2020 ടാറ്റ ഹാരിയർ പെട്രോൾ എഞ്ചിനുമായി ഉടനെത്തും

കഴിഞ്ഞ വർഷം ജനുവരിയിലാണ് ടാറ്റ മോട്ടോർസ് തങ്ങളുടെ പുത്തൻ എസ്‌യുവി ഹാരിയറിനെ വിപണിയിലെത്തിച്ചത്. ഈ വർഷം ഓട്ടോ എക്‌സ്‌പോയിൽ ബിഎസ്6 എൻജിനൊപ്പം പരിഷ്കരിച്ച ഹരിയർ മോഡലും ടാറ്റ വിപണിയിലെത്തിച്ചു. ഇക്കാലമത്രയും ഡീസൽ എൻജിനിൽ മാത്രമാണ് ഹാരിയർ വില്പനയിലുള്ളത്. അതെ സമയം പെട്രോൾ എഞ്ചിനുള്ള ഹാരിയർ മോഡലിന്റെ വരവിന് അധികം താമസമില്ല എന്നാണ് റിപ്പോർട്ടുകൾ.

പെട്രോൾ എഞ്ചിനുമായി ടാറ്റ ഹാരിയർ എസ്‌യുവികൾ പരീക്ഷണ ഓട്ടത്തിലാണ്. അടുത്ത മാസം തന്നെ ഹാരിയർ പെട്രോൾ വിപണിയിലെത്തും എന്നാണ് റിപ്പോർട്ടുകൾ. ബിഎസ്6 മലിനീകരണ നിയന്ത്രണ മാനദണ്ഡങ്ങൾ പാലിക്കുന്ന 1.5 ലിറ്റര്‍ ഡയറക്ട് ഇഞ്ചക്ഷന്‍ ടര്‍ബോചാര്‍ജ്ഡ് എന്‍ജിനായിരിക്കും ഹാരിയര്‍ പെട്രോള്‍ മോഡലിന്റെ ഹൃദയം. ടാറ്റ ടിയാഗോയിലും ടിഗോറിലും പ്രവർത്തിക്കുന്ന 1.2 റെവോട്രോണ്‍ എൻജിന്റെ ഡിസ്പ്ലേസ്‌മെന്റ് കൂടിയ നാല് സിലിണ്ടര്‍ പതിപ്പാണിത്. 150 ബിഎച്ച്പി പവറും 250 എന്‍എം ടോര്‍ക്കുമാണ് എന്‍ജിന്‍ ഉത്പാദിപ്പിക്കുക. തുടക്കത്തിൽ ആറ് സ്പീഡ് മാനുവല്‍ ആയിരിക്കും പെട്രോള്‍ മോഡലിലെ ട്രാന്‍സ്മിഷൻ. 6-സ്പീഡ് ഓട്ടോമാറ്റിക് ഗിയർബോക്‌സ് പിനീട് കൂട്ടിച്ചേർക്കും.


ഫെബ്രുവരിയിൽ പരിഷ്കരിച്ചു വിപണിയിലെത്തിയ ടാറ്റ ഹാരിയർ ഡീസൽ മോഡലുകൾക്ക് Rs 13.69 ലക്ഷം മുതൽ Rs 20.25 ലക്ഷം വരെയാണ് വില (16 വേരിയന്റ് ഓപ്ഷനുകൾ). XE, XM, XT, XZ എന്നീ വേരിയന്റുകളുടെ അടിസ്ഥാന വില ഏകദേശം Rs 11.5 ലക്ഷത്തിന് ആരംഭിക്കാനാണ് സാദ്ധ്യത.

2020 ടാറ്റ ഹാരിയർ

ഭാരത് സ്റ്റേജ് 6 (BS6) മലിനീകരണ നിയന്ത്രണ മാനദണ്ഡങ്ങൾ പാലിക്കും വിധം പരിഷ്കരിച്ച 2.0-ലിറ്റർ ക്രയോടെക്‌ ഡീസൽ എൻജിനാണ് 2020 ഹാരിയറിലെ പ്രധാന മാറ്റം. മാറ്റങ്ങളുടെ ഭാഗമായി 140 എച്പി പവർ ഉത്പാദിപ്പിച്ചിരുന്ന എൻജിന്റെ പവർ 30 എച്പി കൂടി ഇപ്പോൾ 170 എച്ച്പി ആണ്. ഓട്ടോമാറ്റിക് ഗിയർബോക്‌സ് ആണ് 2020 ടാറ്റ ഹാരിയാറിലെ മറ്റൊരു ആകർഷണം. 6-സ്പീഡ് മാന്വൽ ഗിയർബോക്‌സിൽ മാത്രം ലഭിച്ചിരുന്ന ഹാരിയർ 6-സ്പീഡ് ഓട്ടോമാറ്റിക് ഗിയർബോക്‌സിലും ഇനി ലഭിക്കും.

Also read: കിംഗ് ഖാൻ്റെ കയ്യും പിടിച്ച് പുതുപുത്തൻ ഹ്യൂണ്ടായ് ക്രെറ്റ എത്തി

XE, XM, XT, XZ എന്നീ വേരിയന്റുകൾ കൂടാതെ XZ+, XZA+ എന്നിങ്ങനെ രണ്ട് പുതിയ ടോപ്-എൻഡ് വേരിയന്റുകൾ 2020 ഹാരിയറിൽ ടാറ്റ അവതരിപ്പിച്ചിട്ടുണ്ട്. പനോരമിക് സൺറൂഫ്, ലംബർ സപ്പോർട്ടുള്ള 6-രീതിയിൽ ക്രമീകരിക്കാവുന്ന ഇലക്ട്രിക്ക് ഡ്രൈവർ സീറ്റ്, ഓട്ടോ ഡിമ്മിംഗ് റിയർ വ്യൂ മിററുകൾ, ടു-ടോൺ ഡയമണ്ട് കട്ട് R17 അലോയ് വീലുകൾ എന്നിവയാണ് ഈ മോഡലുകളിൽ അധികമായുള്ള ഫീച്ചറുകൾ. കാലിപ്സോ റെഡ് എന്ന പുതിയ നിറം, കൂടുതൽ എയ്റോ ഡൈനാമിക്കാവുംവിധം റീഡിസൈൻ ചെയ്ത റിയർ വ്യൂ മിറർ എന്നിവയാണ് 2020 ടാറ്റ ഹാരിയറിലെ മറ്റുള്ള കൂട്ടിച്ചേർക്കലുകൾ.