ഇന്ത്യൻ സ്കൂട്ടർ വിപണിയുടെ രാജാവ് ആരെന്ന ചോദ്യത്തിന് സംശയഭേദമന്യേ ഒരു ഉത്തരമേ ഇപ്പോഴുള്ളൂ, ഹോണ്ട ആക്ടിവ. സ്കൂട്ടര് വിപണിയിയുടെ ഏകദേശം 56 ശതമാനം വിഹിതവും കയ്യാളുന്നത് ആക്ടീവ ശ്രേണിയാണെന്നാണ് ഹോണ്ട ടുവീലേഴ്സ് ഇന്ത്യ അവകാശപ്പെടുന്നത്. ഇരുചക്ര വാഹനവിപണയിലെ ഏറ്റവും വില്പനയുള്ള മോഡലാവാൻ ഹീറോ സ്പ്ലെൻഡറിനോട് മത്സരിക്കുന്ന ഹോണ്ട ആക്ടിവ സ്കൂട്ടർ വിപണിയുടെ അനിഷേധ്യ സാന്നിദ്ധ്യം ആണെന്നുള്ള കാര്യം പകൽ പോലെ വ്യക്തം.
എങ്കിലും എത്രയാണ് ഹോണ്ട ആക്ടിവയുടെ വില്പന എന്നുള്ള കണക്ക് കുറച്ചു പേരുടെയെങ്കിലും കണ്ണ് തുറപ്പിക്കും. ഹോണ്ട പുറത്തുവിട്ട കണക്കുകൾ പ്രകാരം 1,393,256 ആക്ടിവ യൂണിറ്റുകളാണ് ഏപ്രിൽ മുതൽ സെപ്റ്റംബർ വരെയുള്ള ഈ സാമ്പത്തിക വർഷത്തിന്റെ ആദ്യ 6 മാസത്തിൽ വിറ്റഴിഞ്ഞത്. അതായത് ഏകദേശം 2.32 ലക്ഷത്തോളം ആക്ടിവ മോഡലുകളാണ് ഒരു മാസം ഇന്ത്യയിൽ വിൽക്കുന്നത്. കൂടുതൽ ഇഴകീറി പരിശോധിച്ചാൽ ഒരു ദിവസം ഏകദേശം 7,740 യൂണിറ്റുകൾ. ഇതൊക്കെ ഇത്ര വലിയ സംഖ്യകൾ ആണോ എന്ന് ചിന്തിക്കുന്നവരോട്. ഓരോ മിനുട്ടിലും ഏകദേശം 5 ആക്ടിവ മോഡലുകളാണ് ഹോണ്ട ഇന്ത്യയിൽ വിറ്റഴിക്കുന്നത്. 2001-ൽ ഇന്ത്യന് നിരത്തിലെത്തിയ ആക്ടീവയുടെ ഇതുവരെയുള്ള ആകെ വില്പന കണക്ക് കേൾക്കണോ? 2.20 കോടി യൂണിറ്റുകള്. എതിരാളികളേക്കാൾ അതിവേഗം ബഹുദൂരം മുന്നിലുമാണ് ഹോണ്ട ആക്ടിവ ശ്രേണി.
ഹോണ്ട ആക്ടിവ ശ്രേണി
ആക്ടീവ ഐ, ആക്ടീവ 5ജി , ആക്ടീവ 125 എന്നിങ്ങനെ മൂന്നു വകഭേദങ്ങളിലാണ് ഹോണ്ട ഇപ്പോൾ ആക്ടിവ ശ്രേണിയെ വിൽക്കുന്നത്. അടിസ്ഥാന മോഡലായ ആക്ടിവ ഐയ്ക്ക് Rs 56,045 രൂപയാണ് കൊച്ചിയിൽ എക്സ്-ഷോറൂം വില. 8 ബിഎച്പി പവറും, 8.94 എൻഎം ടോർക്കും ഉല്പാദിപ്പിക്കുന്ന 109.9 സിസി എൻജിനാണ് ആക്ടീവ ഐയുടെ ഹൃദയം. ഇതേ 109.9 സിസി എൻജിനാണ് ആക്ടിവ 5ജി മോഡലിനും. പക്ഷെ ആക്ടീവ 5ജി കൂടുതൽ പ്രീമിയം ആണ്. ഡിജിറ്റൽ-അനലോഗ് ഇൻസ്ട്രുമെന്റ് ക്ലസ്റ്റർ, ‘ഇക്കോ’ സ്പീഡ് ഇൻഡിക്കേറ്റർ എന്നെ ഫീച്ചറുകളോടൊപ്പം, ഡാസിൽ യെല്ലോ മെറ്റാലിക്, പേൾ സ്പാർട്ടൻ റെഡ് എന്നിങ്ങനെ പുത്തൻ നിറങ്ങളിലും പുതിയ ആക്ടിവ 5ജി വില്പനയിലുണ്ട്. ആക്ടിവ 5ജി മോഡലിന് കൊച്ചിയിൽ Rs 59,731 രൂപയും, ഡീലക്സ് മോഡലിന് Rs 61,611 രൂപയുമാണ് കൊച്ചിയിലെ വില.
Also read: BS-VI ഹോണ്ട ആക്ടിവ 125 vs പഴയ ആക്ടിവ 125: എന്തുകൊണ്ട് പുതിയ വകഭേദം ഒരു പണതൂക്കം മുന്നിൽ?
ഇക്കഴിഞ്ഞ സെപ്റ്റംബറിലാണ് ആക്ടിവ ശ്രേണിയിലെ വല്യേട്ടനെ ഹോണ്ട പരിഷ്കരിച്ചു പുറത്തിറക്കിയത്. 2020 ഏപ്രിൽ 1 മുതൽ ഇന്ത്യയിൽ നിലവിൽ വരുന്ന ഭാരത് സ്റ്റേജ് 6 അഥവാ BS6 (BS-VI) മലിനീകരണ നിയന്ത്രണ മാനദണ്ഡങ്ങൾക്കനുസരിച്ചു പരിഷ്കരിച്ച എൻജിനുമായാണ് പുതിയ ആക്ടിവ 125 എത്തിയിരിക്കുന്നത്. സ്റ്റാൻഡേർഡ്, അലോയ്, ഡീലക്സ് എന്നിങ്ങനെ മൂന്ന് വേരിയന്റുകളിലാണ് പുതിയ ആക്ടിവ 125 എത്തിയിരിക്കുന്നത്. സ്റ്റാൻഡേർഡ് മോഡലിന് Rs 72,661, അലോയ് Rs 76,289, ഡീലക്സിനു Rs 79,766 എന്നിങ്ങനെയാണ് കൊച്ചിയിലെ വില. വില്പനയിലുണ്ടായിരുന്ന ആക്ടിവ 125-വുമായി താരതമ്യം ചെയ്യുമ്പോൾ Rs 2000 മുതൽ Rs 3000 രൂപവരെ അധികമാണ് പുതിയ BS-VI ഹോണ്ട ആക്ടിവയ്ക്ക്.
ആക്ടിവ ലിമിറ്റഡ് എഡിഷനും വിപണയിലുണ്ട്
ആക്ടിവ 5ജി-യെ അടിസ്ഥപ്പെടുത്തി ലിമിറ്റഡ് എഡിഷൻ മോഡലും ഹോണ്ട വിൽക്കുന്നുണ്ട്. 10 പുതിയ പ്രീമിയം സ്റ്റൈലിംഗ് കൂട്ടിച്ചേർക്കൾക്കൊപ്പമാണ് ആക്ടിവ 5ജി ലിമിറ്റഡ് എഡിഷനെ ഹോണ്ട അവതരിപ്പിച്ചിരിക്കുന്നത്. ഇതിൽ പ്രധാനം ഇരട്ട വർണങ്ങളാണ്. ഇമ്പേരിയിൽ റെഡ് മെറ്റാലിക്കിനൊപ്പം കറുപ്പ്, സ്പിയർ സിൽവർ മെറ്റാലിക് നിറത്തോടൊപ്പം കറുപ്പ് എന്നിവയാണ് ലിമിറ്റഡ് എഡിഷന്റെ സ്പെഷ്യൽ നിറങ്ങൾ. കറുപ്പ് നിറത്തിലുള്ള റിം, ക്രോം മഫ്ളർ കവർ, കോൺട്രാസ്റ്റിംഗ് സീറ്റ് കവർ എന്നിവയാണ് ലിമിറ്റഡ് എഡിഷന്റെ ചില പ്രത്യേകതകൾ. ലിമിറ്റഡ് എഡിഷന്റെ സ്റ്റാൻഡേർഡ് മോഡലിന് Rs 60,134 രൂപയും, ഡീലക്സ് മോഡലിന് Rs 62,014 രൂപയുമാണ് കൊച്ചിയിൽ വില.
Also read: ടാറ്റ കാർ വാങ്ങുമ്പോൾ ഹോണ്ട ആക്ടീവ ഫ്രീ! എജ്ജാതി ഓഫർ