ഉത്തമ സന്താന ലബ്ധിക്ക് ജ്യോതിഷം നിർദ്ദേശിക്കുന്നത്

ജീവിതത്തിൽ അത്രമേൽ പ്രധാനമായ ദാമ്പത്യ ബന്ധം വിജയകരമായി മുന്നോട്ടു നയിക്കാൻ ഒരു സന്തതി വേണമെന്നാണ് പഴമക്കാര്‍ പറഞ്ഞു വെക്കുന്നത്. സന്തതി ഇല്ലാത്തതിനാലും ഉണ്ടായ സന്തതിയെ പറ്റി ഉള്ള ദുഃഖവും സന്താന ദു:ഖമാണ്. ഇതാണ് ജീവിതത്തിലെ ഏറ്റവും വലിയ ദുഃഖമെന്നും ഇക്കൂട്ടര്‍ പറഞ്ഞുവെക്കുന്നു. സന്താനം ഇല്ലാത്ത ദു:ഖത്തിന് ചില ജ്യോതിഷ വശങ്ങൾ കൂടയുണ്ടാകുമല്ലോ. അവയാണ് ഇവിടെ പ്രതിപാദിക്കുന്നത്.

വിവാഹ പൊരുത്തവുമായാണ് സന്തതിയോഗം ബന്ധപ്പെട്ടുകിടക്കുന്നത്. ജാതക പൊരുത്തം കണക്കാക്കുമ്പോൾ ഈ ദമ്പതിമാർക്ക് സന്താന ലാഭം ഉണ്ടാവുമോ എന്ന കാര്യവും ചിന്തിക്കാനാകും. സന്താനം ഉണ്ടാവാത്തതിന് ശാരീരിക കാരണങ്ങൾ, ജന്മാന്തര പാപങ്ങൾ എന്നീ രണ്ടു കാരണങ്ങളാണ് പ്രധാനമായും ബന്ധപ്പെട്ട് കിടക്കുന്നത്. ശാരീരിക ദോഷങ്ങൾക്ക് വൈദ്യനിര്‍ദ്ദേശവും മരുന്ന് സേവയും, പാപ ദോഷങ്ങൾക്ക് പ്രായശ്ചിത്തവും ആണ് പരിഹാരമായി നിര്‍ദ്ദേശിക്കുക. പ്രശ്ന ചിന്തയിലൂടെ പാപ ദോഷങ്ങൾ കണ്ടുപിടിക്കാനാകും.

ജ്യോതിഷ പ്രകാരം കന്നി ,വൃശ്ചികം,ഇടവം ,ചിങ്ങം എന്നീ രാശികൾ ലഗ്നമായാലും ചന്ദ്രലഗ്നം ആയാലും അവയ്ക്ക് ബലം ഇല്ലാതെ വന്നാലും, ഈ രാശികൾ അഞ്ചാം ഭാവം ആയി ബല ഹീനരായാലും അൽപ സന്താനം യോഗം അനുഭവിക്കേണ്ടി വരുമെന്ന് കണക്കാക്കാനാകും. അഞ്ചിൽ ചൊവ്വ നിന്നാൽ സന്തതിയ്ക്ക് അല്പായുസ്സായിരിക്കും എന്നു കാണുന്നു. അതേസമയം ഇതേ ചൊവ്വ ബലവാൻ ആയിരുന്നാൽ ഒരു സന്തതി അകാല മരണം അടയാൻ സാധ്യതയുള്ളതായി കാണാം. മറ്റു സന്താനങ്ങൾ ആയുസ്സ് കൂടിയേക്കും.

ചന്ദ്രൻ പതിനൊന്നിലും ലഗ്നത്തിൽ രണ്ടിലേറെ ഗ്രഹങ്ങളും വ്യാഴത്തിനു പാപ ഗ്രഹങ്ങൾ അഞ്ചിലും ശനി ലഗ്നത്തിലും കുജൻ പന്ത്രണ്ടിലും വ്യാഴം അഷ്ടമത്തിലും ആവുകയും അഞ്ചാം ഭാവം അൽപ പുത്ര രാശികൾ ആവുകയും ചെയ്താലും കാലം ചെല്ലുമ്പോൾ സന്താന ലബ്ധിയുണ്ടാകും.