ഫെബ്രുവരിയിലാണ് ഇന്ത്യയിലെ ഏറ്റവും വലിയ ഇരുചക്ര വാഹന നിർമ്മാതാക്കളായ ഹീറോ മോട്ടോകോർപ്പിന്റെ ന്യൂ ജനറേഷൻ ബൈക്ക് ശ്രേണിയായ എക്സ്ട്രീം സിരീസിലേക്ക് എക്സ്ട്രീം 160ആർ എന്ന മോഡൽ അവതരിപ്പിച്ചത്. ബജാജ് പൾസർ NS160, സുസുക്കി ജിക്സർ, ടിവിഎസ് അപ്പാച്ചെ RTR 160 4V എന്നീ മോഡലുകളോട് മത്സരിക്കുന്നപുത്തൻ ബൈക്ക് മാർച്ചിലാണ് വിപണിയിലെത്തുക എന്ന് ഹീറോ വ്യക്തമാക്കിയിരുന്നു. ഈ മാസത്തെ ലോഞ്ചിന് മുന്നോടിയായി എക്സ്ട്രീം 160ആർ-നെപ്പറ്റിയുള്ള വിവരങ്ങൾ ഹീറോ മോട്ടോർകോർപ്പിന്റെ വെബ്സൈറ്റിൽ അപ്പ്ഡേറ്റ് ചെയ്തതുമാണ്. അപ്പോഴാണ് കൊറോണ വൈറസ് അഥവാ കൊവിഡ് 19 വില്ലനായെത്തിയത്.
ഏപ്രിൽ മാസം 15-ാം തിയതി വരെ രാജ്യത്ത് ലോക്ക്ഡൗൺ പ്രഖ്യാപിച്ചതോടെ എക്സ്ട്രീം 160ആർ-ന്റെ ലോഞ്ച് നീട്ടി വയ്ക്കാൻ ഹീറോ മോട്ടോകോർപ്പ് നിർബന്ധിതരായി. അതെ സമയം കൊറോണ കാലം കഴിഞ്ഞാൽ ഉടനെയോ അല്ലെങ്കിൽ ഓൺലൈൻ ആയോ എക്സ്ട്രീം 160ആർ-ന്റെ ലോഞ്ച് പ്രതീക്ഷിക്കാം.
ഹീറോ എക്സ്ട്രീം 160ആർ
യമഹയുടെ മാക്സി-സ്കൂട്ടർ മജസ്റ്റി എസ് 155 എത്തി
ഹീറോ മോട്ടോകോർപ് കഴിഞ്ഞ വർഷം നവംബറിൽ ഇറ്റലിയിലെ മിലാനിൽ നടന്ന EICMA മോട്ടോർസൈക്കിൾ എക്സിബിഷനിൽ അവതരിപ്പിച്ച എക്സ്ട്രീം 1.R എന്ന കൺസെപ്റ്റ് മോഡലിനെ അടിത്തമാക്കി നിർമിച്ച ബൈക്ക് ആണ് എക്സ്ട്രീം 160ആർ. അഗ്ഗ്രസിവ് ആയ ബോഡി ലൈനുകൾ, മസ്ക്കുലറായ പെട്രോൾ ടാങ്ക്, ഡ്യുവൽ ടോൺ കളർ എന്നിവ എക്സ്ട്രീം 160ആർ-ന് സ്പോർട്ടി ലുക്ക് നൽകുന്നു. ബിഎസ്6 മലിനീകരണ നിയന്ത്രണ മാനദണ്ഡങ്ങൾ പാലിക്കുന്ന 160 സിസി, സിംഗിൾ സിലിണ്ടർ, എയർ-കൂൾഡ് എഞ്ചിൻ ആണ് എക്സ്ട്രീം 160R-ന്റെ ഹൃദയം. 8,500 ആർപിഎമ്മിൽ 15 ബിഎച്ച്പി പവറും 6,500 ആർപിഎമ്മിൽ 14 എൻഎം പീക്ക് ടോർക്കും നിർമിക്കുന്ന ഈ എൻജിൻ 5-സ്പീഡ് ഗിയർബോക്സുമായി ബന്ധിപ്പിച്ചിരിക്കുന്നു. മണിക്കൂറിൽ 60 കിലോമീറ്റർ വേഗത കൈവരിക്കാൻ എക്സ്ട്രീം 160R-ന് 4.7 സെക്കന്റ് മതി എന്നാണ് ഹീറോ അവകാശപ്പെടുന്നത്.
Also read: വാങ്ങാൻ ആളില്ല! ബുള്ളറ്റ് ട്രയൽസ് പിൻവലിച്ച് റോയൽ എൻഫീൽഡ്
37 എംഎം ഷോവ മുൻ ഫോർക്കുകളും പുറകിൽ 7-സ്റ്റെപ് ക്രമീകരിക്കാവുന്ന മോണോഷോക്ക് സസ്പെൻഷനുമായാണ് എക്സ്ട്രീം 160R-ന്. ഡ്യുവൽ ഡിസ്ക് വേരിയന്റിൽ 276 എംഎം ഫ്രണ്ട് ഡിസ്കും 220 എംഎം റിയർ ഡിസ്കുമാണ് ബ്രെയ്ക്കിങ്ങിന്. 17 ഇഞ്ച് അലോയ് വീലുകളാണ് എക്സ്ട്രീം 160R-ന്. ഡയമണ്ട് ഫ്രെയിം ഷാസിയിൽ നിർമ്മിച്ചിരിക്കുന്ന എക്സ്ട്രീം 160R-ന് 138.5 കിലോഗ്രാം ആണ് ഭാരം.