അതുകൊണ്ട് തന്നെ രണ്ടും കല്പിച്ച് മുന്നോട്ട് പോവാനാണ് റോയൽ എൻഫീൽഡിന്റെ പദ്ധതി. അടുത്ത കുറച്ചു വർഷങ്ങളിൽ ലോഞ്ച് ചെയ്യാനായി ഏകദേശം 14 ബൈക്ക് മോഡലുകളാണ് റോയൽ എൻഫീൽഡ് മനസ്സിൽ കരുതിയിരിക്കുന്നത് എന്ന് പ്രമുഖ ബൈക്കിംഗ് വെബ്സൈറ്റ് ആയ മോട്ടോർസൈക്കിൾ ന്യൂസ് റിപ്പോർട്ട് ചെയ്യുന്നു. റോയൽ എൻഫീൽഡിന്റെ പ്രോഡക്റ്റ് ഡെവലപ്മെന്റ് ഹെഡ് സൈമൺ വെർബർട്ടോണിൻ്റെ വാക്കുകളിൽ 14-ഓളം പുത്തൻ മോഡലുകൾ നിർമ്മിക്കുന്നതിനെപ്പറ്റി പ്രോഡക്റ്റ് സ്ട്രാറ്റജി തലവൻ മാർക്ക് വെൽസ് സംസാരിച്ചിട്ടുണ്ട്. ഇതിൽ ഏതൊക്കെ മോഡൽ ആണ് ഒടുവിൽ വില്പനക്കെത്തുക എന്ന് വ്യക്തമല്ല. എങ്കിലും ഏറ്റവും അധികം സത്യതയുള്ള മോഡലുകളെ നമുക്ക് പരിചയപ്പെടാം.
ഹിമാലയന് ചേട്ടനും അനിയനും
റോഡ്സ്റ്റർ ബൈക്കുകളുടെ അതിപ്രസരമുള്ള റോയൽ എൻഫീൽഡ് നിരയിൽ 2016-ലാണ് ഏക അഡ്വഞ്ചർ ബൈക്ക് ആയി ഹിമാലയൻ എത്തിയത്. ഈ വർഷത്തിന്റെ തുടക്കത്തിൽ പരിഷ്കരിച്ച മോഡലും റോയൽ എൻഫീൽഡ് അവതരിപ്പിച്ചു. അതെ സമയം അഡ്വഞ്ചർ ബൈക്കുകൾക്ക് ആവശ്യക്കാർ ഏറുന്നു എന്ന് കണ്ടറിഞ്ഞ് ഹിമാലയന് ഡിസ്പ്ലേസ്മെന്റ് കൂടിയതും കുറഞ്ഞതുമായ എഞ്ചിനുകളുള്ള വേരിയന്റുകൾ പുറത്തിക്കരക്കാൻ റോയൽ എൻഫീൽഡിന് പദ്ധതിയുണ്ടത്രേ. ഇതിൽ ആദ്യം ഹിമാലയൻ 650 വില്പനക്കെത്താനാണ് സാദ്ധ്യത. ഇന്റർസെപ്റ്റർ, കോണ്ടിനെന്റൽ ജിടി 650 മോഡലിലുകളിലെ എൻജിൻ തന്നെയാവും ഹിമാലയൻ 650-യിലും എത്തുക. ഈ മോഡൽ പ്രധാനമായും വിദേശ വിപണികൾ ലക്ഷയം വച്ചാണ്. അതെ സമയം 250 സിസി എഞ്ചിനുമായി ഒരു ഹിമാലയൻ മോഡലും തയ്യാറാവുന്നുണ്ട് എന്നാണ് വിവരം. ഇന്ത്യയിൽ വർദ്ധിച്ചു വരുന്ന അഡ്വഞ്ചർ ബൈക്ക് ഡിമാൻഡ് കണ്ടറിഞ്ഞ് ഹീറോ എക്സ്പൾസ്, കെടിഎം ലോഞ്ച് ചെയ്യാൻ തയ്യാറെടുക്കുന്ന 250 അഡ്വഞ്ചർ എന്നീ മോഡലുകൾക്ക് എതിരാളിയായാവും റോയൽ എൻഫീൽഡ് ഹിമാലയൻ 250 എത്തുക.
650 ഇരട്ടകൾക്ക് കൂടുതൽ വേരിയന്റുകൾ
റോയൽ എൻഫീൽഡ് നിരയിലെ ഇപ്പോഴുള്ള തലയെടുപ്പുള്ള താരം ആണ് ഇന്റർസെപ്റ്റർ 650-യും കോണ്ടിനെന്റൽ ജിടി 650-യും. 650 ഇരട്ടകൾ എന്ന് റോയൽ എൻഫീൽഡ് പേരിട്ടു വിളിക്കുന്ന ഈ മോഡലുകളിൽ ഇന്റർസെപ്റ്റർ 650-യ്ക്ക് ഒരു യഥാർത്ഥ റോഡ്സ്റ്റർ ഡിസൈനും കോണ്ടിനെന്റൽ ജിടി 650-യ്ക്ക് കഫേ റേസർ ഡിസൈനുമാണ്. ഇവ കൂടാതെ ഇതേ എൻജിനും പ്ലാറ്റ്ഫോമും ഉപയോഗിച്ച് രണ്ട് വേരിയന്റുകൾ കൂടെ വിപണിയിലെത്തിക്കാനാണ് റോയൽ എൻഫീൽഡിന്റെ ശ്രമം. ഒന്ന് ഒരു സ്ട്രീറ്റ് ബൈക്ക് ആയിരിക്കും. നിയോ-റിട്രോ ഡിസൈൻ പരിവേഷത്തിൽ അലോയ് വീലുകൾ, കറുപ്പിൽ പൊതിഞ്ഞ ബോഡി ഘടകങ്ങൾ, ട്യൂബിലെസ്സ് ടയറുകൾ എന്നിങ്ങനെയാവും സ്ട്രീറ്റ് മോഡൽ എത്തുക. മറ്റൊന്ന് കൂടുതൽ സ്പോർട്ടി ലുക്കിലുള്ള കോണ്ടിനെന്റൽ ജിടി 650-യാവും. മികച്ച ടയറുകൾ, വ്യത്യസ്തമായ ഹെഡ് ലൈറ്റ് ഫെയറിങ് എന്നിവ ഈ മോഡലിൽ പ്രതീക്ഷിക്കാം.
പുത്തൻ റോഡ്സ്റ്റർ ബൈക്കുകൾ
ഈ വർഷം ഫെബ്രുവരിയിലാണ് റോയൽ എൻഫീൽഡിന്റെ പുത്തൻ ബൈക്ക് ടെസ്റ്റിംഗ് സമയത്ത് മാധ്യമങ്ങളുടെ കണ്ണിൽ പെട്ടത്. റോയൽ എൻഫീൽഡ് ബൈക്കുകളിൽ ഇതുവരെ കനത്ത ഒരു ഡിസൈൻ ആയിരുന്നു ഈ മോഡലുകൾക്ക്. 350 സിസിയിൽ നിന്ന് താഴോട്ടിറങ്ങി റോയൽ എൻഫീൽഡ് പുതുതായി തയ്യാറാക്കുന്ന 250 സിസി റോഡ്സ്റ്റർ ബൈക്കുകളാണ് ഇവ എന്നാണ് കണക്കാക്കപ്പെടുന്നത്. റോയൽ എൻഫീൽഡ് പുത്തയി വികസിപ്പിച്ചെടുത്ത J പ്ലാറ്റഫോമിൽ ആവും ഈ ബൈക്ക് തയ്യാറാവുക. കറുപ്പിൽ പൊതിഞ്ഞ എൻജിൻ, ഫ്രയിം, എക്സ്ഹോസ്റ്റ്, അലോയ് വീൽ എന്നിവ സഹിതം ഒരു ഒരു മോഡേൺ റോഡ്സ്റ്റർ ഡിസൈൻ ഭാഷ്യം ആയിരിക്കും ഈ മോഡലിന് എന്നറിയുന്നു.
ഫോറിൻ ആണല്ല്യോടാ! പക്ഷേ ഈ ബൈക്ക് ബ്രാൻഡുകളുടെ മുതലാളി ഇന്ത്യക്കാരാണ്
എക്സ്പ്ലോറർ
എക്സ്പ്ലോറർ ഒരു ബൈക്ക് ആവില്ല ഒരു പ്രത്യേക സബ്-ബ്രാൻഡ് ആവുമെന്നാണ് ഇക്കണോമിക് ടൈംസ് റിപ്പോർട്ട് ചെയ്യുന്നത്. സ്ത്രീകൾക്കായി പ്രത്യേകം തയ്യാറാക്കിയ ബൈക്കുകളാവും, എക്സ്പ്ലോറർ ബ്രാൻഡിന് കീഴിൽ അവതരിപ്പിക്കുക. സ്ത്രീകൾക്ക് സുഗമമായി കൈകാര്യം ചെയ്യാൻ വിധത്തിൽ ഭാരവും, സീറ്റ് ഹൈറ്റും കുറച്ച് റോഡ്സ്റ്റർ ടൈപ്പ് ബൈക്കുകളാണ് റോയൽ എൻഫീൽഡ് തയ്യാറാക്കുക. മാത്രവുമല്ല റോയൽ എൻഫീൽഡ് ശ്രേണിയിലെ ഏറ്റവും വിലക്കുറവുള്ള ബൈക്ക് മോഡൽ ആവും സ്ത്രീകൾക്കായി തയ്യാറാക്കുന്നത്. ഇപ്പോൾ J1C എന്ന കോഡ് നാമത്തിൽ നിർമ്മാണം പുരോഗമിക്കുന്ന എക്സ്പ്ലോറർ ബ്രാൻഡ് ബൈക്കുകൾ അടുത്ത വർഷത്തിന്റെ ആദ്യപാദത്തിൽ തന്നെ വില്പനക്കെത്തുമത്രേ.
ഉടൻ വിപണിയിലെത്തുന്ന പോക്കറ്റിലൊതുങ്ങുന്ന അഡ്വഞ്ചർ ബൈക്കുകൾ
മീറ്റിയോർ
റോയൽ എൻഫീൽഡ് ഉടൻ വില്പനക്കെത്തിക്കുക തണ്ടർബേർഡിന് പകരക്കാരൻ ആയി മീറ്റിയോർ ഫയർബോൾ ആയിരിക്കും. തണ്ടർബേർഡിൻ്റെ പരിഷ്കരിച്ച മോഡൽ എന്ന് ഒറ്റ നോട്ടത്തിൽ തന്നെ പറയാവുന്ന വിധമാണ് മീറ്റിയോറിന്റെ ഡിസൈൻ. വൃത്താകൃതിയിലുള്ള ഹെഡ്ലൈറ്റ്, പെട്രോൾ ടാങ്ക്, സൈഡ് ബോക്സ്, സീറ്റുകൾ എന്നിവ തണ്ടർബേർഡ് എക്സ് മോഡലിൽ നിന്ന് കടമെടുത്തതാണ്. അലോയ് വീലുകളിൽ പിൻസ്ട്രൈപ്പുകളുണ്ട്, അവയ്ക്ക് ഇന്ധന ടാങ്കിന്റെ നിറമാണ്. അതെ സമയം ചെറിയ ഡിജിറ്റൽ ഡിസ്പ്ലേ സ്ക്രീനുള്ള വൃത്താകൃതിയിലുള്ള ഇൻസ്ട്രുമെന്റ് കൺസോൾ പുതുമയാണ്. ബിഎസ്6 ക്ലാസിക് 350 മോഡലിനെ ചലിപ്പിക്കുന്ന 346 സിസി, സിംഗിൾ സിലിണ്ടർ, എയർ-കൂൾഡ് എൻജിൻ തന്നെയാവും മീറ്റിയോർ ഫയർബോളിനും.
ബിഎസ്4 ബൈക്കുകൾ എല്ലാം വിറ്റുതീർത്ത് റോയൽ എൻഫീൽഡ്
രണ്ടാം തലമുറ ക്ലാസിക്
റോയൽ എൻഫീൽഡ് നിരയിലെ ഏറ്റവും ഡിമാന്റുള്ള മോഡൽ ആണ് ക്ലാസിക്. 2010-ൽ വിപണിയിലെത്തിയ ക്ലാസിക് ആണ് റോയൽ എൻഫീൽഡിന്റെ വിൽപ്പനയിലെ നെടുംതൂൺ. 10 വർഷത്തെ തേരോട്ടത്തിന് ശേഷം രണ്ടാം തലമുറ ക്ലാസിക്കിന്റെ പണിപ്പുരയിലാണ് റോയൽ എൻഫീൽഡ്. പ്രീമിയം ലുക്കിൽ, കൂടുതൽ ഫീച്ചറുകളുമായാണ് പുത്തൻ റോയൽ എൻഫീൽഡ് ക്ലാസിക് എത്തുക. റോയൽ എൻഫീൽഡിന്റെ തന്നെ കോൺസെപ്റ്റ് കെഎക്സിൽ നിന്നും കടമെടുത്ത സ്വിച്ച് ഗിയറുകൾ, അലോയ് വീൽ, ട്യൂബിലെസ്സ് ടയറുകൾ എന്നിവ ഈ പുത്തൻ മോഡലിൽ പ്രതീക്ഷിക്കാം. ബോഡി പാനലുകൾക്കും മാറ്റമുണ്ടാകും. ക്ലാസിക് ബൈക്ക് ഉപഭോക്താക്കളുടെ പ്രധാന ആവശ്യമായ ഫ്യുവൽ ഗേജ് പുത്തൻ മോഡലിൽ റോയൽ എൻഫീൽഡ് ഉൾപ്പെടുത്തും എന്നും പ്രതീക്ഷിക്കാം.