ക്ലാസിക് 350 കില്ലർ! ഹോണ്ട ഹൈനെസ്സ് സിബി 350 എത്തി

ഒറ്റ നോട്ടത്തിൽ തന്നെ ക്ലാസിക് 350-യെ മുട്ടുകുത്തിക്കുക എന്ന ലക്ഷ്യത്തോടെയാണ് ഹോണ്ട ഹൈനെസ്സ് സിബി 350-യുടെ വരവ് എന്ന് വ്യക്തം. റോഡ്സ്റ്റർ ബൈക്കുകളിൽ ഒഴിച്ചുകൂടാനാവാത്ത വൃത്താകൃതിയിലുള്ള ഹെഡ്‍ലാംപ്, മഴത്തുള്ളിയെ അനുസ്മരിപ്പിച്ചുക്കുന്ന പെട്രോൾ ടാങ്ക്, വൃത്താകൃതിയിലുള്ള റിയർവ്യൂ മിറർ, സിംഗിൾ പീസ് സീറ്റ്, നീളം കൂടിയ ഹാൻഡിൽ ബാർ, നീളം കുറഞ്ഞ മുൻ മഡ്ഗാർഡ് എന്നിവയാണ് ഹൈനെസ്സ് സിബി 350-യുടെ ആകർഷണങ്ങൾ. ഒപ്പം ക്ലാസിക് ഭാഷ്യം ഊട്ടിയുറപ്പിക്കാൻ ക്രോം ഘടകങ്ങൾ ധാരാളമായി ചേർത്തിട്ടുണ്ട്. അതെ സമയം കറുപ്പിൽ പൊതിഞ്ഞ റിയർവ്യൂ മിറർ, അലോയ് വീൽ, പൂർണമായും എൽഇഡി ആയ ലൈറ്റുകൾ, അനലോഗ് സ്പീഡോമീറ്ററും എൽസിഡി ഡിസ്‌പ്ലേയും ചേർന്ന ഇൻസ്ട്രുമെന്റ് ക്ലസ്റ്റർ എന്നിവ ആധുനികതയുടെ മേമ്പൊടി ചേർക്കുന്നു. മൈലേജ്, ഗിയർ പൊസിഷൻ ഇൻഡിക്കേറ്റർ, ബാറ്ററി വോൾടേജ്, പെട്രോൾ നിലവാരം തുടങ്ങിയ വിവരങ്ങൾ ഈ ഇൻസ്ട്രുമെന്റ് ക്ലസ്റ്റർ നൽകും.

പ്രീമിയം ഫീച്ചറുകളും, കരുത്തേറിയ എഞ്ചിനുമായി ഹോണ്ട ഹോർനെറ്റ് 2.0; വില 1.32 ലക്ഷം

ഡീലക്‌സ്, ഡീലക്‌സ് പ്രോ എന്നിങ്ങനെ രണ്ട് പതിപ്പുകളിലാണ് ഹോണ്ട ഹൈനെസ്സ് സിബി 350 വില്പനക്കെത്തുക. ഡീലക്‌സ് പ്രോ മോഡലുകൾക്ക് ഡ്യുവൽ ടോൺ കളർ കോമ്പിനേഷനും ഡീലക്‌സ് പതിപ്പിന് സിംഗിൾ ടോൺ നിറവുമാണ്. ഡ്യുവൽ ഹോൺ, ബ്ലൂടൂത്ത് വഴി സ്മാർട്ട്ഫോണും ഇൻസ്ട്രുമെന്റ് ക്ലസ്റ്ററും തമ്മിൽ കണക്റ്റ് ചെയ്യാവുന്ന സംവിധാനം എന്നിവയാണ് ഡീലക്‌സ് പ്രോ മോഡലിന്റെ മറ്റുള്ള സവിശേഷതകൾ. നാവിഗേഷൻ, മ്യൂസിക്, ഫോൺ കോളുകൾ, മെസ്സേജ് എന്നിവ ഈ കണക്ടഡ് ടെക് ഉപയോഗിച്ച് നിയന്ത്രിക്കാം.

• ഡീലക്‌സ് - പ്രെഷ്യസ് റെഡ് മെറ്റാലിക്
• ഡീലക്‌സ് - പേൾ നൈറ്റ് സ്റ്റാറി ബ്ലാക്ക്
• ഡീലക്‌സ് - മാറ്റ് മാർഷൽ ഗ്രീൻ മെറ്റാലിക്
• ഡീലക്‌സ് പ്രോ - പേൾ നൈറ്റ് സ്റ്റാർ ബ്ലാക്ക്/ സ്പിയർ സിൽവർ മെറ്റാലിക്
• ഡീലക്‌സ് പ്രോ - അത്ലറ്റിക് ബ്ലൂ മെറ്റാലിക്/ വിർച്ച്വസ് വൈറ്റ്
• ഡീലക്‌സ് പ്രോ - മാറ്റ് സ്റ്റീൽ ബ്ലാക്ക് മെറ്റാലിക്/ മാറ്റ് മാസ്സിവ് ഗ്രേ മെറ്റാലിക്

പുത്തൻ നിറങ്ങളിൽ കെടിഎം ആർസി 125, 200, 390 ബൈക്കുകളെത്തി

സ്റ്റീൽ ഡബിൾ ക്രാഡിൽ ഫ്രെയിമിൽ നിർമ്മിച്ചിരിക്കുന്ന ഹോണ്ട ഹൈനെസ്സ് സിബി 350-യ്ക്ക് 348.36 സിസി, സിംഗിൾ സിലിണ്ടർ, എയർ-കൂൾഡ് എഞ്ചിനാണ്. 5,500 ആർ‌പി‌എമ്മിൽ‌ 20.5 ബിഎച്ച്പി കരുത്തും 3,000 ആർ‌പി‌എമ്മിൽ‌ 30 എൻ‌എം പീക്ക് ടോർ‌ക്കും നിർമ്മിക്കുന്ന ഈ എൻജിൻ അഞ്ച് സ്പീഡ് ഗിയർബോക്‌സുമായാണ് ബന്ധിപ്പിച്ചിരിക്കുന്നത്. ടെലിസ്കോപിക് മുൻ സസ്‌പെൻഷനും ഡ്യുവൽ സ്പ്രിങ് പിൻ സസ്പെൻഷനുമാണ് ബൈക്കിന്. ഡ്യുവൽ ചാനൽ എബിഎസിനൊപ്പം 310 എംഎം ഡിസ്ക് മുൻചക്രത്തിലും പിന്നിൽ 240 എംഎം ഡിസ്കും ബ്രേക്കിംഗ് കൈകാര്യം ചെയ്യുന്നു. ട്രാക്ഷൻ കൺട്രോൾ സിസ്റ്റമായ ഹോണ്ട സെലക്ടബിൾ ടോർക്ക് കൺട്രോൾ (എച്ച്എസ്ടിസി) ഹൈനെസ്സ് സിബി 350-യിൽ ഉൾക്കൊള്ളിച്ചിട്ടുണ്ട്.

എല്ലാ ബിഎസ്6 റോയൽ എൻഫീൽഡ് ബൈക്കുകളുടെയും വില കൂട്ടി; പുതിയ വിലയറിയാം

ഹോണ്ടയുടെ പ്രീമിയം ബൈക്കുകൾ വിൽക്കുന്ന ബിഗ് വിങ് ഡീലർഷിപ്പുകൾ വഴിയാണ് ഹൈനെസ്സ് സിബി 350 വില്പനക്കെത്തുക. ഉടൻ ബിഗ് വിങ് ഡീലര്ഷിപ്പുകളുടെ എണ്ണം ഹോണ്ട വർധിപ്പിക്കും. 1.90 ലക്ഷം ആണ് ഹൈനെസ്സ് സിബി 350-യുടെ ഏകദേശ എക്‌സ്-ഷോറൂം വിലയായി ഹോണ്ട വ്യക്തമാക്കിയത്. യഥാർത്ഥ വില ഒക്ടോബറിൽ ഔദ്യോഗിക ലോഞ്ചിനോടൊപ്പമേ വ്യക്തമാകൂ. ഡീലക്‌സ് പ്രോ മോഡലിന് സ്വാഭാവികമായും വില കൂടുതൽ ആയിരിക്കും. ഹോണ്ട ബിഗ് വിങ് ഡീലർഷിപ്പ് വഴിയോ ഓൺലൈൻ ആയോ 5,000 രൂപയ്ക്ക് ഹോണ്ട ഹൈനെസ്സ് സിബി 350-യുടെ ബുക്കിംഗ് ആരംഭിച്ചു. റോയൽ എൻഫീൽഡ് ക്ലാസിക് 350-യ്ക്ക് മാത്രമല്ല ജാവ സ്റ്റാൻഡേർഡ്, ബെനെല്ലി ഇംപേരിയാലേ 400 തുടങ്ങിയ ക്ലാസിക് റോഡ്സ്റ്റർ ബൈക്കുകൾക്കും ശക്തമായ വെല്ലുവിളിയാകും ഹോണ്ട ഹൈനെസ്സ് സിബി 350.