നാഡീ ജ്യോതിഷത്തിന്‍റെ സത്യാവസ്ഥ എന്തെന്നറിയേണ്ടേ?

ഏറെ പേരുടെ വിശ്വാസം ആർജിച്ചുകഴിഞ്ഞ ജ്യോതിഷശാഖയാണ് നാഡീ ജ്യോതിഷം. അഗസ്ത്യമുനിയാണ് നാഡീ ജ്യോതിഷത്തിന്‍റെ ആചാര്യൻ. ഓരോ വ്യക്തിയുടെയും ജീവിതഫലങ്ങളെല്ലാം കുറിച്ചു വെച്ചിട്ടുള്ള ഓല നോക്കി ഭൂതവും വർത്തമാനവും ഭാവിയും പറയുന്ന വിധമാണിത്. തമിഴ്നാട്ടിൽ തഞ്ചാവൂരിനടുത്ത് വൈത്തീശ്വരൻ കോവിലിനു പരിസരമാണ് നാഡീ ജ്യോതിഷക്കാരുടെ പ്രധാന തട്ടകം. തമിഴ്നാട്ടിൽ പലയിടങ്ങളിലും കേരളം ഉൾപ്പെടെയുള്ള ദക്ഷിണേന്ത്യൻ സംസ്ഥാനങ്ങളിലും ഉത്തരേന്ത്യയിലും ഇത്തരക്കാര്‍ ഏറെ ഉണ്ട്. യുക്തിബോധത്തെക്കാൾ ഉപരി വിശ്വാസമാണു പലപ്പോഴും പല വ്യക്തികളെയും നാഡീ ജ്യോതിഷത്തിലേക്കു നയിക്കുന്നത് എന്നതിനാൽ തന്നെ നാഡീ ജ്യോതിഷം കേരളീയ പാരമ്പര്യ ജ്യോതിഷത്തിൽ നിന്നു തികച്ചും വേറിട്ടു നിൽക്കുന്നു. ചന്ദ്രേട്ടൻ എവിടെയാ എന്ന മലയാള ചിത്രത്തിലൂടെയാണ് മലയാളികൾക്ക് നാഡീ ജ്യോതിഷത്തെ അടുത്തറിയാൻ സാധിച്ചത്.

ഇതുമായ ബന്ധപ്പെട്ട ഗ്രന്ഥങ്ങൾ തമിഴ് വട്ടെഴുത്തിലാണ് രചിച്ചിട്ടുള്ളത്. ഓരോ രാശിക്കും 150 നാഡികളുണ്ട്. ഇങ്ങനെ 12 രാശിക്ക് 1800 നാഡികളുമാണുള്ളത്. ഓരോ നാഡിക്കും പ്രത്യേക പേരുകളുണ്ട്. രാശികൾ ചരം, സ്ഥിരം, ഉഭയം എന്നിങ്ങനെ മൂന്നു തരത്തിലുണ്ട്. ഇതിൽ ചരരാശികൾക്കെല്ലാം നാഡികളുടെ പേര് ഒന്നാണ്. എന്നാൽ ഇത് സ്ഥിരരാശിയിലെയും ഉഭയരാശികളിലെയും നാഡികളിലേതിൽ നിന്നു വ്യത്യസ്തമാണ്. അതുപോലെ സ്ഥിരരാശിയിലെയും ഉഭയരാശിയിലെയും നാഡികളും. പന്ത്രണ്ടു രാശികളിലെയും എല്ലാ നാഡികളുടെയും ഭൂത, വർത്തമാന, ഭാവിഫലങ്ങൾ അഗസ്ത്യമഹർഷിയാൽ രചിക്കപ്പെട്ട് ഓലകളിൽ കുറിച്ചുവച്ചിരിക്കുകയാണ്.

ഫലം അറിയാൻ ആഗ്രഹിക്കുന്ന വ്യക്തിയുടെ യഥാർഥ ഓല കണ്ടെത്തിക്കഴിഞ്ഞാൽ അതിൽ ആ വ്യക്തിയുടെ എല്ലാ വിവരങ്ങളും ഉണ്ടായിരിക്കും. നാഡീ ജ്യോതിഷവുമായി ബന്ധപ്പെട്ട് സംസ്കൃതത്തിലും തമിഴിലും ധാരാളം ഗ്രന്ഥങ്ങൾ ഉണ്ട്. ബൃഹത് പരാശരഹോരയും ഭൃഗുസംഹിതയുമൊക്കെ ഇതുസംബന്ധിച്ച പുരാണഗ്രന്ഥങ്ങളിൽ ചിലതാണ്. കൂടാതെ, ഗുരുനാഡി, ശുക്രനാഡി തുടങ്ങി ഗ്രഹങ്ങളുടെ പേരുമായി ചേർത്ത് അറിയപ്പെടുന്ന പുരാതന നാഡീഗ്രന്ഥങ്ങളും നിലവിലുണ്ട്. ഇപ്പോൾ തഞ്ചാവൂരിലും പരിസരങ്ങളിലുമുള്ളവർ ഉപയോഗിക്കുന്നത് അഗസ്ത്യ മഹർഷി രചിച്ചത് എന്നു കരുതുന്ന പുരാതന ഗ്രന്ഥങ്ങളുടെ പകർപ്പുകളാണ്.