ട്രിപ്പർ നാവിഗേഷനുമായി 2021 റോയൽ എൻഫീൽഡ് ഹിമാലയൻ വരുന്നു

റോഡ്സ്റ്റർ ബൈക്കുകളുടെ അതിപ്രസരമുള്ള റോയൽ എൻഫീൽഡ് ബൈക്ക് നിരയിലെ ഏക അഡ്വഞ്ചർ ബൈക്ക് ആണ് ഹിമാലയൻ. 2016-ന്റെ തുടക്കത്തിൽ വിപണിയിലെത്തിയ ഹിമാലയനെ കഴിഞ്ഞ വർഷമാണ് ആദ്യമായി റോയൽ എൻഫീൽഡ് പരിഷ്കരിച്ചത്. ഇരട്ട വർണങ്ങളും, പരിഷ്കരിച്ച ബിഎസ്6 എൻജിനും, നിഷ്ക്രീയമാക്കാവുന്ന ആന്റി-ലോക്ക് ബ്രെക്ക് സിസ്റ്റം, ഹസാഡ് ലൈറ്റ് എന്നിവയുമായുമാണ് 2020 ഹിമാലയൻ വിപണിയിലെത്തിയത്. പരിഷ്ക്കരിച്ച ഹിമാലയൻ വിപണിയിലെത്തി ഒരു വർഷം പിന്നിടുമ്പോൾ 2021 പതിപ്പ് വിപണിയിലെത്തിക്കാൻ ഒരുങ്ങുകയാണ് റോയൽ എൻഫീൽഡ്.

അനൗദ്യോഗിമായി പുറത്തായ ചിത്രങ്ങൾ അനുസരിച്ച് നിറങ്ങളിൽ വ്യത്യാസമുണ്ടാകും. വെളുപ്പ്, കറുപ്പ് നിറങ്ങളുടെ ഡ്യുവൽ ടോൺ ആയിരിക്കും പുത്തൻ നിറം. ഈ പതിപ്പിന്റെ സീറ്റുകൾക്ക് ടാൻ നിറമായിരിക്കും. ടാൻ നിറത്തിന്റെ ടച് പെട്രോൾ ടാങ്കിലും കാണാം. ഇത് കൂടാതെ പൈൻ ഗ്രീൻ സിംഗിൾ ടോൺ നിറത്തിലും 2021 ഹിമാലയൻ വിപണിയിലെത്തും എന്നാണ് റിപോർട്ടുകൾ. അതെ സമയം സിംഗിൾ ടോൺ വെളുപ്പ് നിറത്തിലുള്ള ഹിമാലയൻ പുത്തൻ മോഡലിന്റെ വരവോടെ പിൻവലിച്ചേക്കും.

വിപണിയിലെത്തി 2 മാസം! മീറ്റിയോർ 350യുടെ വില കൂട്ടി റോയൽ എൻഫീൽഡ്
2021 റോയൽ എൻഫീൽഡ് ഹിമാലയന് പ്രധാന ആകർഷണം ട്രിപ്പർ നാവിഗേഷൻ ആണ്. ഗൂഗിളിന്റെ സഹകരണത്തിൽ തയ്യാറാക്കിയിരിക്കുന്ന ടേൺ-ബൈ-ടേൺ നാവിഗേഷൻ ആണ് ട്രിപ്പർ നാവിഗേഷൻ. ഡിജിറ്റൽ-അനലോഗ് ഇൻസ്ട്രുമെന്റ് ക്ലസ്റ്ററിൽ വലതുവശത്തായാണ് ട്രിപ്പർ നാവിഗേഷന്റെ ഡിസ്പ്ലേ ഒരുക്കിയിരിക്കുന്നത്. നവംബറിൽ വിപണിയിലെത്തിയ റോയൽ എൻഫീൽഡ് മീറ്റിയോർ 350-യിൽ എത്തിയ ട്രിപ്പർ നാവിഗേഷൻ തന്നെയാണ് പുത്തൻ ഹിമാലയനിലും ഇടം പിടിക്കുക.

കഴിഞ്ഞ വർഷം എത്തിയ ബിഎസ്6 മലിനീകരണ നിയന്ത്രണ മാനദണ്ഡങ്ങൾക്കനുസരിച്ച് പരിഷ്കരിച്ച എൻജിനാണ് 2021 ഹിമാലയനിൽ മാറ്റമില്ലാതെ തുടരുക. 411 സിസി സിംഗിൾ സിലിണ്ടർ എയർ കൂൾഡ് ഫ്യുവൽ ഇൻജെക്ഷൻ എൻജിൻ 24.3 എച്ച്പി പവറും 32 എൻഎം ടോർക്കുമാണ് ഉത്പാദിപ്പിക്കുന്നത്. 5-സ്പീഡ് മാന്വൽ ഗിയർബോക്‌സ് ആണ് ഹിമാലയന്.

197 ബിഎച്പി! സൂപ്പർച്ചാർജ് എഞ്ചിനുമായി കാവസാക്കി Z H2 ഇന്ത്യയിൽ
200 എംഎം ട്രാവലുള്ള ടെലിസ്കോപിക് മുൻ സസ്പെൻഷനും 180 എംഎം ട്രാവലുള്ള മോണോ പിൻ സസ്‌പെൻഷനും ആണ് ഹിമാലയനിൽ. ഡ്യുവൽ ചാനൽ എബിഎസ്സുമായി സഹകരിച്ചു പ്രവർത്തിക്കുന്ന 300 എംഎം ഡിസ്ക് മുൻചക്രത്തിലും 240 എംഎം ഡിസ്ക് പിൻചക്രത്തിലുമാണ് ബ്രെയ്ക്കിങ്ങിന്. ഡ്യുവൽ-സ്‌പോർട്ട് ടയറിൽ പൊതിഞ്ഞ 21 ഇഞ്ച് മുൻ വീലും 17 ഇഞ്ച് പിൻ വീലുകളുമാണ് ഹിമാലയനിൽ.

1.91 ലക്ഷം മുതൽ 1.96 ലക്ഷം വരെയാണ് റോയൽ എൻഫീൽഡ് ഹിമാലയൻ്റെ എക്‌സ്-ഷോറൂം വില. 2021 പതിപ്പിന് സ്വാഭാവികമായും വില കൂടാനാണ് സാദ്ധ്യത.