ജാതകത്തിൽ ചൊവ്വാദോഷം പലപ്പോഴും വില്ലനാകുന്നോ?

ജാതകത്തിൽ ചൊവ്വാദോഷം പലപ്പോഴും വില്ലനാകുന്നോ?. അതിന്‍റെ കാരണം എന്താണെന്ന് ആലോചിച്ചിട്ടുണ്ടോ. ജാതകത്തില്‍ ഏഴിലോ എട്ടിലോ ഉള്ള ചൊവ്വ ആണെങ്കില്‍ കൂടുതൽ കരുത്തനാണെന്നാണ് പറയപ്പെടുന്നത്. വിവാഹ വിഷയത്തില്‍ പാപസാമ്യം ചിന്തിക്കുമ്പോള്‍ ചൊവ്വദോഷം പ്രധാനമായി കണക്കിലെടുക്കണമെന്നു ശാസ്ത്രം പറയുന്നു. ആഗ്‌നേയ ഗ്രഹമായ ചൊവ്വയെ പാപഗ്രഹമായാണു ജ്യോതിഷം പറയുന്നത്. ഇങ്ങനെ പാപിയും ആഗ്‌നേയനുമായ ഒരു ഗ്രഹം വിവാഹ സ്ഥാനത്ത് വന്നാല്‍ അതു ഭാര്യാ ഭര്‍ത്താക്കന്മാരില്‍ ഒരാള്‍ക്കെങ്കിലും മരണമുണ്ടാക്കുമെന്ന പ്രചരണമാണ് ചൊവ്വാദോഷത്തെ ഇത്രത്തോളം പേടിക്കുന്നതിനുള്ള കാരണം. വിവാഹചിന്തയില്‍ തടസങ്ങള്‍ ഉണ്ടാക്കുന്ന ഒന്നാണ് ചൊവ്വയെന്നാണ് വിശ്വാസം. അതുകൊണ്ടുതന്നെയാണ് ചൊവ്വ ഇത്ര പ്രശ്‌നക്കാരായി മാറിയത്. ചൊവ്വാ ദോഷം അഥവാ അഥവാ കുജദോഷം എന്നാൽ എന്താണ്?

7, 8 ഭാവങ്ങളിലും 1,2,4,12 ഭാവങ്ങളിലും ചൊവ്വ ദോഷകാരകനായി നിലകൊള്ളുന്നു. വിവാഹ വിഷയത്തില്‍ ലഗ്‌നാലും ചന്ദ്രാലും ശുക്രാലും ദോഷം ചിന്തിക്കണം. പുരുഷ ജാതകത്തില്‍ ഏഴിലെ ചൊവ്വ ഭാര്യാ നാശകനും സ്ത്രീ ജാതകത്തില്‍ എട്ടിലെ ചൊവ്വ ഭര്‍തൃനാശകനും ആയി കരുതപ്പെടുന്നു. ശുഭഗ്രഹ ദൃഷ്ടി (പ്രധാനമായും വ്യാഴത്തിന്‍റെ ദൃഷ്ടി), ഗ്രഹയോഗം, ചൊവ്വ നില്‍ക്കുന്ന രാശി, രാശ്യാധിപന്‍റെ അവസ്ഥ തുടങ്ങിയ പല ഘടകങ്ങളും ചിന്തിച്ചു വേണം കുജദോഷം തീരുമാനിക്കേണ്ടത്. പാപത്വമുള്ള ചൊവ്വയാണു പങ്കാളിയുടെ മരണകാരകനാകുന്നത്.

ചൊവ്വയുടെ സ്ഥാനവും ഫലങ്ങളും

ഒന്ന്: ചെറിയ കാരണങ്ങള്‍ക്കു പോലും ദേഷ്യം, മത്സര സ്വഭാവം, താന്‍പോരിമ, അധികാരം അടിച്ചേല്‍പ്പിക്കല്‍ എന്നിവയുണ്ടാകും.

രണ്ട്: സൗഹൃദമില്ലാത്ത സംസാരം, പിശുക്ക്, ധനത്തെ ചൊല്ലി വാക്കേറ്റം

നാല്: തൊഴില്‍ സംബന്ധമായി അടിക്കടിയുള്ള മാറ്റം, തര്‍ക്കങ്ങള്‍, കുടുംബ അസ്വസ്ഥതകള്‍

ഏഴ്: ഭാര്യക്ക് രോഗം, ഭാര്യയുമായി ചേര്‍ച്ചയില്ലായമ , ഭാര്യാ മരണം എന്നിവ ഉറപ്പ്.

ഒന്‍പത്: ദുരിതം. ഭര്‍തൃ മരണം, ഭര്‍ത്താവിനു രോഗം, കുടുംബ അസ്വസ്ഥത, അപകടങ്ങള്‍

പന്ത്രണ്ട്: ധന നഷ്ടം, അടിച്ചമര്‍ത്തപ്പെടല്‍, അനാവശ്യ വഴക്കുകള്‍, കുടുംബ സ്വസ്ഥതക്കുറവ്

ഭാര്യാമരണ ദോഷമുള്ള പുരുഷ ജാതകം ഭര്‍തൃ മരണ ദോഷമുള്ള സ്ത്രീ ജാതകവുമായി ചേര്‍ത്താൽ ദോഷങ്ങള്‍ പരസ്പരം ഇല്ലാതാകുന്നെന്നാണ് വിദഗ്ധര്‍ ചൂണ്ടിക്കാട്ടുന്നത്. എട്ടില്‍ കുജ ദോഷമുള്ള സ്ത്രീ ജാതകത്തിന് എഴില്‍ ദോഷമുള്ള പുരുഷ ജാതകം ചേര്‍ക്കപ്പെടാവുന്നതാണ്. കുജന്‍ 4, 7, എന്നീ ഭാവങ്ങളില്‍ ആണെങ്കിലും സ്വക്ഷേത്ര രാശികളിലോ ഉച്ചനീച്ചരാശികളിലോ ആണു നില്‍ക്കുന്നതെങ്കില്‍ ചൊവ്വാദോഷം ഉണ്ടാകുന്നതല്ല. ആ ഭാവങ്ങളിലുള്ള നീചനായ കുജന്‍ ഒഴിച്ചുള്ളവ പൂര്‍ണ്ണ നന്മയെ പ്രദാനം ചെയ്യുകയും ചെയ്യും.

ചൊവ്വ സ്ഥാനം മാറിയാല്‍ ശുഭനായും മാറുമെന്ന് അറിയുക. കര്‍ക്കടകം രാശിയില്‍ കുജ ദോഷത്തിന്‍റെ തീവ്രത കുറയും. അതേസമയം തന്നെ ഏഴാം ഭാവത്തിലും എട്ടാം ഭാവത്തിലും ഉച്ചസ്ഥനായോ സ്വക്ഷേത്രസ്ഥിതനായോ പാപഗ്രഹങ്ങള്‍ നിന്നാല്‍ ദമ്പതികള്‍ക്ക് ഐശ്വര്യവും ദീര്‍ഘ മാംഗല്യവും സല്‍സന്താന ഭാഗ്യവും കൈവരും.