ഗുരുതരമായി പരിക്കേറ്റു, സംഭവ സ്ഥലത്ത് തന്നെ മരണപ്പെട്ടിരുന്നു; പവിത്ര ജയറാമിന്റെ അപകട മരണം, നടുക്കത്തില്‍ തെലുങ്ക് സീരിയല്‍ ഇന്റസ്ട്രി!

പ്രിയപ്പെട്ട നടിയുടെ മരണവാര്‍ത്ത കേട്ട നടുക്കത്തിലാണ് തെലുങ്ക് സീരിയല്‍ ഇന്റസ്ട്രിയും ആരാധകരും. ത്രിനയാനി എന്ന തെലുങ്ക് സീരിയലുകളിലൂടെ പ്രേക്ഷകര്‍ക്ക് ഏറെ പരിചിതയായ പവിത്ര ജയറാം കാര്‍ ആക്‌സിഡന്റില്‍ കൊല്ലപ്പെട്ടു. സീരിയലിലെ തിലോത്തമ എന്ന കഥാപാത്രം അത്രയധികം ജനശ്രദ്ധ നേടിയതാണ്

ആന്ധ്രാപ്രദേശിലെ മെഹബൂബ നഗറിന് സമീപത്തുവച്ചായിരുന്നു അപകടം. പവിത്ര സഞ്ചരിച്ചിരുന്ന കാര്‍ നിയന്ത്രണം വിട്ട് ഡിവൈഡറില്‍ ഇടിച്ചു, തുടര്‍ന്ന് ഹൈദരബാദില്‍ നിന്നും വനപര്‍ത്തിലേക്ക് വരികയായിരുന്ന ബസ് കാറിന്റെ വലത് വശത്ത് ഇടിയ്ക്കുകയും, ആ ഭാഗത്തിരുന്ന പവിത്രയ്ക്ക് ഗുരുതരമായ പരിക്കേല്‍ക്കുകയുമായിരുന്നു. സംഭവ സ്ഥലത്തുവച്ചു തന്നെ മരണപ്പെടുകയും ചെയ്തു.

വാഹനത്തില്‍ പവിത്രയ്‌ക്കൊപ്പം ബന്ധുവായ അപേക്ഷ, നടന്‍ ചന്ദ്രകാന്ത്, ഡ്രൈവര്‍ ശ്രീകാന്ത് എന്നിവരും ഉണ്ടായിരുന്നു. മൂന്ന് പേരെയും ഗുരുതര പരിക്കുകളോടെ ആശുപത്രിയില്‍ പ്രവേശിപ്പിച്ചു. കര്‍ണാടകയിലെ മാണ്ഡ്യ ജില്ലയിലെ ഹനകെരെയിലേക്ക് മടങ്ങുന്നതിനിടയാണ് അപകടമുണ്ടായത്. സംഭവത്തില്‍ പൊലീസ് അന്വേഷണം നടന്നുവരികയാണ്.

വാര്‍ത്ത കേട്ട നടുക്കത്തിലാണ് തെലുങ്ക് സീരിയല്‍ ലോകം. പവിത്രയുടെ വിയോഗത്തില്‍ അനുശോചകം രേഖപ്പെടുത്തി നടന്‍ സമീപ് ആചാര്യ സോഷ്യല്‍ മീഡിയയില്‍ എത്തി. 'നിങ്ങള്‍ ഇനിയില്ലെന്ന വാര്‍ത്ത കേട്ടാണ് ഇന്ന് ഞാന്‍ ഉണര്‍ന്നത്, ഇത് വിശ്വസിക്കാന്‍ കഴിയുന്നില്ല. എന്റെ ആദ്യത്തെ ഓണ്‍സ്‌ക്രീന്‍ - അമ്മ . നിങ്ങള്‍ എല്ലായിപ്പോഴും സ്‌പെഷ്യല്‍ ആയിരിക്കും' തെലുങ്ക് സീരിയലുകള്‍ക്ക് പുറമെ കന്നട സീരിയലുകളിലും പവിത്ര സജീവമാണ്‌.