ജാപ്പനീസ് ഇരുചക്ര വാഹന നിർമ്മാതാക്കളായ ഹോണ്ട ഈ മാസം 30 പുതിയ ബൈക്ക് ഇന്ത്യയിൽ ലോഞ്ച് ചെയ്യും. പുത്തൻ ബൈക്ക് ലോഞ്ചുമായി ബന്ധപ്പെട്ട് ക്ഷണക്കത്ത് ഹോണ്ട മോട്ടോർസൈക്കിൾസ് അയച്ചിട്ടുണ്ടെങ്കിലും ഏതാണ് പുത്തൻ ബൈക്ക് എന്ന് കമ്പനി വ്യക്തമാക്കിയിട്ടില്ല. അതെ സമയം ഹോണ്ടയുടെ പ്രേമം ബൈക്കുകൾ വിൽക്കുന്ന ബിഗ് വിങ് ഡീലർഷിപ്പുകൾ വഴിയാകും പുത്തൻ ബൈക്ക് വില്പനക്കെത്തുക എന്ന് വ്യക്തമാക്കിയിട്ടുണ്ട്.
രണ്ട് സാധ്യതകളാണ് റിപ്പോർട്ട് ചെയ്യുന്നത്. ഒന്നുകിൽ ഹോണ്ട ജൂലൈ അവസാന വാരം ബുക്കിംഗ് ആരംഭിച്ച പുത്തൻ CBR1000RR ഫയർബ്ലെയ്ഡിൻ്റെയും ഉയർന്ന പതിപ്പായ ഫയർബ്ലെയ്ഡ് SP വേർഷനും ലോഞ്ച് ആയിരിക്കും 30ന്. അല്ലെങ്കിൽ ഇന്ത്യൻ വിപണിക്കായി ഹോണ്ട പ്രത്യേകം തയ്യാറാക്കുന്ന 500 സിസിയ്ക്ക് താഴെ ഡിസ്പ്ലേസ്മെന്റുള്ള ക്രൂസർ ബൈക്ക് ആകും വില്പനക്കെത്തുന്നത്. അങ്ങനെയെങ്കിൽ റോയൽ എൻഫീൽഡിന്റെ ക്ലാസിക് 350, ജാവ ബൈക്കുകളോട് മത്സരിക്കും വിധം ഒരു ക്രൂയ്സർ ബൈക്ക് ആവും ഹോണ്ട തയ്യാറാക്കുന്നത് എന്നാണ് വിവരം.
ഹോണ്ട ആഗോള വിപണിയിൽ വിൽക്കുന്ന റിബൽ 300 ക്രൂയ്സർ ബൈക്ക് അടിസ്ഥാനമായ ബൈക്ക് ആവും പുതിയ ക്ലാസിക് 350 എതിരാളി. ഹോണ്ട അടുത്തിടെ ലോഞ്ച് ചെയ്ത ഹോർനെറ്റ് 2.0 യഥാർത്ഥത്തിൽ ആഗോള വിപണിയിലെ ഹോണ്ട CB190R അടിസ്ഥാനമായി തയ്യാറാക്കിയതാണ്. ഇതേ രീതിയിൽ ഇന്ത്യയ്ക്കായി മാറ്റം വരുത്തിയ റിബൽ 300 ലോഞ്ച് ചെയ്യാൻ സാധ്യത ഏറെയാണ്.
2020 ബിഎംഡബ്ള്യു ജി 310 ബൈക്കുകൾ ഉടൻ വില്പനയ്ക്ക്, ബുക്കിങ് തുടങ്ങി
ക്ലാസിക് 350 ഒരു റോഡ്സ്റ്റർ സ്റ്റൈലിൽ ആണെങ്കിൽ റിബൽ 300 അടിസ്ഥാനമായ ഒരു മോഡേൺ ക്രൂയ്സർ ആയിരിക്കും. വൃത്താകൃതിയിലുള്ള ഹെഡ്ലാംപ്, റിയർവ്യൂ മിറർ, സുഖകരമായ റൈഡിങ് പൊസിഷൻ, വെള്ളത്തുള്ളിയെ അനുസ്മരിപ്പിക്കുന്ന പെട്രോൾ ടാങ്ക് എന്നിവ റോഡ്സ്റ്റർ ഡിസൈൻ ഭാഷ്യത്തോടെ ചേരും വിധമാണ്. അതെ സമയം സ്പോക്ക് വീലുകൾക്ക് പകരം അലോയ് വീലുകൾ ആയിരിക്കും ഹോണ്ട ബൈക്കിന്.
286 സിസി ലിക്വിഡ്-കൂൾഡ് എൻജിൻ ഹോണ്ട ബൈക്കിൽ ഇടം പിടിക്കാനാണ് സാധ്യത. 8,000 ആർപിഎമ്മിൽ 30.4 പിഎസ് പവറും 6,500 ആർപിഎമ്മിൽ 27.4 എൻഎം ടോർക്കും നിർമ്മിക്കുന്ന ഈ എൻജിൻ 6 സ്പീഡ് ഗിയർബോക്സുമായാണ് ബന്ധിപ്പിച്ചിരിക്കുക. ഏകദേശം 2 ലക്ഷത്തിനടുത്ത് വില ഹോണ്ടയിൽ നിന്നുള്ള റോയൽ എൻഫീൽഡ് ക്ലാസിക് 350 എതിരാളിക്ക് പ്രതീക്ഷിക്കാം.