സമയം -രാത്രി 11.15 മുതൽ പുലർച്ചെ 2.31 വരെ
പൂർണത വരുന്നത് - 12.54 ന്
2020 ലെ രണ്ടാമത്തെ ചന്ദ്ര ഗ്രഹണ ദിനമാണ് ഇന്ന്. സാധാരണയായി ഭൂമിയും ചന്ദ്രനും സൂര്യനും ഒരേ നേർരേഖയിൽ എത്തുമ്പോഴാണ് ചന്ദ്രഗ്രഹണം നടക്കുന്നത്. എന്നാൽ ഇന്ന് നടക്കുന്ന പേനുംബ്രാൽ ലൂണാർ എക്ലിപ്സിൽ ഇവ മൂന്നും കൃത്യമായി നേർരേഖയിൽ വരുന്നില്ല. പകരം ചന്ദ്രൻ ഭൂമിയെ വലം വെക്കുന്നതിന്റെ ഭാഗമായി ഭൂമി സൂര്യനും ചന്ദ്രനും ഇടയിലുള്ള ഭാഗത്തായി വരുന്നു. അതിനാൽ ചന്ദ്രനിലെത്തേണ്ട സൂര്യപ്രകാശത്തെ ഭൂമി തടയുകയും ചെയ്യുന്നു. ഇത് ഒരു നേർത്ത പാളി പോലെ ചന്ദ്രനും ചന്ദ്രന് ചുറ്റും കാണപ്പെടും. അതിനാൽ ചന്ദ്രനെ ഭാഗികമായി നിഴൽ മൂടിയ പോലെ കാണാനാകും.
മേഘാവൃതമായ അന്തരീക്ഷമല്ലെങ്കിൽ ഇത് കേരളത്തിലും കാണാനാകും. 3 മണിക്കൂറും 18 മിനിറ്റുമാണ് ഇന്നത്തെ ചന്ദ്ര ഗ്രഹണത്തിന്റെ ദൈർഘ്യം. ഇന്നത്തെ ഗ്രഹണം സ്ട്രോബറി മൂൺ എക്ലിപ്സ് എന്നറിയപ്പെടുന്നു.
2020 ൽ നാല് ചന്ദ്ര ഗ്രഹണങ്ങൾ:
ഈ വർഷം ആകെ നാല് ചന്ദ്ര ഗ്രഹണങ്ങളാണ് നടക്കുന്നത്. ആദ്യത്തേത് ജനുവരി 10ന് നടന്നു കഴിഞ്ഞു. രണ്ടാമത്തേത് ഇന്ന് രാത്രി നടക്കും. അടുത്തത് ജൂലൈ 5നും ശേഷം നവംബർ 30 നും നടക്കും. അവസാനത്തെ രണ്ട് ചന്ദ്ര ഗ്രഹണങ്ങളും കേരളത്തിൽ നിന്ന് ദൃശ്യമാകില്ല.
ചന്ദ്ര ഗ്രഹണങ്ങൾ മൂന്ന് തരമുണ്ട്. പൂർണ ചന്ദ്ര ഗ്രഹണം, ഭാഗിക ചന്ദ്ര ഗ്രഹണം, പേനുംബ്രാൽ ലൂണാർ എക്ലിപ്സ് എന്നിവ.
പേനുംബ്രാൽ ലൂണാർ എക്ലിപ്സ്
ഭൂമിയുടെ സ്ഥാനം സൂര്യനും ചന്ദ്രനുമിടയിൽ വരികയും ചന്ദ്രനിലേക്കുള്ള സൂര്യപ്രകാശത്തെ ഭൂമി തടഞ്ഞു നിർത്തുകയും ചെയ്യും. ഇത് ചന്ദ്രന്റെ മേൽ ഒരു നേർത്ത പുറം നിഴൽ സൃഷ്ടിക്കും. ഇതാണ് പേനുംബ്രാൽ ലൂണാർ എക്ലിപ്സ് എന്നറിയപ്പെടുന്നത്. ഭൂമിയുടെ നേർത്ത നിഴൽ മാത്രം പതിക്കുന്നതിനാൽ ഇത് പെട്ടെന്ന് തിരിച്ചറിയാൻ പ്രയാസമാകും. ഗ്രഹണത്തിന്റെ മൂർധന്യാവസ്ഥയിൽ കൂടുതൽ ഇരുണ്ടു കാണാനാകും. യൂറോപ്, പടിഞ്ഞാറൻ ആഫ്രിക്ക എന്നിവിടങ്ങളിൽ ദൃശ്യമായ ശേഷമാകും ഇത് ഏഷ്യയിലും ന്യൂസിലൻഡിന്റെ ചില ഭാഗങ്ങളിലും കാണാൻ കഴിയുക.
ഇന്ത്യയിൽ കാണാം
ഇന്ത്യയിൽ വെള്ളിയാഴ്ച രാത്രി 11.15 മുതൽ ചന്ദ്ര ഗ്രഹണം കണ്ടു തുടങ്ങും. 12.54 ന് പൂർണതയിലെത്തുന്നത് ദൃശ്യമാകും. 2.31 ആകുമ്പോഴേക്കും ചന്ദ്ര ഗ്രഹണത്തിന്റെ സമയം അവസാനിപ്പിക്കും.
നഗ്ന നേത്രങ്ങൾ കൊണ്ട് കാണാം
ശാസ്ത്രീയമായി ചന്ദ്ര ഗ്രഹണം നഗ്ന നേത്രങ്ങൾ കൊണ്ട് വീക്ഷിക്കാനാകും. അതിനാൽ പ്രത്യേക തയ്യാറെടുപ്പുകളൊന്നും തന്നെ ആവശ്യമില്ല
ജ്യോതിഷ പ്രകാരം ഇങ്ങനെ
ജ്യോതിഷ പ്രകാരം ചന്ദ്രഗ്രഹണം കാണുന്നതിന് ചില തയ്യാറെടുപ്പുകളെല്ലാം ആവശ്യമുണ്ട്.
• ഗ്രഹണ സമയത്ത് വേവിക്കാത്ത ആഹാരങ്ങൾ കഴിക്കരുത് എന്ന് ജ്യോതിഷികളിൽ പലരും നിർദേശിക്കുന്നു.
• ഗ്രഹണ സമയത്ത് മൃത്യുഞ്ജയ മന്ത്രം ഉരുവിടണമെന്ന് ഒരു വിശ്വാസമുണ്ട്. ഇത് ചന്ദ്ര ഗ്രഹണ സമയത്തെ പ്രതികൂല ഊർജ്ജത്തിന്റെ തീകഷ്ണത കുറയ്ക്കുമെന്നാണ് വിശ്വാസം.
• ആഹാരത്തിലെ വിഷാംശം നീക്കുന്നതിനായി തുളസിയില ഉപയോഗിക്കണമെന്നതും വിശ്വാസമാണ്.
• ശരീരത്തിലേക്ക് ഹാനികരമായ വികിരണങ്ങളെത്താൻ സാധ്യതയുള്ളതിനാൽ ഗ്രഹണ സമയത്ത് പുറത്തിറങ്ങരുതെന്ന് വിശ്വസിക്കുന്നവരുമുണ്ട്.