ബ്രഹ്മരക്ഷസിനെ അടുത്തറിയാം

'രക്ഷസ്' എന്ന് കേള്‍ക്കുമ്പോള്‍ പേടിക്കേണ്ടതായുള്ള ആരുമല്ല എന്നതാണ് നാം ആദ്യം മനസിലാക്കേണ്ടത്. എന്നാല്‍ ശാസ്ത്രീയമായി പറയുമ്പോള്‍ പുരാണങ്ങളില്‍ പറഞ്ഞിരിക്കുന്ന ഉപദേവതാഗണമാണ്‌ രക്ഷസ്. ഇവരെ രക്ഷസമ്മാരുടെ ഗണത്തിലാണ് പുരാണങ്ങളില്‍ വര്‍ണ്ണിച്ചിട്ടുള്ളത്. "യക്ഷോ രക്ഷോ ഗന്ധര്‍വ കിന്നര . പിശാചോ ഗുഹ്യക . സിദ്ധോ ഭൂത്മി ദേവ നയോനയ" എന്നിങ്ങനെ ഉപദേവതകളെ അമരകോശത്തില്‍ ഗണിചിരിക്കുന്നു. കശ്യപ പ്രജാപതിക്ക്‌ ദക്ഷ പുത്രിയായ മുനിയില്‍ ജനിച്ചവരാണ് രക്ഷസുകളെന്നാണ് മഹാഭാരതത്തില്‍ പറഞ്ഞിരിക്കുന്നത്.

അഗ്നിപുരാണം 19ാo അദ്ധ്യായത്തില്‍ കശ്യപ പ്രജാപതിക്ക്‌ മുനിയെന്ന ഭാര്യയില്‍ യക്ഷന്മാരും രക്ഷസുകളും ജനിച്ചതായാണ് കാണുന്നത്. ശബ്ദതാരാവലിയില്‍ അസ് എന്ന വാക്കിന് അറിയുക, ജീവിക്കുക, ഭവിക്കുക, എന്നൊക്കെയാണ് അര്‍ത്ഥങ്ങൾ. അതായത് രക്ഷസ് എന്നാല്‍ രക്ഷ കൊടുക്കുന്ന മൂര്‍ത്തി എന്നര്‍ത്ഥം.

കേരളത്തില്‍ രക്ഷസ് എന്ന സങ്കല്പം അപമൃത്യു സംഭവിച്ചിട്ടുള്ളവരുടെ ആത്മാക്കളാണെന്നതാണ് പരക്കെയുള്ള വിശ്വാസം. ബ്രാഹ്മണര്‍ അപമൃത്യുപ്പെട്ടാല്‍ ബ്രഹ്മരക്ഷസുകളാകുന്നുവെന്ന് വിശ്വാസം. തന്ത്രമന്ത്ര വിദ്യാപാണ്ഡിത്യമുള്ള കാര്‍മ്മികരായശേഷം ബ്രാഹ്മണ കുടുംബങ്ങളാണ് രക്ഷസിനെ സംബന്ധിച്ചുള്ള അനുഷ്ടാന പൂജാ കര്‍മ്മങ്ങള്‍ പരമ്പരാഗതമായി കേരളത്തില്‍ ചെയ്തുവരുന്നത്. പൂര്‍വ്വ പാപം, ജന്മാന്തര ദുരിതങ്ങള്‍, ഗ്രഹപ്പിഴകള്‍, മുജ്ജന്മ പാപങ്ങള്‍ എന്നിവയ്ക്ക് പരിഹാരം രക്ഷസ്, സര്‍പ്പം ഇവകളെ തൃപ്തിപ്പെടുത്തുകയാണ്. ഇതുമൂലം കുടുംബത്തില്‍ ഉണ്ടാകുന്ന തീരാ ദുരിതങ്ങള്‍, ഗ്രഹപ്പിഴകള്‍, രോഗങ്ങള്‍, ശാപങ്ങള്‍, എന്നിവ മാറി ഐശ്വര്യം, ക്ഷേമം ഇവ കൈവരുന്നു.

രക്ഷസിന്‍റെ പ്രതിഷ്ഠ ശിവലിംഗരൂപത്തിലും വാല്‍ക്കണ്ണാടി ആകൃതിയിലുമാണ്. കരിങ്കല്‍ ശിലയില്‍ പ്രതിഷ്ഠകള്‍ നടത്താറുണ്ട്. രക്ഷസ് വിഷ്ണുവുമായി ബന്ധിക്കപ്പെട്ടിട്ടുള്ള ചൈതന്യമാണ്. അതായത് രക്ഷസിനെ നാം കാണുന്നത് അസുരശക്തിയായോ, ദുഷ്ടമൂര്‍ത്തിയായോ അല്ല. മറിച്ച് ഒരു വൈഷ്ണവശക്തിയായിട്ടാണ്. കുടുംബത്തിന്‍റെ ഉന്നതിയില്‍ താത്പര്യമുള്ള ശക്തിയെന്ന രീതിയില്‍ നാമെല്ലാം രക്ഷസിനെ ഭക്തിപൂര്‍വ്വം ബഹുമാനിക്കുകയും ആദരിക്കുകയും ചെയ്യുന്നു.

രക്ഷസിന് പ്രധാനപ്പെട്ട ദിവസങ്ങള്‍ വ്യാഴാഴ്ച, വെളുത്തവാവ് (പൗര്‍ണ്ണമി), കറുത്തവാവ് എന്നീ ദിവസങ്ങളാണ്. പാല്‍പ്പായസ നിവേദ്യമല്ലാതെ മറ്റു പൂജകളോ, വഴിപാടുകളോ ഇല്ല.

വിവരങ്ങൾക്ക് കടപ്പാട്: ജ്യോതിഷം / ഭാരതീയ ശാസ്ത്രങ്ങള്‍ | ഫേസ്ബുക്ക് പേജ്