റോയൽ എൻഫീൽഡ് ക്ലാസിക് 350 'എസ്': ക്ലാസിക് ശ്രേണിയിലെ ഏറ്റവും വിലക്കുറവുള്ള വേരിയൻ്റ്

എപ്പോഴേ അകാലചരമം സംഭവിക്കേണ്ട ഒരു മോട്ടോർസൈക്കിൾ നിർമ്മാക്കളായിരുന്നു റോയൽ എൻഫീൽഡ്. ബ്രിട്ടനിലെ യഥാർത്ഥ കമ്പനി അടച്ചുപൂട്ടി പോയപ്പോഴും ഇന്ത്യയിലെ ബിസിനസ് തരക്കേടില്ലാതെ മുന്നോട് പോയി. ഇന്ത്യയിലെ ബിസിനസ് 1990-കളുടെ തുടക്കത്തിൽ ഐഷർ മോട്ടോർസ് ലിമിറ്റഡ് ഏറ്റെടുത്തതിനു ശേഷം തിരിച്ചു വരവിന്റെ പാതയിലെത്തിയ റോയൽ എൻഫീൽഡിന്റെ പിന്നീടുള്ള അത്ഭുതകരമായ വളർച്ചയിൽ ചുക്കാൻ പിടിച്ച മോഡലായിരുന്നു ക്ലാസിക്. പാരമ്പര്യത്തനിമയും, ബൈക്കിംഗ് രംഗത്തെ പുത്തൻ ഡിസൈൻ സമവാക്യങ്ങളും സമം ചേർത്ത് തയ്യാറാക്കിയ ക്ലാസിക് നിര വില്പനയിൽ ബഹുദൂരം മുന്നോട്ട് പോയി.

250 സിസി മുതൽ 750 സിസി ബൈക്ക് നിർമാതാക്കളിൽ ലോകത്തിൽ ഒന്നാം സ്ഥാനം ലക്ഷ്യമിടുന്ന റോയൽ എൻഫീൽഡിൻ്റെ വജ്രായുധവും പത്തോളം വേരിയൻ്റുകളിൽ വിൽക്കുന്ന ക്ലാസിക് നിരയാണ്. ഈ നിരയിലേക്കുള്ള പുതിയ താരത്തെ റോയൽ എൻഫീൽഡ് ഈ അടുത്ത് അവതരിപ്പിച്ചു. പേര് ക്ലാസിക് 350 'എസ്.' നിലവിലുള്ള ക്ലാസിക് ശ്രേണിയിലെ ഏറ്റവും വിലക്കുറവുള്ള മോഡൽ എന്നുള്ളതാണ് ക്ലാസിക് 350 എസ്സിൻ്റെ ഹൈലൈറ്റ്.

റോയൽ എൻഫീൽഡ് ക്ലാസിക് 350 എസ്സിനെപ്പറ്റി കൂടുതലായറിയാം

വില - ക്ലാസിക് 350 എസ്സിന് Rs 1.45 ലക്ഷം രൂപയാണ് ചെന്നൈയിൽ എക്‌സ്-ഷോറൂം വില. അതായതു 1.54 ലക്ഷം രൂപയാണ് എക്‌സ്-ഷോറൂം വിലയുള്ള സ്റ്റാൻഡേർഡ് ക്ലാസിക് 350, ക്ലാസിക് 350 റെഡിച്ച് എഡിഷനെക്കാളും ഏകദേശം 9,000 രൂപ കുറവാണ് പുതിയ ക്ലാസിക് 350 എസ്സിന്.
പ്രീമിയം വേരിയൻ്റുകളായ ക്ലാസിക് 350 ഗൺമെറ്റൽ ഗ്രെയ്‌ക്ക്‌ 1.59 ലക്ഷവും, ക്ലാസിക് സിഗ്നൽസ് 350-ക്കു 1.62 ലക്ഷവുമാണ് ചെന്നൈയിൽ എക്‌സ്-ഷോറൂം വില.

എബിഎസ് - മറ്റുള്ള ക്ലാസിക് 350 മോഡലുകളിൽ ലഭ്യമായ ചില ഘടകങ്ങൾ ഒഴിവാക്കിയാണ് ക്ലാസിക് 350 എസ് വേരിയൻ്റിൻ്റെ വില റോയൽ എൻഫീൽഡ് പിടിച്ചു നിർത്തിയിരിക്കുന്നത്. ക്ലാസിക് 350 ശ്രേണിയിലെ മറ്റെല്ലാ മോഡലുകളിലും ഡ്യുവൽ-ചാനൽ എബിഎസ്സുളളപ്പോൾ ക്ലാസിക് 350 എസ്സിന് സിംഗിൾ-ചാനൽ എബിഎസ്സാണ്. ക്ലാസിക് 350 എസ് എന്ന പേരിലെ എസ് എന്ന അക്ഷരം ഈ സിംഗിൾ-ചാനൽ എബിഎസ്സിനെയാണ് സൂചിപ്പിക്കുന്നത്.

Also read : 2019 ബജാജ് പൾസർ 125 വില പുറത്ത്; നിയോനേക്കാൾ 3,900 രൂപ കൂടുതൽ

ഡിസൈൻ - ഒറ്റനോട്ടത്തിൽ ക്ലാസിക് 350 എസ് വേരിയൻ്റും സ്റ്റാൻഡേർഡ് ക്ലാസിക് 350 മോഡലും തമ്മിലുള്ള വ്യത്യാസം കണ്ടുപിടിക്കാൻ ബുദ്ധിമുട്ടാണ്. ഒരല്പപം കൂടുതൽ ശ്രദ്ധിച്ചാൽ ക്രോമിൽ പൊതിഞ്ഞ എൻജിന് പകരം, തണ്ടർബേർഡ്-എക്‌സ് മോഡലിനെ അനുസ്മരിപ്പിക്കുന്ന കറുപ്പിൽ പൊതിഞ്ഞ എൻജിൻ അസ്സെംബ്ലിയാണ് ക്ലാസിക് എസ്സിനെന്നു കാണാം. ക്രോമിനേക്കാൾ വിലക്കുറവാണെന്നതും, കറുപ്പ് നിറം കുറേക്കൂടെ ആധുനികവുമാണെന്നത് ക്ലാസിക് 350 എസ്സിന്റെ ഭംഗി വർധിപ്പിക്കുന്നുണ്ട്. സ്പോക്ക് വീലുകൾക്കും, എൻജിൻ ഫെൻഡറിനും, റിയർവ്യൂ മിററുകൾക്കും കറുപ്പ് നിറമാണ്. വിലകുറക്കാനായി ടാങ്ക് ഗ്രിപ് പാടുകൾ ഒഴിവാക്കുകയും പെട്രോൾ ടാങ്ക് ലോഗോയെ ലളിതവത്കരിക്കുകയും ചെയ്തിട്ടുണ്ട്.

നിറങ്ങൾ - ക്ലാസിക് ബ്ലാക്ക്, ലഗൂൺ, ചെസ്ററ്നട്ട്, ആഷ് എന്നിങ്ങനെ ഒരു കൂട്ടം നിറങ്ങളിൽ ക്ലാസിക് 350 ബൈക്കുകൾ ലഭിക്കുമ്പോൾ പുതിയ ക്ലാസിക് എസ് വേരിയൻ്റിന് രണ്ടു നിറങ്ങൾ മാത്രമേയുള്ളൂ - പ്യൂർ ബ്ലാക്ക്, മെർക്കുറി സിൽവർ.

Also read : അഭ്യൂഹങ്ങൾക്ക് വിട, കെടിഎം ഡ്യൂക്ക് 790-യുടെ ഇന്ത്യ ലോഞ്ച് തിയതി പ്രഖ്യാപിച്ചു

എൻജിൻ - മറ്റുള്ള ക്ലാസിക് മോഡലുകളുമായി എൻജിനിൽ യാതൊരു മാറ്റവും ക്ലാസിക് 350 എസ്സിനില്ല. സിംഗിൾ സിലിണ്ടർ, എയർ-കൂൾഡ്, 346 സിസി എൻജിൻ 5250 അർപിഎമ്മിൽ 19.8 ബിഎച്ച്പി പവറും, 4000 ആർപിഎമ്മിൽ 28 എൻഎം ടോർക്കും ഉല്പാദിപ്പിക്കുന്നു. 5-സ്പീഡ് കോൺസ്റ്റൻഡ് മെഷ് ഗിയർബോക്‌സുമായി ഈ എൻജിൻ ബന്ധിപ്പിച്ചിരിക്കുന്നു.

സൈക്കിൾ പാർട്സ് - മറ്റുള്ള ഘടകങ്ങളിലും മാറ്റങ്ങളില്ല. ക്ലാസിക് 350 എസ്സടക്കം എല്ലാ ക്ലാസിക് 350 മോഡലുകൾക്കും 130 എംഎം ട്രാവലുള്ള ടെലിസ്കോപിക് മുൻ സസ്‌പെൻഷനും ട്വിൻ ഗ്യാസ് ചാർജ്ഡ് പിൻ ഷോക്ക് അബ്സോർബർബറുകളുമാണ്. വാഹനം പിടിച്ചു നിർത്താൻ 280 എംഎം ഡിസ്ക് മുൻ ചക്രത്തിനും, 240 എംഎം ഡിസ്ക് പിൻചക്രത്തിനുമായി സജ്ജീകരിച്ചിരിക്കുന്നു. 13.5 ലിറ്ററാണ് ഇന്ധന ടാങ്ക് കപ്പാസിറ്റി.

വില്പന - തത്കാലത്തേക് ക്ലാസിക് 350 എസ്സിൻ്റെ വില്പന കേരളത്തിലും, തമിഴ്നാട്ടിലുമായി പരിമിതപ്പെടുത്തിയിരിക്കുയാണ് റോയൽ എൻഫീൽഡ്. ഈ വിപണികളിലെ പ്രതികരണത്തിനനുസരിച്ചാവും ക്ലാസിക് 350 എസ്സിൻ്റെ വില്പന രാജ്യവ്യാപകമായി ആരംഭിക്കണോ എന്ന് റോയൽ എൻഫീൽഡ് തീരുമാനിക്കുക.