ഇന്ന് നവംബർ 15. കഴിഞ്ഞ വർഷം ഇതേ ദിവസമാണ് മഹീന്ദ്രയുടെ നേതൃത്വത്തിൽ രൂപീകരിച്ച ക്ലാസിക് ലെജന്റ്സ് എന്ന പുതിയ കമ്പനി ഐതിഹാസിക ചെക്കോസ്ലോവാക്യൻ ബൈക്ക് ബ്രാൻഡ്, ജാവയെ ഇന്ത്യയിൽ തിരിച്ചെത്തിച്ചത്. ജാവ, ജാവ 42 എന്നീ രണ്ട് മോഡലുകളുമായ് യാത്ര ആരംഭിച്ച ജാവ മോട്ടോർസൈക്കിൾസ്, ഇന്ന് ഇന്ത്യയുടെ ക്ലാസിക് ബൈക്ക് വിപണിയിൽ റോയൽ എൻഫീൽഡിന് കനത്ത വെല്ലുവിളിയുമായി മുന്നേറുകയാണ്. തിരിച്ചു വരവിന്റെ ഒന്നാം വാർഷികത്തിന് മൂന്നാമനെ പുറത്തിറക്കി വിപണിയിൽ സാന്നിധ്യം ശക്തമാക്കുകയാണ് ജാവ.
കഴിഞ്ഞ വർഷം ബ്രാൻഡ് അവതരണ സമയത്ത് പ്രദർശിപ്പിച്ച കസ്റ്റം ബോബര് മോഡൽ പെരാക്ക് തന്നെയാണ് ജാവയുടെ മൂന്നാമൻ. കസ്റ്റമൈസേഷന്റെ അനന്ത സാദ്ധ്യതകൾ തുറന്നിടുന്ന ജാവ പെരാക്കിന് Rs 1,94,500 രൂപയാണ് എക്സ്-ഷോറൂം വില. കഴിഞ്ഞ വർഷം പെരാക്കിനെ അവതരിപ്പിച്ചപ്പോൾ പ്രഖ്യാപിച്ച Rs 1.89 (എക്സ് ഷോറൂം) ലക്ഷം രൂപയുമായി താരതമ്യം ചെയ്യുമ്പോൾ, Rs 5,500 രൂപ മാത്രമേ ജാവ വർധിപ്പിച്ചിട്ടുള്ളു. ഡിസംബർ ഒന്ന് മുതൽ ബുക്കിംഗ് ആരംഭിക്കുന്ന പെരാക്ക് ഉടൻ ടെസ്റ്റ് ഡ്രൈവിനായി ഡീലർഷിപ്പുകളിൽ എത്തും. പക്ഷെ പെരാക്കിൻ്റെ ഡെലിവെറിക്കായി മൂന്ന് മാസമെങ്കിലും കാത്തിരിക്കണം. അടുത്ത വർഷം ഏപ്രിൽ മുതലേ ഇപ്പോൾ ബുക്ക് ചെയ്യന്നവർക്ക് പെരാക്ക് ലഭ്യമായി തുടങ്ങൂ.
Also read: ക്ലാസിക് 350 ഇനി ഇഷ്ടത്തിന് മോഡിഫൈ ചെയ്യാം, റോയൽ എൻഫീൽഡിൻ്റെ വാറൻ്റിയോടെ
ജാവ, ജാവ 42 മോഡലുകളെക്കാൾ നീളം കൂടുതലാണ് പെരാക്കിന്. ഈ മോഡലുകളുടെ ഷാസിയില് രൂപമാറ്റം വരുത്തിയാണ് നീളം വർധിപ്പിച്ചിരിക്കുന്നത്. കോൺട്രാസ്റ്റിംഗ് നിറത്തിലുള്ള ഫ്ലോട്ടിങ് രീതിയിൽ ക്രമീകരിച്ചിരിക്കുന്ന റൈഡർ സീറ്റ്, ബാർ-എൻഡ് മിററുകൾ, നീളം കുറഞ്ഞ മഡ്ഗാർഡ്, വലിപ്പം കുറഞ്ഞ എക്സ്ഹോസ്റ്റ് എന്നിങ്ങനെ ഒരു കസ്റ്റം ബോബര് മോഡലിൽ പ്രതീക്ഷിക്കുന്ന എല്ലാ ചേരുവകളും പെരാക്കിലുണ്ട്. കറുപ്പിൽ പൊതിഞ്ഞ എൻജിൻ, സ്പോക്ക് വീൽ, എക്സ്ഹോസ്റ്റ് പൈപ്പ് എന്നിവ പെരാക്കിന് ഒരു ആധുനിക മുഖഭാവം നൽകുന്നുണ്ട്.
Also read: ഇപ്പോൾ ബുക്ക് ചെയ്താൽ അടുത്ത മഴക്കാലത്ത്, ജാവ-ക്ക് വൻ ഡിമാൻഡ്
30 ബിഎച്ച്പി കരുത്തും 31 എന്എം ടോര്ക്കും നിർമിക്കുന്ന 334 സിസി സിംഗിൾ സിലിണ്ടർ എൻജിനാണ് പെരാക്കിന്റെ ഹൃദയം. ബിഎസ്-6 മലിനീകരണ നിയന്ത്രണ മാനദണ്ഡങ്ങള് പാലിക്കുന്ന ഈ എൻജിൻ 6-സ്പീഡ് ഗിയർബോക്സുമായി ബന്ധിപ്പിച്ചിരുക്കുന്നു. 27 ബിഎച്ച്പി പവറും 28 എന്എം ടോർക്കും നിർമിക്കുന്ന മറ്റുള്ള ജാവ മോഡലുകളുടെ എഞ്ചിനെക്കാൾ ഡിസ്പ്ലേസ്മെന്റ് കൂടുതലുള്ള എൻജിനാണ് പെരാക്കിന്. സബ് ഫ്രെയിമും വ്യത്യസ്തമാണ്. ടെലിസ്കോപിക് മുൻ ഫോർക്കും മോണോഷോക്ക് പിൻ സസ്പെൻഷനുമുള്ള പേരാക്കിന് മുൻപിലും പിന്നിലും ഡിസ്ക് ബ്രെക്കുകളാണ്. കോണ്ടിനെന്റൽ പ്രത്യേകമായി വികസിപ്പിച്ചെടുത്ത ഡ്യുവൽ ചാനൽ എബിഎസ്സും പെരാക്കിൽ ബ്രേക്കിങ്ങിനായുണ്ട്.