നവരാത്രി മാഹാത്മ്യം: എട്ടാം ദിനം മഹാഗൗരിയകറ്റും സകലപാപവും

നവരാത്രി ആചരിക്കുന്ന ഒൻപത് ദിവസങ്ങളിലും ദേവിയുടെ പലഭാവങ്ങളെയാണ് ആരാധിക്കേണ്ടത്. നവരാത്രിയുടെ എട്ടാം ദിനമായ ഇന്ന് ആരാധിക്കേണ്ട ദേവി മഹാഗൗരിയാണ്. അഷ്ടമി തിഥിയിൽ ദേവിയെ ആരാധിച്ചാൽ സകലപാപവും അകന്നുപോകുമെന്നാണ് വിശ്വാസം. പർവത പുത്രിയാണ് മഹാഗൗരി, ഗിരിയുടെ പുത്രി തൂവെള്ള ശോഭയോടുകൂടിയവളാണ്. ആടയാഭരണങ്ങളടക്കം ശുഭ്ര വര്‍ണമാണ്.

ചതുർഭുജങ്ങളിൽ ത്രിശൂലം, അഭയമുദ്ര, ഡമരു, വരദമുദ്ര എന്നിവ പിടിച്ചിരിക്കുന്നു. ശുഭ്രവര്‍ണത്തിലുള്ള കാളയാണ് ദേവിയുടെ വാഹനം. മഹാദുര്‍ഗ്ഗാഷ്ടമിയിൽ വ്രതമെടുത്തു ദേവിയെ ഭജിച്ചാല്‍ ജീവിതം ഐശ്വര്യപൂർണമാകുമെന്നാണ് വിശ്വാസം. മഹാഗൗരി രാഹുവിൻ്റെ ദേവതയാണ്. അതിനാൽ തന്നെ രാഹുദോഷക്കാർ ദേവിയെ ആരാധിക്കുന്നത് ദോഷപരിഹാരത്തിന് ഉത്തമമാണ്.