വീടിന് സമീപം ക്ഷേത്രങ്ങളുണ്ടോ ..ഇക്കാര്യങ്ങള്‍ അറി‍ഞ്ഞിരിക്കണം

വാസ്തുശാസ്ത്ര പ്രകാരം ഗൃഹനിർമ്മാണവും വീടിനു സമീപത്തുളള ആരാധനാലയങ്ങളും തമ്മില്‍ ചെറുതല്ലാത്ത ബന്ധമുണ്ട്. ദേവാലയത്തിനു സമീപം ഗൃഹനിർമ്മാണം നടത്തുമ്പോൾ ദേവസ്ഥാനത്തിന് ദോഷമുണ്ടാകാതെ നോക്കുവാനുള്ള ബാധ്യത ഗൃഹവാസികൾക്കാണ്.

ദേവീദേവന്മാർക്ക് ഹിതകരമല്ലാത്ത തെറ്റുകൾ ഗൃഹനിർമ്മാണവേളയിൽ സംഭവിക്കുമ്പോഴാണ് ആ ദോഷങ്ങളുടെ ഫലങ്ങൾ ഗൃഹവാസികൾ അനുഭവിക്കേണ്ടി വരുന്നതെന്നാണ് പറയാറ്. ദേവീദേവന്മാരെ ഉഗ്രമൂർത്തികൾ എന്നും, സൗമ്യമൂർത്തികൾ എന്നും രണ്ട് ഗണത്തിൽ പെടുത്തിയിരിക്കുന്നു. മഹാവിഷ്ണു ദുർഗ്ഗ തുടങ്ങിയവർ സൗമ്യമൂർത്തികളും, ശിവൻ, നരസിംഹം, ഭദ്രകാളി തുടങ്ങിയ ദേവീദേവന്മാർ ഉഗ്രമൂർത്തികളുമാണ്.

ഉഗ്രമൂർത്തികള്‍ ക്ഷിപ്രപ്രസാദികളും, ക്ഷിപ്രകോപികളുമാണ്. സൗമ്യമൂർത്തിയുടെ ക്ഷേത്രത്തിന്റെ ഭൂമിയുടെ ഇടതുഭാഗത്തും, പിൻഭാഗത്തും വീട് പണിതാൽ അനർത്ഥങ്ങൾ ഉണ്ടാകുവാൻ സാധ്യതയുണ്ട്. എന്നാല്‍ സൗമ്യമൂർത്തിയുടെ ക്ഷേത്രത്തിന്റെ മുൻഭാഗത്തും, വലതുഭാഗത്തും ഗൃഹം പണിതാൽ ദോഷങ്ങൾ ഒന്നും ഉണ്ടാകുകയില്ല. ഉഗ്രമൂർത്തിയുടെ ക്ഷേത്രത്തിന്റെ വലതുഭാഗത്തും, മുൻഭാഗത്തുമുള്ള ഭൂമിയിലെ ഗൃഹനിർമ്മാണം അനർത്ഥങ്ങൾ കൊണ്ടുവരുമെന്നും പറയുന്നു

ദേവാലയങ്ങളെക്കാൾ ഉയരത്തിൽ ദേവാലയത്തിന് അടുത്തുള്ള ഗൃഹനിർമ്മാണം ദോഷകരമാകുമെന്നും വാസ്തുശാസ്ത്രം സൂചിപ്പിക്കുന്നുണ്ട്. ഗൃഹനിർമ്മാണം നടത്തി താമസിക്കുന്നവർ ദോഷസൂചനകൾ ഉണ്ടെങ്കിൽ പരിഹാരം തേടാവുന്നതാണ്.