ആറ്റുകാൽ പൊങ്കാലയിടുമ്പോൾ ജപിക്കേണ്ട മന്ത്രങ്ങൾ

അനന്തപുരിയുടെ ഉത്സവമായ ആറ്റുകാൽ പൊങ്കാല മാര്‍ച്ച് രണ്ടാം തീയതി വെള്ളിയാഴ്ച നടക്കുകയാണ്. പൊങ്കാലയിടുന്നവര്‍ ശ്രദ്ധിക്കേണ്ട പ്രധാനമായ ചില കാര്യങ്ങൾ മുൻപ് ചില ജ്യോതിഷ ലേഖനങ്ങളിലൂടെ സൂചിപ്പിച്ചിരുന്നു. ആറ്റുകാൽ പൊങ്കാലയിടുമ്പോൾ ജപിക്കേണ്ട മന്ത്രങ്ങളെ പറ്റിയാണ് ഇന്ന് പ്രതിപാദിക്കുന്നത്.

പൊങ്കാല സമയത്ത് ലളിതാസഹസ്രനാമത്തിലെ നാല് നാമങ്ങൾ ജപിച്ചു കൊണ്ടേയിരിക്കുന്നത് ഉത്തമമാണ്. ലളിതാസഹസ്രനാമത്തിലെ 428–ാമത്തെ നാമമായ പഞ്ചകോശാന്തരസ്ഥി തായെ നമഃ എന്നത് സൂചിപ്പിക്കുന്നത് ശരീരത്തിൽ അന്നമയം, പ്രാണമയം, മനോമയം, വിജ്ഞാനമയം, ആനന്ദമയം എന്നീ 5 കോശങ്ങൾക്കുള്ളിൽ ദേവീശക്തിയായ പരമാത്മാവ് കുടികൊള്ളുകയാണ് എന്നതാണ്. ശരീരമായ ശ്രീചക്രത്തിലും 5 കോശങ്ങളുണ്ടെന്നറിയുക. ഭൂമണ്ഡലത്തെ സൂചിപ്പിക്കുന്നതോ പ്രതിപാദിക്കുന്നതോ ആയ അന്നമയ കോശം, സ്തൂലാവസ്ഥയിലും ആകാശതത്വത്തെ സൂചിപ്പിക്കുന്ന ആനന്ദമയ കോശം എന്നീ കോശങ്ങൾ സൂക്ഷ്മാവസ്ഥയിലും സദാ പ്രവർത്തന സജ്ജമാണ്.

അത്യന്തം ശാസ്ത്രീയമായ സിദ്ധാന്തത്തെയാണ് പൊങ്കാല സമർപ്പണമായി ദേവിക്ക് നൽകുന്നത്. ഈ അവസ്ഥയിൽ പഞ്ചകോശങ്ങൾ പുണ്യാത്മാക്കളുടെ ശരീരത്തിൽ നിലനിർത്തപ്പെടുന്നു. ലളിതാസഹസ്രനാമത്തിലെ 480–ാം നാമമായ പായസാന്നപ്രിയായെ നമഃ എന്നത്, ദേവി ദേവന്മാർക്ക് വളരെ ഇഷ്ടമായ പായസം ദേവിക്ക് സമര്‍പ്പിക്കുന്നു എന്നര്‍ഥമാക്കുന്നു. കൂടാതെ ലളിതാസഹസ്രനാമത്തിലെ 501–ാം നാമവും സര്‍വ്വമംഗളമംഗല്ല്യേ എന്നതും പൊങ്കാല സമര്‍പ്പണവേളയിൽ പലവുരു ജപിക്കേണ്ടതാണ്. ദേവി പ്രസീദേ ദേവി പ്രസീദേ എന്ന നാമം ചൊല്ലി വേണം പൊങ്കാല സമർപ്പിക്കുവാൻ.