പനങ്കുല പോലെ മുടി വളരാനും ജ്യോതിഷത്തിൽ മാര്‍ഗ്ഗമുണ്ട്

ഇടതൂര്‍ന്നതും കരുത്തുള്ളതുമായ നീണ്ട മുടി സ്ത്രീകളുടെ എക്കാലത്തെയും ആഗ്രഹമാണ്. മുടി വളർത്താൻ പല വഴികളും പരീക്ഷിച്ച് പരാജയപ്പെട്ടവര്‍ക്ക് ജ്യോതിഷം നിര്‍ദ്ദേശിക്കുന്ന ചില കാര്യങ്ങൾ ശ്രദ്ധിച്ചാൽ അത് സ്വന്തമാക്കാനാകും എന്നറിയാമോ.

മുടി നന്നായി വളരാൻ അനുകൂലമായ ദിവസങ്ങൾ നോക്കി മുടി മുറിച്ചാൽ മതിയെന്നാണ് ജ്യോതിശാസ്ത്രം അനുശാസിക്കുന്നത്. പൗർണ്ണമി ദിവസങ്ങളിൽ മുടി മുറിക്കുന്നത് മുടിയുടെ വളർച്ച പതിന്മടങ്ങ് വർദ്ധിപ്പിക്കാൻ സഹായിക്കുമെന്ന് ജ്യോതിഷം പറയുന്നു. പണ്ടുകാലങ്ങളിൽ മുടി മുറിക്കുന്നതുമായി ബന്ധപ്പെട്ടുള്ള ഒരു ചാന്ദ്രകലണ്ടർ ഉണ്ടായിരുന്നത്രേ. ഇത് പ്രകാരം മാസത്തിൽ ഒരു തവണയെങ്കിലും മുടി മുറിക്കണമെന്നാണ് അനുശാസിക്കുന്നത്.

അഗ്രങ്ങൾ പിളർന്നതും വരണ്ടതും വളർച്ച മുരടിച്ചതുമായ മുടിയിഴകൾ ഇതുമൂലംവഴി കരുത്തരാകും. പൗർണ്ണമി ദിനങ്ങളിൽ ആണ് മുടി മുറിക്കുന്നത് എങ്കിൽ മുടിയുടെ വളർച്ച സാധാരണയെ അപേക്ഷിച്ച് ഇരട്ടിയായിരിക്കുമെന്നും ചാന്ദ്രകലണ്ടറിൽ പറയുന്നു.. ചന്ദ്രൻ ആകാശത്തുള്ള ദിവസങ്ങളിൽ മുടി മുറിക്കുന്നത് മുടിയുടെ വേരുകളെ ബലപ്പെടുത്തി, ശക്തമായ മുടി വളരാൻ ഏറെ ഗുണം ചെയ്യും.

ചന്ദ്രന്‍റെ ഭ്രമണത്തിന് അനുസൃതമായി മുടി മുറിക്കുമ്പോൾ, പുതിയ വളർച്ച ആരംഭിക്കുകയും ഓരോ രോമകൂപങ്ങളിലും മുടിയിഴകൾ വളരുകയും ചെയ്യും. മുടിയുടെ വേരുകളെ ബലപ്പെടുത്തുക എന്നതാണ് മുടിയുടെ വളർച്ചയെ വർദ്ധിപ്പിക്കാൻ ഏകമാർഗ്ഗം. പൗർണമിയുടെ തൊട്ടടുത്ത ദിവസങ്ങളിൽ മുടി മുറിക്കുന്നതിലും തെറ്റില്ല. പക്ഷേ അന്ന് വളരെ കുറച്ച് മുടി മാത്രമേ വെട്ടാവൂ എന്നത് പ്രത്യേകം ശ്രദ്ധിക്കണം. എല്ലാ മാസവും മുടി വെട്ടാൻ കഴിഞ്ഞില്ലെങ്കിൽ കുറഞ്ഞത് മൂന്നു മാസത്തിൽ ഒരിക്കലെങ്കിലും മുടി മുറിക്കണം. ഇത് മുടിയുടെ വളർച്ച വർദ്ധിപ്പിക്കും.