എക്‌സ്ട്രീം 1.R കൺസെപ്റ്റ് അടിസ്ഥാനപ്പെടുത്തിയ ഡിസൈൻ
അടുത്ത തലമുറ എക്‌സ്ട്രീം ബൈക്കുകൾ എങ്ങനെയാകും എന്ന ചോദ്യത്തിനുത്തരമായി എക്‌സ്ട്രീം 1.R എന്ന കൺസെപ്റ്റ് മോഡലിനെ ഹീറോ മോട്ടോകോർപ് കഴിഞ്ഞ വർഷം നവംബറിൽ ഇറ്റലിയിലെ മിലാനിൽ നടന്ന EICMA മോട്ടോർസൈക്കിൾ എക്‌സിബിഷനിൽ അവതരിപ്പിച്ചിരുന്നു. സ്ട്രീറ്റ് നേക്കഡ് ഡിസൈൻ ഭാഷ്യം പ്രകടമായ എക്‌സ്ട്രീം 1.R-ന്റെ അഗ്ഗ്രസിവ് ബോഡി ലൈനുകൾ, മസ്‌ക്കുലറായ പെട്രോൾ ടാങ്ക്, ഡ്യുവൽ ടോൺ കളർ എന്നിവ ശ്രദ്ധേയമായിരുന്നു. ഹീറോ മോട്ടോകോർപ്പിന്റെ ഭാഷയിൽ ഒരു അമ്പിന്റെ സൂക്ഷ്മത അടിസ്ഥാനമാക്കി നിർമിച്ച എക്‌സ്ട്രീം 1.R കോൺസെപ്റ്റിൽ നിന്ന് എക്‌സ്ട്രീം 160R-യുടെ ജനനം.
160 സിസി എൻജിൻ
ബിഎസ്6 മലിനീകരണ നിയന്ത്രണ മാനദണ്ഡങ്ങൾ പാലിക്കുന്ന 160 സിസി, സിംഗിൾ സിലിണ്ടർ, എയർ-കൂൾഡ് എഞ്ചിൻ ആണ് എക്‌സ്ട്രീം 160R-ന്റെ ഹൃദയം. 8,500 ആർപിഎമ്മിൽ 15 ബിഎച്ച്പി പവറും 6,500 ആർപിഎമ്മിൽ 14 എൻഎം പീക്ക് ടോർക്കും നിർമിക്കുന്ന ഈ എൻജിൻ 5-സ്പീഡ് ഗിയർബോക്‌സുമായി ബന്ധിപ്പിച്ചിരിക്കുന്നു. മണിക്കൂറിൽ 60 കിലോമീറ്റർ വേഗത കൈവരിക്കാൻ എക്‌സ്ട്രീം 160R-ന് 4.7 സെക്കന്റ് മതി എന്നാണ് ഹീറോ അവകാശപ്പെടുന്നത്. അങ്ങനെയെങ്കിൽ ഈ സെഗ്മെന്റിലെ ഏറ്റവും വേഗമേറിയ ബൈക്കാണ് എക്‌സ്ട്രീം 160R.
Also read: കരിസ്‌മയുടെ കഥ കഴിഞ്ഞു! ഇനി എക്‌സ്ട്രീം 200S-ൻ്റെ കാലം
പ്രീമിയം സൈക്കിൾ പാർട്സ്
37 എംഎം ഷോവ മുൻ ഫോർക്കുകളും പുറകിൽ 7-സ്റ്റെപ് ക്രമീകരിക്കാവുന്ന മോണോഷോക്ക് സസ്‌പെൻഷനുമായാണ് എക്‌സ്ട്രീം 160R-ന്. പിന്നിൽ 130 എംഎം വീതിയുള്ള റേഡിയൽ ടയറിലും മുൻവശത്ത് 110 എംഎം വീതിയുള്ള ടയറുകളുമാണ്. 17 ഇഞ്ച് അലോയ് വീലുകളിലാണ് എക്‌സ്ട്രീം 160R-ന്. ഡ്യുവൽ ഡിസ്ക് വേരിയന്റിൽ 276 എംഎം ഫ്രണ്ട് ഡിസ്കും 220 എംഎം റിയർ ഡിസ്കുമാണ് ബ്രെയ്ക്കിങ്ങിന്. ഡയമണ്ട് ഫ്രെയിം ഷാസിയിൽ നിർമ്മിച്ചിരിക്കുന്ന എക്‌സ്ട്രീം 160R-ന് 138.5 കിലോഗ്രാം ആണ് ഭാരം. ഗ്രൗണ്ട് ക്ലിയറൻസ് 170 എംഎമ്മും.
Also read: BS6 ഹീറോ സ്പ്ലെൻഡർ+, ഡെസ്റ്റിനി 125, മാസ്ട്രോ എഡ്ജ് 125 വിപണിയിൽ
ഫീച്ചർ സമൃദ്ധം
ഫുൾ എൽഇഡി ഹെഡ്‌ലാമ്പുകൾ, എച്ച് ആകൃതിയിലുള്ള ടെയിൽ-ലൈറ്റ്, പൂർണമായും ഡിജിറ്റലായ ഇൻസ്ട്രുമെന്റ് ക്ലസ്റ്റർ, എബി‌എസിനൊപ്പം പെറ്റൽ ഡിസ്ക് ബ്രേക്കുകൾ എന്നിങ്ങനെ പോകുന്നു എക്‌സ്ട്രീം 160R-ലെ ഫീച്ചർ നിര. സൈഡ് സ്റ്റാൻഡ് ഇട്ടിരിക്കുന്ന സമയത് എൻജിൻ ഓൺ ആവാത്ത സൈഡ്-സ്റ്റാൻഡ്-ഡൌൺ എഞ്ചിൻ കട്ട്-ഓഫ് ഫംഗ്ഷനാണ് മറ്റൊരാകർഷണം.
Also read: നൊസ്റ്റാൾജിയ കൂട്ടുപിടിച്ച് വെസ്പ റേസിംഗ് സിക്സ്റ്റീസ് വരുന്നു
150സിസി ബൈക്ക് സെഗ്മെന്റിൽ ഇനി ഹീറോയില്ല
എക്‌സ്ട്രീം 160R-ന്റെ വരവിന് മുൻപായി എക്‌സ്ട്രീം സ്പോർട്സ് 150സിസി ബൈക്ക് ഹീറോ പിൻവലിച്ചിരുന്നു. കഴിഞ്ഞ കുറച്ചു മാസങ്ങളായി വിരലിലെണ്ണാവുന്ന എക്‌സ്ട്രീം സ്പോർട്സ് യൂണിറ്റുകൾ മാത്രമേ ഹീറോ വിറ്റഴിച്ചിട്ടുള്ളു. ഇതാണ് എക്‌സ്ട്രീം സ്പോർട്സിന്റെ വില്പന അവസാനിപ്പിക്കാൻ ഹീറോയെ പ്രേരിപ്പിച്ചത്. ഹങ്ക്, അച്ചീവർ തുടങ്ങിയ ഹീറോയുടെ 150സിസി ബൈക്കുകളുടെ വില്പന മുൻപേ അവസാനിപ്പിച്ചിരുന്നു. ഇതോടെ ഹീറോ മോട്ടോകോർപ്പ് 150സിസി ബൈക്ക് സെഗ്മെന്റിൽ നിന്നും പൂർണമായും പിന്മാറി. 160 സിസി എഞ്ചിനുള്ള എക്‌സ്ട്രീം 160R ആണ് ഇനി ഹീറോ മോട്ടോകോർപ്പിന്റെ തുറുപ്പുചീട്ട്.