'ഹമാരാ ബജാജ്' എൺപതുകളിലും തൊണ്ണൂറുകളിലും ഇന്ത്യയുടെ സ്കൂട്ടർ വിപണി അടക്കി വാണിരുന്ന ബജാജിന്റെ തലവാചകമായിരുന്നു ഈ ഹിന്ദി വാക്കുകൾ (അർത്ഥം നമ്മുടെ ബജാജ്). ചേതക് എന്ന ബജാജിന്റെ സ്കൂട്ടർ വാങ്ങുവാനായി ബുക്ക് ചെയ്തു ഒരു വർഷത്തിന് മുകളിൽ കാത്തിരുന്ന കഥ ഒരു പക്ഷെ ഇപ്പോൾ വിശ്രമജീവിതം നയിക്കുന്ന പലർക്കും പറയാനുണ്ടാകും. പുത്തൻ സ്കൂട്ടറുകളുടെ കുത്തൊഴുക്കിൽ തൊണ്ണൂറുകളുടെ അവസാനത്തോടെ ചേതക് കളമൊഴിഞ്ഞു.
എന്നും കരുതി ചേതക്കിന്റെ കഥ കഴിഞ്ഞു എന്നുള്ള നിഗമനത്തിൽ എത്താൻ വരട്ടെ. സ്കൂട്ടർ വിപണിയിൽ നിന്ന് കുറച്ചു കാലം മാറി നിന്ന ബജാജ് ഇപ്പോൾ പൂർവാധികം ശക്തിയോടെ തിരിച്ചെത്തുകയാണ്. വെറുമൊരു സ്കൂട്ടർ അല്ല. പുത്തൻ കാലഘട്ടത്തിന്റെ ആവശ്യമായി ഇലക്ട്രിക്ക് സ്കൂട്ടറുമായി. പേരാണ് കൂടുതൽ 'ഇമോഷണൽ', സാക്ഷാൽ ചേതക്. ബജാജ് അർബനൈറ്റ് എന്ന പേരിൽ ആരംഭിച്ച പ്രത്യേക ഇലക്ട്രിക്ക് ഇരുചക്ര വാഹന ബ്രാൻഡിന് കീഴിലെ ആദ്യ വാഹനമായാണ് ചേതക്കിന്റെ പുനർജ്ജന്മം.
ബജാജ് ഓട്ടോ മാനേജിങ് ഡയറക്ടർ രാജീവ് ബജാജിനൊപ്പം കേന്ദ്ര ഉപരിതല ഗതാഗത മന്ത്രി നിധിൻ ഗഡ്കരിയും, നീതി ആയോഗ് സിഇഓ അമിതാഭ് കാന്തും ചേർന്നാണ് പുതിയ ബജാജ് ചേതക്കിനെ അവതരിപ്പിച്ചത്. സെപ്റ്റംബർ 25-ന് ബജാജിന്റെ പുണെ പ്ലാന്റിൽ ഉത്പാദനം തുടങ്ങിയ പുതിയ ചേതക് ഉടൻ വിപണിയിലെത്തും.
വെസ്പ സ്കൂട്ടറുകളെ അനുസ്മരിപ്പിക്കും വിധം റെട്രോ-ക്ലാസിക് രൂപഭംഗിയുള്ള പ്രീമിയം ഇലക്ട്രിക്ക് സ്കൂട്ടറാണ് പുത്തൻ ബജാജ് ചേതക്. വൃത്താകൃതിയിലുള്ള ഹെഡ് ലാംപ്, വീതി കൂടിയ എപ്രോൺ, ആകാരവടിവുള്ള ബോഡി പാനലുകൾ എന്നിവ പഴയകാല ചേതക്കിൽ നിന്ന് പ്രചോദനം ഉൾക്കൊണ്ടാണ് ചേർത്തിരിക്കുന്നത്. കറുപ്പ് നിറത്തിലുള്ള റിയർവ്യൂ മിറർ, അലോയ് വീലുകൾ, എൽഇഡി ഹെഡ്ലാംപ്, ഡേടൈം റണ്ണിങ് ലാമ്പുകൾ, പൂർണമായും ഡിജിറ്റലായ ഇൻസ്ട്രുമെന്റൽ ക്ലസ്റ്റർ എന്നിവ ആധുനികതയുടെ മേമ്പൊടിയും നൽകുന്നുണ്ട്. ഇതിനെല്ലാം പുറമെ ധാരാളം ക്രോം ഘടകങ്ങളും ചേർത്ത് ആകെ മൊത്തം പ്രീമിയം ലുക്ക് വരുത്തിയിട്ടുണ്ട്. പഴയ കാല ചേതക്കിലെ ഓടിക്കുന്ന വ്യക്തിക്കും പുറകിൽ ഇരിക്കുന്ന ആൾക്കും ഉള്ള രണ്ടു സീറ്റ് സംവിധാനമല്ല പുതിയ ചേതക്കിന്. നീളം കൂടിയ ഒറ്റ സീറ്റാണ്. കോൺട്രാസ്റ്റിംഗ് നിറങ്ങളിലുള്ള ഈ സീറ്റ് ബോഡി നിറങ്ങളായ ഐവറി, ഗോൾഡ് എന്നിവയുടെ പശ്ചാത്തലത്തിൽ കൂടുതൽ മനോഹരമാണ്. മുഴുവനായും മെറ്റൽ ബോഡിയാണ് പുത്തൻ ചേതക്കിന്.
Also read: 38,000 രൂപക്ക് ഇലക്ട്രിക്ക് ബൈക്കുമായി പോളാരിറ്റി സ്മാർട്ട് ബൈക്സ്
ഇലക്ട്രിക്ക് മോട്ടോറിന്റെ സ്പെസിഫിക്കേഷനെപറ്റിയുള്ള കൂടുതൽ വിവരങ്ങൾ പുറത്തു വിട്ടിട്ടില്ലെങ്കിലും IP67 ലിഥിയം-അയോൺ ബാറ്ററിയിൽ നിന്നാണ് കരുത്തു നേടുക എന്നുള്ളത് ഉറപ്പാണ്. സ്വിങ് ആമിൽ ഘടിപ്പിച്ചിരിക്കുന്ന ഇലക്ട്രിക്ക് മോട്ടോർ ഹൈ എഫിഷിയെൻസി ഓട്ടോമാറ്റിക് ട്രാൻസ്മിഷൻ വഴി പിൻ ചക്രത്തിനാണ് പവർ എത്തിക്കുക. ഇക്കോ, സ്പോർട് എന്നിങ്ങനെ രണ്ടു റൈഡിങ് മോഡുകളും, റിവേഴ്സ് അസ്സിസ്റ് ഫീച്ചറും പുതിയ ബജാജ് ചേതക്കിനുണ്ടാകും. സാധാരണ 5-15 ആമ്പ് ഇലക്ട്രിക്കൽ ഔട്ട്ലെറ്റിൽ ചാർജ് ചെയ്യാവുന്ന ഇലക്ട്രിക്ക് ചേതക്കിനു 100 കിലോമീറ്ററിന് മുകളിൽ റേഞ്ച് ഉണ്ടാകും.
അടുത്ത വർഷം ജനുവരിയിൽ ഇലക്ട്രിക്ക് ചേതക് പുണെയിലാണ് ആദ്യം വില്പനക്കെത്തുക. തുടർന്നു ബെംഗളുരുവിലേക്കും പിന്നീട് മറ്റുള്ള നഗരങ്ങളിലെക്കും വില്പന വ്യാപിപ്പിക്കും. നിലവിലുള്ള ഡീലർഷിപ്പുകൾ തന്നെയാണ് ബജാജ് അർബനൈറ്റ് ബ്രാൻഡിന് കീഴിലെ ഇലക്ട്രിക്ക് സ്കൂട്ടറുകളും വിൽക്കുക. വിലയെപ്പറ്റിയുള്ള ചോദ്യങ്ങൾക്ക് വിലക്കുറവും വിലകൂടുതലും തോന്നാത്ത ഒരു വിലയായിരിക്കും എന്നാണ് രാജീവ് ബജാജ് പ്രതികരിച്ചത്.
ഇന്ത്യയിലെ മുൻനിര ഇരുചക്ര വാഹന നിർമാതാക്കളിൽ ഇലക്ട്രിക്ക് സ്കൂട്ടർ ആദ്യമായി വിപണിയിലെത്തിക്കുന്ന നിർമ്മാതാവാണ് ബജാജ്. ആതർ എനർജിയുടെ 450-യാകും പുത്തൻ ചേതക്കിന്റെ പ്രധാന എതിരാളി. ഒക്കിനാവ, അമ്പെയർ, 22 മോട്ടോർസ്, ഹീറോ ഇലക്ട്രിക്ക് എന്നീ വാഹന നിർമ്മാതാക്കളുടെ ഇലക്ട്രിക്ക് സ്കൂട്ടറുകളുമായും പുത്തൻ ബജാജ് ചേതക് കൊമ്പു കോർക്കും.