വരവറിയിച്ച് പുത്തൻ ഥാർ, 15,000 കടന്ന് ബുക്കിങ്, ഓട്ടോമാറ്റിക് പതിപ്പിന് പ്രിയം

ഇന്ത്യൻ യൂട്ടിലിറ്റി വാഹന ഭീമന്മാരായ മഹീന്ദ്ര ഈ മാസം രണ്ടാം തിയതിയാണ് രണ്ടാം തലമുറ ഥാറിന്റെ വില പ്രഖ്യാപിച്ചത്. അതെ ദിവസം തന്നെ 2020 ഥാറിന്റെ ബുക്കിങ്ങും കമ്പനി ആരംഭിച്ചു. രണ്ടാഴ്ച പിന്നിടുമ്പോൾ 15,000 കടന്ന് ബുക്കിങ് കുതിക്കുകയാണ് എന്ന് മഹിന്ദ്ര വ്യക്തമാക്കി. ഇത് കൂടാതെ തങ്ങളുടെ ഡീലർഷിപ്പുകളിൽ ഇതിനകം ഥാറിനായി 65,000-ൽ അധികം അന്വേഷണങ്ങളും ലഭിച്ചു എന്നും 8 ലക്ഷത്തോളം പേരാണ് പുത്തൻ ഥാറിനായി ഒരുക്കിയ വെബ്‌സൈറ്റ് സന്ദർശിച്ചത് എന്നും മഹീന്ദ്ര പത്രക്കുറിപ്പിൽ വ്യക്തമാക്കി.

തിരഞ്ഞെടുത്ത 18 നഗരങ്ങളിൽ മാത്രമേ പുത്തൻ ഥാർ ഈ മാസം പകുതി വരെ ടെസ്റ്റ് ഡ്രൈവിനായി ലഭ്യമായിരുന്നുള്ളു. മറ്റുള്ള നഗരങ്ങളിലേക്ക് കഴിഞ്ഞ ആഴ്ച മുതലാണ് ഥാർ യൂണിറ്റുകൾ എത്തിത്തുടങ്ങിയത്. ഇത് വരും ദിവസങ്ങളിൽ ബുക്കിങ് സംഖ്യാ ഗണ്യമായി ഉയർത്തും എന്ന് മഹിന്ദ്ര കണക്ക് കൂട്ടുന്നു.


പൃഥ്വിരാജ് ആരാധകൻ, പക്ഷെ കേരളത്തിലെ ആദ്യ സെലിബ്രിറ്റി മഹീന്ദ്ര ഥാർ ഉടമ...

ഇതുവരെ ഥാർ ബുക്ക് ചെയ്തിട്ടുള്ളവരിൽ 57 ശതമാനം പേരും ആദ്യമായി ഒരു വാഹനത്തിന്റെ ഉടമയാകാൻ പോകുന്നവരാണ്. മാന്വൽ മോഡലിനേക്കാൾ ഓട്ടോമാറ്റിക് മോഡലുകൾക്കാണ് ആവശ്യക്കാർ, മഹീന്ദ്രയുടെ പത്രക്കുറിപ്പ് വ്യക്തമാക്കുന്നു. അടുത്ത മാസം ഒന്നിനാണ് പുത്തൻ ഥാറിന്റെ ഡെലിവറി മഹീന്ദ്ര ക്രമീകരിച്ചിരിക്കുന്നത്.

മഹീന്ദ്ര ഥാർ

അടിസ്ഥാന മോഡൽ AX പെട്രോളിന് 9.80 ലക്ഷം മുതൽ ഏറ്റവും ഉയർന്ന മോഡൽ ആയ LX ഡീസലിന് 13.75 ലക്ഷം വരെയാണ് പുത്തൻ ഥാറിന്റെ വില. ഹാർഡ് ടോപ്, കൺവെർട്ടബിൾ ടോപ്, സോഫ്റ്റ് ടോപ് എന്നീ ബോഡി സ്റ്റൈലിൽ പെട്രോൾ, ഡീസൽ, മാന്വൽ, ഓട്ടോമാറ്റിക് എന്നിങ്ങനെ പതിമൂന്നോളം വേരിയന്റുകളിൽ പുത്തൻ ഥാർ വാങ്ങാം. ജിമ്മിൽ പോയി മസിൽ പെരുപ്പിച്ചവനെ പോലെയാണ് പുത്തൻ ഥാർ. ബോക്‌സി രൂപം, വൃത്താകൃതിയിലുള്ള ഹെഡ്‍ലാംപ്, പുറകിൽ ഘടിപ്പിച്ച സ്പെയർ വീൽ എന്നീ ഘടകങ്ങൾ രണ്ടാം തലമുറ മോഡലിലും മാറ്റമില്ലാതെ തുടരുന്നു. അതെ സമയം ത്തൻ ഡിസൈനിലുള്ള എൽഇഡി ടെയിൽ ലൈറ്റുകൾ, ചാർക്കോൾ ഗ്രേ നിറത്തിലുള്ള 18-ഇഞ്ച് അലോയ് വീലുകൾ, കട്ടി കൂടിയ ക്യാപ്പോടുകൂടിയ റിയർ വ്യൂ മിറർ, വീതിയേറിയ മുന്നിലെയും പിന്നിലെയും സ്‌പോർട്ടി ബമ്പറുകൾ എന്നിവ പുത്തൻ ഥാറിൻ്റെ സ്റ്റൈൽ വർദ്ധിപ്പിക്കുന്നു.

ലേലം പൊടിപൊടിച്ചു! Rs 1.11 കോടി നേടി ആദ്യ 2020 മഹീന്ദ്ര ഥാർ
ആദ്യമായി ഥാർ പെട്രോൾ എൻജിനിലും ലഭ്യമാണ് എന്നതാണ് 2020 മോഡലിന്റെ മറ്റൊരു പ്രത്യേകത. 152 എച്ച്പി പവറും 320 എൻഎം ടോർക്കും നിർമ്മിക്കുന്നതാണ് പുതിയ 2.0 ലിറ്റർ 'എംസ്റ്റാലിയൻ' പെട്രോൾ എഞ്ചിൻ. 132 എച്ച്പി പവറും 300 എൻഎം ടോർക്കും നിർമ്മിക്കുന്നതാണ് 2.2 ലിറ്റർ എംഹോക്ക് ഡീസൽ എഞ്ചിൻ. 6 സ്പീഡ് മാന്വൽ, ഐസിൻ 6 സ്പീഡ് ടോർക്ക് കൺവെർട്ടർ ഓട്ടോമാറ്റിക്ക് ഗിയർബോക്‌സുകളിൽ ഈ എൻജിൻ ലഭ്യമാണ്.