എന്താണു ജ്യോതിഷം? നിങ്ങള്‍ ഉറപ്പായും അറിയേണ്ടത്

ജ്യോതിഷത്തിലുള്ള വിശ്വാസത്തിനു ഏറെ പഴക്കമുണ്ട്. ഏകദേശം നാലായിരം വർഷം മുമ്പ് സൂര്യന്‍റെയും ചന്ദ്രന്‍റെയും, ഏറ്റവും വ്യക്തമായി കാണപ്പെട്ട അഞ്ചു ഗ്രഹങ്ങളുടെയും സ്ഥാനങ്ങൾ അടിസ്ഥാനമാക്കി ബാബിലോന്യർ ഭാവി പ്രവചിക്കാൻ തുടങ്ങിയിരുന്നു. മനുഷ്യരിൽ സ്വാധീനം ചെലുത്തുന്ന ഈ ആകാശഗോളങ്ങൾ അവരുടെ സ്വഭാവത്തെ നിയന്ത്രിക്കുന്നുവെന്ന് അവർ അവകാശപ്പെട്ടു. പിൽക്കാലത്ത്‌ അവർ തങ്ങളുടെ ഭാവികഥനത്തിൽ രാശിചക്രചിഹ്നങ്ങളും ഉൾപ്പെടുത്തി.

ദ വേൾഡ്‌ ബുക്ക് എൻസൈക്ലോപീഡിയ പ്രകാരം ഒരു വ്യക്തിയുടെ പ്രത്യേക സ്വഭാവമോ ഭാവിയോ വെളിപ്പെടുത്താൻ കഴിയുന്ന രൂപമാതൃകകളിൽ ആകാശഗോളങ്ങൾ വിന്യസിക്കപ്പെടുന്നുവെന്ന വിശ്വാസത്തിൽ അധിഷ്‌ഠിതമാണ്‌ ജ്യോതിഷം. ഒരു വ്യക്തിയുടെ ജനനസമയത്തെ, ഗ്രഹങ്ങളുടെ കൃത്യമായ സ്ഥാനങ്ങളും രാശിചക്ര ചിഹ്നങ്ങളും ആ വ്യക്തിയുടെ ജീവിതഗതിയെ സ്വാധീനിക്കുന്നുവെന്ന് ജ്യോതിഷ വിദഗ്ധര്‍ വ്യക്തമാക്കുന്നു. ഈ ആകാശഗോളങ്ങളുടെ, ഒരു നിശ്ചിത സമയത്തുള്ള സ്ഥാനത്തെയാണ്‌ ഗ്രഹനില അഥവാ ജാതകം എന്നു പറയുന്നത്‌.