ചന്ദ്രദോഷം പരിഹരിക്കാൻ മുത്ത്; അറിയേണ്ടതെല്ലാം...

ജാതകത്തിലെ ചന്ദ്രദോഷം പരിഹരിക്കാൻ മുത്ത് ധരിക്കുന്നത് ഉത്തമമാണെന്നാണ് വിശ്വാസം. എന്നാൽ ഇതിനായി ക‍ൃത്രിമ മുത്തുകൾ ഉപയോഗിക്കരുത്. മുത്തുകൾ തെരഞ്ഞെടുക്കുമ്പോഴും ചില കാര്യങ്ങൾ ശ്രദ്ധിക്കേണ്ടതുണ്ട്. മങ്ങിയ നിറമുള്ളതും കുഴിവും പൊട്ടലുമുള്ള മുത്തുകൾ പാടേ ഒഴിവാക്കുക. കാക്കപ്പുള്ളി, വളയങ്ങൾ മുതലായവ ഉള്ള മുത്തുകളും ധരിക്കുന്നത് വിപരീത ഫലങ്ങളുണ്ടാക്കാം. ഉത്തമമായ മുത്തുകൾ തെരഞ്ഞെടുക്കാനും ഒരു മാര്‍ഗ്ഗമുണ്ട്. നിറമില്ലാത്ത ഗ്ലാസിൽ വെള്ളം നിറച്ച് നല്ല മുത്ത് ഇടുമ്പോൾ പ്രകാശ രശ്മികൾ വരുന്നതു പോലെ തോന്നുകയാണെങ്കിൽ അത് ഉത്തമമായ മുത്താണ്. വെള്ളിമോതിരത്തിൽ മുത്ത് പിടിപ്പിച്ച് ഇടതു കൈയിലെ ചെറുവിരലിലോ മോതിര വിരലിലോ ആണ് അണിയേണ്ടത്.

അത്തം, തിരുവോണം, പൂയം എന്നീ നക്ഷത്രങ്ങൾ വരുന്ന ദിവസങ്ങളാണ് ഇതിനായി ഉത്തമം. തിങ്കളാഴ്ച, പൗർണമി ദിവസങ്ങളും ആദ്യമായി മുത്ത് ധരിക്കാൻ ഉത്തമമാണ്. ചിങ്ങം, ധനു, കുംഭം എന്നീ കൂറുകളിൽ ജനിച്ചവരും കഫദോഷം, ശ്വാസകോശരോഗങ്ങൾ, അമിതവണ്ണം എന്നിവയുള്ളവരും മുത്ത് ധരിക്കാതിരിക്കുന്നതാണ് ഉത്തമമെന്നാണ് വിശ്വാസം.