആരും ചിന്തിക്കാതിരിക്കാൻ വേണ്ടിയാണ്.


ശത്രുത കാണിച്ചാലും സെന്റിമെൻസ് കാണിക്കുന്നത് എനിക്ക് ഇഷ്ടമല്ല. കുടുംബം എന്നത് എത്ര വിലപ്പെട്ടതാണെന്ന് എനിക്ക് മനസിലായി. അതിന്റെ വിലയും. ഒരാൾ നഷ്ടപ്പെട്ടപ്പോഴാണ് എനിക്കത് മനസിലായത്. എന്നെ പോലെ ചിന്തിക്കുന്ന ഒത്തിരിപേർ എനിക്ക് സുഹൃത്തുക്കളായും ഉണ്ട്- അഭി കുറിച്ചു.