വിഷുക്കണി ഒരുക്കേണ്ടത് ഇങ്ങനെയാണ്...!

വിഷുദിനത്തിൽ നിലവിളക്കിന്‍റെ സ്വർണവെളിച്ചത്തിൽ ഉണ്ണിക്കണ്ണനെയും ധനവും ധാന്യങ്ങളും ഫലങ്ങളും കണികണ്ടുണരുമ്പോൾ ഐശ്വര്യപൂർണ്ണമായ ജീവിതകാലഘട്ടമാണ് നാമോരോരുത്തർക്കും ലഭിക്കുക. വിഷുകണിയൊരുക്കുന്നതിന് ആവശ്യമുള്ള ഓട്ട് നിർമ്മിതമായ ഉരുളി, നിലവിളക്ക്, കിണ്ടി, താലം എന്നിവ റെഡിയാണോ? ഫലവർഗ്ഗങ്ങളോ? അവ ഓട്ടുരുളിയിൽ വയ്ക്കുന്നതിന് പ്രത്യേക സ്ഥാനങ്ങളുണ്ടെന്നറിയാമോ? അവ ആർക്കൊക്കെ സങ്കൽപ്പമാക്കിയാണ് വെയ്ക്കുന്നതെന്നും അറിഞ്ഞിരിക്കൂ.

വിഷു തലേന്ന് കുടുംബനാഥയോ മുതിർന്നവരോ മാത്രമേ കണിയൊരുക്കാൻ പാടുള്ളൂ. കണിയൊരുക്കുന്നതിന് ആവശ്യമുള്ള ഓട്ടുരുളി ,നിലവിളക്ക് ,ഓട്ടുകിണ്ടി ,ഓട്ടുതാലം എന്നിവ മുൻപ് തന്നെ വൃത്തിയായി കഴുകി വയ്ക്കണം. കണ്ണന്‍റെ വിഗ്രഹമോ ചിത്രമോ വെച്ച് അതിന് മുന്നിലാണ് കണിയൊരുക്കേണ്ടത് .അതിൽ വീട്ടുമുറ്റത്തുള്ള പൂക്കൾ കൊണ്ട് മാല കോർത്തിടാവുന്നതാണ്.



ഓട്ടുരുളി പ്രപഞ്ചത്തിന്‍രെ പ്രതീകമായാണ് കണക്കാക്കുന്നത്. അതിൽ ഉണക്കലരി പകുതിയോളം നിറച്ച ശേഷം ആദ്യം സ്വർണ്ണനിറത്തിലുള്ള കണിവെള്ളരി വയ്ക്കണം . പിന്നീട് ഗണപതിയുടെ ഇഷ്ടഭക്ഷണമായ ചക്കയും പൊതിച്ച നാളികേരവും മാങ്ങയും കദളിപ്പഴവും നാരങ്ങയും നെല്ലിക്കയും വെയ്ക്കുക. മാങ്ങ സുബ്രഹ്മണ്യന് വേണ്ടിയും ഉണ്ണിക്കണ്ണന് വേണ്ടി കദളിപ്പഴവും കരുതുന്നു. ലക്ഷ്മീ ദേവി സങ്കൽപ്പത്തിലാണ് നാരങ്ങയും നെല്ലിക്കയും വയ്ക്കുന്നത്.

ഓട്ടുരുളിയുടെ നടുക്കായി ശ്രീഭഗവതിയെ സങ്കൽപ്പിച്ചു വാൽക്കണ്ണാടി വയ്ക്കുക .അതിൽ സ്വർണ്ണമാല ചാർത്തി കണിക്കൊന്നപ്പൂക്കൾ വയ്ക്കണം . കണിവെള്ളരി മഹാവിഷ്ണുവിന്‍റെ മുഖമായും കൊന്നപ്പൂക്കൾ കിരീടമായും വാൽക്കണ്ണാടി മനസ്സുമാണെന്നാണ് സങ്കൽപ്പിക്കുന്നത്. ഇതിന്‍റെ തൊട്ടടുത്തായി ഓട്ടുതാലത്തിൽ അലക്കിയ കസവുമുണ്ടും ഗ്രന്ഥവും കുങ്കുമച്ചെപ്പും കണ്മഷിയും വെറ്റിലയിൽ നാണയത്തുട്ടും പാക്കും നവധാന്യങ്ങളും വയ്ക്കണം.



നിലവിളക്ക് പീഠത്തിന്മേൽ വച്ചു എണ്ണയൊഴിച്ചു അഞ്ചു തിരിയിട്ടു വെച്ച് മുന്നിലായി സാമ്പ്രാണിയും ഓട്ടുകിണ്ടിയിൽ ശുദ്ധജലവും കരുതുക. കൂടാതെ പൂക്കൾ ,കൊടിവിളക്ക് എന്നിവ അതിരാവിലെ തെളിയ്ക്കാൻ പാകത്തിന് ഒരുക്കി വയ്ക്കുക.