പൂച്ചയെ എന്തിന് വാങ്ങിത്തരണം? പവർ പോയിന്റ് പ്രസന്റേഷനുമായി മകൾ

പൂച്ചയേയോ, പട്ടിയേയോ ഓമനിച്ചു വളർത്താൻ ആഗ്രഹിക്കാത്തവർ ചുരുക്കമാണ്. പ്രായോഗിക ബുദ്ധിമുട്ടുകൾ മുൻനിർത്തി ചിലർ ആ ഇഷ്ടം വേണ്ട എന്ന് വയ്ക്കുമ്പോൾ മറ്റു ചിലർ ഇഷ്ടപെട്ട മൃഗത്തെ ജീവിതത്തിൽ ഒരിക്കലെങ്കിലും സ്വന്തമാക്കുന്നു. പ്രത്യേകിച്ച് കുട്ടികൾക്കാണ് ഒരു മൃഗത്തെ ഓമനിച്ചു വളർത്താൻ ഏറെ താല്പര്യം ഉണ്ടാകുക. പക്ഷെ മിക്ക മാതാപിതാക്കളും കുട്ടികൾക്ക് പഠിത്തത്തോടുള്ള താല്പര്യം നഷ്ടപ്പെടുമോ, മുഴുവൻ സമയവും അതിനെ കളിപ്പിച്ചിരിക്കുമോ എന്ന ആവലാതിയിൽ വളർത്തുമൃഗങ്ങളെ വാങ്ങിക്കൊടുക്കാറില്ല.

ക്രിസ്റ്റഫർ ഡോയൽ എന്ന പിതാവിന്റെ മകളും ഇതേ ആവശ്യം ഉന്നയിച്ചു. പൂച്ചയേ ഓമനിച്ചു വളർത്താൻ വാങ്ങിത്തരണം എന്നാണ് ആവശ്യം. മറുപടി സ്വാഭാവികമായി പറ്റില്ല എന്നായിരുന്നു. എന്നും കരുതി തന്റെ ആഗ്രഹം പൂട്ടികെട്ടാനൊന്നും മകൾ തയ്യാറായില്ല. എന്തുകൊണ്ട് തനിക്ക് പിതാവ് ഒരു പൂച്ചയെ വാങ്ങിത്തരണം എന്നൊരു പവർ പോയിന്റ് പോയിന്റ് പ്രസന്റേഷൻ തന്നെ ക്രിസ്റ്റഫറിന്റെ മകൾ തയ്യാറാക്കി. ധാരാളം സ്ലൈഡുകളുമായി തന്റെ ആവശ്യം ന്യായമാണ് എന്ന് സാധൂകരിക്കും വിധമാണ് ക്രിസ്റ്റഫറിന്റെ മകൾ പ്രസന്റേഷൻ തയ്യാറാക്കിയത്.


ചാലക്കുടി ചന്തയ്ക്ക് പോകുമ്പോൾ...പാടുന്നത് 'അൽ മണി'

"ഞങ്ങളുടെ മകൾ ഒരു പവർപോയിന്റ് പ്രസന്റേഷൻ തയ്യാറാക്കി" എന്ന തലക്കെട്ടോടെ ക്രിസ്റ്റഫർ തന്നെയാണ് ട്വിറ്ററിൽ ചില സ്ലൈഡുകളുടെ ചിത്രങ്ങൾ പങ്കുവച്ചത്. പൂച്ചയെ വാങ്ങുന്നത് കൊണ്ടുള്ള ഗുണങ്ങൾ എന്ന തലകെട്ടുള്ള സ്ലൈഡിൽ കൊടുത്തിക്കുന്ന 6 പോയിന്റുകൾ തന്നെ ക്രിസ്റ്റഫറിന്റെ മകൾ ഒരു മിടുക്കിയാണ് എന്നുറപ്പിക്കുന്നു.

1. എന്റെ എല്ലാ സഹോദരങ്ങൾക്കും ഒരു പൂച്ചയെ വാങ്ങുന്ന കാര്യത്തിൽ സന്തോഷമേയുള്ളൂ
2. പൂച്ചയെ വളർത്തിയാൽ സമ്മർദം കുറയുകയും സന്തോഷത്തോടെ ഇരിക്കാൻ സാധിക്കുകയും ചെയ്യും.
3. പൂച്ചയതുകൊണ്ട് എല്ലാ ദിവസവും നടത്തിക്കാൻ കൊണ്ടുപോകേണ്ട കാര്യമില്ല.
4. പൂച്ചയുണ്ടെങ്കിൽ ഭയങ്കര രസം ആയിരിക്കും.
5. ഞാൻ പിന്നെയും പിന്നെയും പൂച്ചയെ വാങ്ങിത്തരണം എന്ന് പിന്നീട് പറയില്ല
6. പൂച്ചയേയും കാത്തിരിക്കുന്ന സ്ഥലവും വൃത്തിയാക്കുന്ന ചുമതല തൻ ഏറ്റെടുക്കാം

Also read: ഇതെന്താ! കേരള ബ്ലാസ്റ്റേഴ്‌സ് പൂച്ചയോ? അതോ ചെന്നൈ സൂപ്പർ കിങ്സിന്റെയോ?

മറ്റൊരു സ്ലൈഡിൽ താഴത്തെ നിലയിലുള്ള തന്റെ റൂമിൽ നിന്നും പൂച്ച ഒരു കാരണവശാലും മുകൾ നിലയിലേക്ക് കയറിവരില്ല എന്നും 5 വർഷം മുൻപ് വാങ്ങിത്തരാം എന്ന് പറഞ്ഞ ഹാംസ്റ്റെർ (ഇണക്കിവളർത്താവുന്ന എലിവർഗ്ഗത്തിൽ പെട്ട ഒരു ജീവി) ഇതുവരെയും തനിക്ക് കിട്ടിയിട്ടില്ല എന്നും മകൾ പവർ പോയിന്റ് പ്രസന്റേഷനിൽ വ്യക്തമാക്കിയിട്ടുണ്ട്. അതുകൊണ്ട് പൂച്ചയെ വാങ്ങിത്തരുന്നതിനെപ്പറ്റി പിതാവ് കാര്യമായി ചിന്തിക്കണം എന്ന അപേക്ഷയും ഒരു പൂച്ചയുടെ ചിത്രവും ചേർന്നതാണ് അവസാന സ്ലൈഡ്.

18,000-ൽ അധികം ലൈക്കുകളും നാലായിരത്തിലധികം റീട്വീറ്റുകളും നേടി വൈറൽ ആണ് ക്രിസ്റ്റഫർ ഡോയലിന്റെ ട്വീറ്റ്. കണ്ടവർ കണ്ടവർ ക്രിസ്ടഫറിനോട് ഒന്ന് മാത്രമാണ് ആവശ്യപ്പെടുന്നത്, എങ്ങിനെയും മകൾക്ക് പൂച്ചയെ വാങ്ങിക്കൊടുക്കണം എന്ന്.