ഗണപ്പൊരുത്തം നോക്കിയാണോ വിവാഹം കഴിച്ചത്; ഈ കാര്യങ്ങൾ അറിഞ്ഞിരിക്കാം!

വിവാഹ പൊരുത്ത ചിന്തയിൽ ഗണപ്പൊരുത്തം എത്രത്തോളം സ്വാധീനിക്കുന്നു എന്നത് എല്ലാക്കാലത്തും ചർച്ചാ വിഷയമാണ്. ഗണപൊരുത്ത പ്രകാരം എല്ലാ മനഷ്യരേയും ദേവ ഗണം, അസുര ഗണം, മനുഷ്യഗണം എന്നിങ്ങനെ വിഭജിച്ചിട്ടുണ്ട്. ഇതിൽ ദേവഗണത്തിൽ ഉൾപ്പെട്ടിരിക്കുന്നത് ഒൻപത് നക്ഷത്രക്കാരാണ്. ഇവർ വളരെയധികം സാത്വിക ഭാവത്തിലുള്ളവരായിരിക്കും. അതായത് ഇത്തരക്കാർ മറ്റുള്ളവരെ ദ്രോഹിക്കാൻ മനസ്സില്ലാത്തവരും ഉള്ളതുകൊണ്ട് സംതൃപ്തിയോടെ ജീവിക്കുന്നവരുമായിരിക്കും.മനുഷ്യ ഗണത്തിൽ ഉൾപ്പെട്ടവർ അൽപം അസൂയയും കുശുമ്പും ഉള്ളവരായിരിക്കും. തൻ്റേതായ സുഖലോലുപതക്ക് വേണ്ടി ഏതറ്റം വരെ പോകാനുള്ള ശ്രമവും നടത്തുന്നവരായിരിക്കും. എന്നാൽ വിട്ടു വീഴ്ച ചെയ്യാനുള്ള മനഃസ്തിതിയുള്ളവരായിരിക്കും ഇവർ. അസുരഗണത്തിൽ ഉൾപ്പെട്ടവർ കൈക്കരുത്തുകൊണ്ട് എന്തും പിടിച്ചെടുക്കുന്ന സ്വഭാവക്കാരാണ്. ഇത്തരക്കാർ ആരേയും അംഗീകരിക്കില്ല. തങ്ങൾക്ക് വേണമെന്ന് ആഗ്രഹിക്കുന്നതിനെ ഏത് നീച മാർഗ്ഗം ഉപയോഗിച്ചും സ്വന്തമാക്കുന്നവരായിരിക്കും അസുരഗണക്കാർ. ഓരോ നക്ഷത്രക്കാരുടെ സ്വഭാവ സവിശേഷതകൾ കൊണ്ടാണ് ഇത്തരത്തിലുള്ള ഗണങ്ങളായി തിരിച്ചിരിക്കുന്നത്.

പുണർതം,അനിഴം പൂയം അത്തം, തിരുവോണം,രേവതി അശ്വതി, മകയിരം, ചോതി ഈ നക്ഷത്രക്കാർ ദേവ ഗണങ്ങളാണ്.
ചിത്തിര,തൃക്കേട്ട അവിട്ടം,കാർത്തിക, മൂലം വിശാഖം, ചതയം ,മകം ആയില്യം എന്നീ ഒൻപത് നക്ഷത്രക്കാർ അസുരഗണങ്ങളാണ്.
പൂരം, പൂരാടം, പൂരൂരുട്ടാതി,ഉത്രം, ഉത്രാടം,,ഉത്രട്ടാതി, തിരുവാതിര, ഭരണി, രോഹിണി എന്നീ നക്ഷത്രക്കാർ മനുഷ്യ ഗണങ്ങളാണ്.

ദേവഗണത്തിൽ ഉൾപ്പെട്ടവർ ഭാര്യയുടെ സ്വത്തിന് വേണ്ടി വലിയ ആർത്തി കാണിക്കുന്നവരായിരിക്കില്ല. എന്താണോ ആ പുരുഷൻ്റെ കരുത്ത് ആ കഴിവുകൊണ്ട് കുടുംബത്തെ നയിക്കണമെന്ന് ആഗ്രഹിക്കുന്ന ഒരു സാത്വിക ബുദ്ധിയുള്ളവരായിരിക്കും ദേവഗണത്തിലുള്ളവർഎന്നാൽ അസുരഗണക്കിലുള്ളവരാകട്ടെ ഭാര്യയുടേയും ഭാര്യ വീട്ടുകാരുടേയും സ്വത്തുക്കളെപ്പറ്റിയും അത് എങ്ങനെ തനിക്ക് സ്വന്തമാക്കാൻ എന്ന കാര്യത്തെപ്പറ്റിയും എപ്പോഴും ചിന്തിച്ചു കൊണ്ടിരിക്കുന്നവരായിരിക്കും. കുടുംബത്തിൽ തന്നെ ചില ഛിദ്രങ്ങളുണ്ടാക്കുന്നവരായിരിക്കും അസുര ഗണക്കാർ.

സമാന സ്വഭാവത്തിലുള്ളവർ പരസ്പരം വിവാഹം കഴിക്കുന്നതാണ് നല്ലത് എന്നതിൻ്റെ അടിസ്ഥാന തത്വത്തിലാണ് നക്ഷത്രങ്ങളേയും മൂന്ന് ഗണങ്ങളായി വിഭജിച്ചിരിക്കുന്നത്. അതുകൊണ്ടു തന്നെയാണ് ഒരേ ഗണത്തിൽ നിന്നും വിവാഹ കഴിക്കുന്നതാണ് ഉത്തമം എന്ന് പറയുന്നതിന് പിന്നിലെ കാരണം.

ദേവാസുര ഗണം നിന്ദ്യം എന്നാണ് പൊതുവേ പറയാറ്. അതായത്, ദേവഗണത്തിൽപ്പെട്ട സ്ത്രീക്ക് അസുരഗണത്തിൽപ്പെട്ട പുരുഷനെ വിവാഹം കഴിക്കാൻ പാടില്ല. അങ്ങിനെയെങ്കിൽ മരണമാണ്.കാരണം ഇവർ വ്യത്യസ്ത സ്വഭാവക്കാരണ്. കാരണം തനിക്കുള്ളത് കൊണ്ട് തർപ്തിയായി ജീവിക്കണമെന്ന് ആഗ്രഹിക്കുന്ന സ്ത്രീ അസുരഗണത്തിൽപ്പെട്ട പുരുഷനോടൊത്ത് ജീവിതം ആരംഭിക്കുമ്പോൾ അവൻ അവരുടെ കുടുംബത്തിലെ സ്വത്തിനെക്കുറിച്ച് ആകുലപ്പെടുകയും കിട്ടിയത് തികയാതെ കൂടുതൽ ആവശ്യപ്പെടുകയും അങ്ങനെ കുടുംബ ജീവിതം അസ്വസ്ഥമാവുകയും ചെയ്യും എന്നുള്ളതാണ്.

ദേവഗണത്തിൽപ്പെട്ട സ്ത്രീക്ക് മനുഷ്യ ഗണത്തിൽപ്പെട്ട പുരുഷനെ മദ്ധ്യമഗണമായി സ്വീകരിക്കാം എന്നും പറഞ്ഞിട്ടുണ്ട്.കാരണം മനുഷ്യഗണത്തിലെ പുരുഷൻ കൂടുതൽ പിടിച്ചടക്കുന്നതിനുള്ള സ്വഭാവം കാണിക്കില്ല. കൊടുത്താൽ സന്തോഷത്തോടെ വാങ്ങിക്കും കിട്ടിയില്ലെങ്കിലും സന്തോഷത്തോടെ ജീവിക്കും എന്ന മനോഭാവക്കാരാണ് മനുഷ്യഗണത്തിലുള്ള പുരുഷന്മാർ.

മനുഷ്യഗണത്തിൽപ്പെട്ട സ്ത്രീ അസുരഗണത്തിൽപ്പെട്ട പുരുഷനെ വിവാഹം കഴിക്കുന്നതും ഉചിതമല്ല. കാരണം, മനുഷ്യഗണവും അസുരഗണവും നേർ വിപരീത സ്വഭാവ സവിശേഷതകളുള്ളവരായിരിക്കും.
തൻ്റെ ഭർത്താവിന് ജീവിതത്തോടുള്ള കാഴ്ചപ്പാട് എന്താണ്,ജീവിത രീതി എന്താണ് എന്നിവ മനസ്സിലാക്കി അതിനോടുകൂടി ഇടപഴകി ജീവിക്കാനുള്ള സ്ത്രീയുടെ ശേഷിയെയാണ് ഗണപ്പൊരുത്തം എന്നതിലൂടെ ഉദ്ദേശിക്കുന്നത്. ഗണപ്പൊരുത്തം വ്യത്യസ്തമായാൽ രണ്ടാളും രണ്ട് സ്വഭാവ സവിശേഷതകളുള്ള വ്യക്തികളായിരിക്കും. കൂടാതെ ഇവർ തമ്മിൽ പരസ്പരം കലഹങ്ങളും വിരോധങ്ങളും ഉണ്ടായിരിക്കും എന്നുള്ളത് സ്വാഭാവികമാണ്. അതുകൊണ്ട് തന്നെ ഉത്തമമായ വിവാഹജീവിതത്തിനായി ഗണപ്പൊരുത്തവും രാശിപ്പൊരുത്തവുമെല്ലാം പരിഗണിക്കുന്നത് ഉചിതമായിരിക്കും.