2016-ലാണ് ഇപ്പോഴുള്ള ആറാം തലമുറ എലാൻട്രയെ ഹ്യൂണ്ടായ് ഇന്ത്യയിലവതരിപ്പിച്ചത്. ലോഞ്ച് ചെയ്തു ഒരാഴ്ചകൊണ്ട് 405 ബുക്കിംഗ് നേടി വാർത്തകളിൽ ഇടം പിടിച്ചിരുന്നു പുതിയ എലാൻട്ര. പിന്നീട് പ്രധാന എതിരാളി സ്കോഡ ഒക്ടേവിയ മുഖം മിനുക്കി എത്തുകയും, ഹോണ്ട സിവിക്കിന്റെ പുത്തൻ തലമുറയെ അവതരിപ്പിക്കുകയും ചെയ്തപ്പോൾ എലാൻട്രയുടെ ഡിമാൻഡ് അല്പം ഇടിഞ്ഞു. ഒരു മിഡ്-ലൈഫ് ഫേസ് ലിഫ്റ്റ് നൽകി എലാൻട്രയെ രണ്ടാമതൊരു അങ്കത്തിനു തയ്യാറാക്കിയിരിക്കുകയാണ് ഹ്യൂണ്ടായ്.
Rs 15.89 ലക്ഷം മുതലാണ് 2019 ഹ്യുണ്ടായ് എലാൻട്ര ഫേസ് ലിഫ്റ്റിന്റെ പ്രാരംഭ വില. എതിരാളികളായ സ്കോഡ ഒക്ടേവിയ, ഹോണ്ട സിവിക്, ടൊയോട്ട കൊറോള അൾട്ടിസ് എന്നിവയുമായി താരതമ്യം ചെയുമ്പോൾ കൂടുതൽ കുറവുമല്ല പ്രാരംഭ വില.
വേരിയൻ്റ് | വില (എക്സ്-ഷോറൂം) |
S | Rs 15.89 ലക്ഷം |
SX | Rs 18.49 ലക്ഷം |
SX AT | Rs 19.49 ലക്ഷം |
SX(O) AT | Rs 20.39 ലക്ഷം |
ഗുഡ്ബൈ ഡീസൽ എൻജിൻ
ഡിസൈനിനെപ്പറ്റിയും ഫീച്ചറുകളെപ്പറ്റിയും പറയുന്നതിന് മുൻപ് പുതിയ എലാൻട്രയുടെ എൻജിൻനെ പറ്റി പറയാം. ഇതുവരെ എലാൻട്ര ലഭ്യമായിരുന്ന 128 എച്പി, 1.6-ലിറ്റർ ഡീസൽ എൻജിൻ ഇനി ലഭ്യമല്ല. ഈ എൻജിനിൽ എന്ന് മാത്രമല്ല ഡീസൽ എൻജിനിൽ ഇനി എലാൻട്ര വില്പനക്കില്ല. 152 എച്പി പവറും, 192 എൻഎം ടോർക്കും ഉത്പാദിപ്പിക്കുന്ന 2.0-ലിറ്റർ പെട്രോൾ എൻജിനിൽ മാത്രമാണ് 2019 എലാൻട്ര വില്പനക്കെത്തിയിരിക്കുന്നത്. 6-സ്പീഡ് മാന്വൽ അല്ലെങ്കിൽ 6-സ്പീഡ് ടോർക്ക് കൺവെർട്ടർ ഓട്ടോമാറ്റിക് ഗിയർബോക്സുകളുമായാണ് ഈ എൻജിൻ ബന്ധിപ്പിച്ചിരിക്കുന്നത്.BS6 മലിനീകരണ നിയന്ത്രണ മാനദണ്ഡങ്ങൾക്കനുസരിച്ചു പരിഷ്കരിച്ച പെട്രോൾ എൻജിൻ ARAI കണക്കനുസരിച്ചു 14.6 കിലോമീറ്റർ മൈലേജ് നൽകും (മാന്വലിലും, ഓട്ടോമാറ്റിക്കിലും).
2019 ഹ്യൂണ്ടായ് എലാൻട്ര - ഡിസൈൻ
അന്താരാഷ്ട്ര വിപണിയിലെ എലാൻട്ര മോഡലുമായി വ്യത്യാസങ്ങളില്ലാതെയാണ് ഇൻഡ്യക്കായുള്ള മോഡലും എത്തിയിരിക്കുന്നത്. ഫ്ലൂയിഡിക് 2.0 ഡിസൈൻ ഭാഷ്യത്തിലെ പ്രധാന ഘടകങ്ങളായ കാസ്കേഡിങ് ഹെക്സഗനൽ ഗ്രിൽ ആണ് മുന്നിലെ പ്രധാന ആകർഷണം. ത്രികോണ ആകൃതിയിലുള്ള ഹെഡ് ലാമ്പുകൾ, ഫോഗ് ലാമ്പുകൾ, മടക്കുകളുള്ള ബോണറ്റ്, വീതി കുറഞ്ഞു നീളം കൂടിയ ടെയിൽ ലാംപ്, പുത്തൻ 16-ഇഞ്ച് അലോയ് വീൽ എന്നിവ 2019 എലാൻട്രയെ മുൻമോഡലിൽനേക്കാൾ പതിന്മടങ്ങു സ്പോർട്ടി ആക്കുന്നുണ്ട്. ഇതുകൂടാതെ മുമ്പിലെയും പിന്നിലെയും ബമ്പറുകളും കാര്യമായി റീഡിസൈൻ ചെയ്തിട്ടുണ്ട്. മറീന ബ്ലൂ, പോളാർ വൈറ്റ്, ടൈഫൂൺ സിൽവർ, ഫാന്റം ബ്ലാക്ക്, ഫിയറി റെഡ് എന്നിങ്ങനെ 5 എക്സ്റ്റീരിയർ നിറങ്ങളാണ് എലാൻട്രക്ക്.
2019 ഹ്യൂണ്ടായ് എലാൻട്ര - ഇന്റീരിയർ ഫീച്ചറുകൾ
കറുപ്പ് നിറത്തിലുള്ള ഇന്റീരിയറിനു പകരം കറുപ്പും ബീജും ചേർന്ന ഡ്യുവൽ-ടോൺ ഇന്റീരിയർ ആണ് പുത്തൻ എലാൻട്രക്ക്. ഡാഷ്ബോർഡിന് കാര്യമായ മാറ്റമില്ലെങ്കിലും ഇൻസ്ട്രുമെന്റ് ക്ലസ്റ്ററിലെ മൾട്ടി ഇൻഫർമേഷൻ ഡിസ്പ്ലേയ്ക്കു വരുത്തിയിരിക്കുന്ന ചില്ലറ പരിഷ്കാരങ്ങൾ ഇന്റീരിയറിനു പുതുമ നൽകുന്നുണ്ട്.
8.0-ഇഞ്ച് ടച് സ്ക്രീൻ ഇന്ഫോടെയ്ന്മെന്റ് സിസ്റ്റം (ആൻഡ്രോയിഡ് ഓട്ടോ, ആപ്പിൾ കാർപ്ലേയ് എന്നിവയടക്കം), 8-സ്പീക്കർ ഇൻഫിനിറ്റി സൗണ്ട് സിസ്റ്റം, വയർലെസ്സ് ചാർജിങ് എന്നിവയാണ് അകത്തെ പ്രധാന മാറ്റങ്ങൾ. ഹ്യൂണ്ടായ് വെന്യു കോംപാക്ട് എസ്യുവിൽ പരിചിതമായ കണക്ടിവിറ്റി സ്യൂട്, ബ്ലൂലിങ്ക് ആണ് മറ്റൊരു ആകർഷണം. ഡ്യുവൽ-സോൺ ക്ലൈമറ്റ് കണ്ട്രോൾ, കൂൾഡ് മുൻനിര സീറ്റുകൾ, ലെതർ അപ്ഹോൾസ്റ്ററി, 10 തരത്തിൽ ക്രമീകരിക്കാവുന്ന ഡ്രൈവർ സീറ്റ്, ഹാൻഡ്സ്-ഫ്രീ ടൈൽഗേറ്റ് ഓപ്പണിങ്, ഇലക്ട്രിക്ക് സൺറൂഫ്, പാർക്കിംഗ് സെൻസറുകൾ, ക്രൂയിസ് കണ്ട്രോൾ എന്നിവയാണ് മറ്റുള്ള ഫീച്ചറുകൾ.
Also read: ഈ മാസം ലോഞ്ച് ചെയ്യുന്ന 7 പുത്തൻ കാറുകളും ബൈക്കുകളും പരിചയപ്പെടാം
സുരക്ഷയുടെ കാര്യത്തിലും ഒട്ടും പിന്നിലല്ല പുതിയ എലാൻട്ര. 6 എയർബാഗുകൾ, ഇബിഡിയോടുകൂടിയ എബിഎസ്, വെഹിക്കിൾ സ്റ്റെബിലിറ്റി കണ്ട്രോൾ, ഹിൽ-സ്റ്റാർട്ട് അസിസ്റ്റ് എന്നിവയാണ് സുരക്ഷാ സന്നാഹങ്ങൾ.