കഴിഞ്ഞ വർഷം ഫെബ്രുവരിയിൽ വില്പനക്കെത്തേണ്ടിയിരുന്ന ഹാരിയർ എസ്‌യുവിയുടെ 7 സീറ്റർ ചേട്ടനെയാണ് പുത്തൻ സഫാരി എന്ന പേരിൽ അടുത്ത മാസം ടാറ്റ വില്പനക്കെത്തിക്കുക. ഇത്രയും കാലം ഗ്രാവിറ്റാസ് എന്ന പേരിൽ അറിയപ്പെട്ടിരുന്ന എസ്‌യുവിക്കാണ് ലോഞ്ചിന് ദിവസങ്ങൾ ശേഷിക്കെ പേര് മാറ്റം. കഴിഞ്ഞ ദിവസം, ജനുവരി 26 റിപ്പബ്ലിക്ക് ദിനത്തിലാണ് 2021 സഫാരിയെ ടാറ്റ മോട്ടോർസ് പൂർണമായും അവതരിപ്പിച്ചത്. പുത്തൻ സഫാരിയെപ്പറ്റി വിശദമായറിയാം.
ഹരിയറിന്റെ വല്യേട്ടൻ
ഒറ്റ നോട്ടത്തിൽ തന്നെ ഹരിയറിന്റെ ചേട്ടൻ എന്ന് തോന്നിപ്പിക്കുന്ന ഡിസൈൻ ആണ് പുത്തൻ സഫാരിയ്ക്ക്. അതെ സമയം ക്രോമിൽ പൊതിഞ്ഞ ടാറ്റായുടെ ട്രൈ-ആരോ ഷെയ്പ്പുലുള്ള ഗ്രിൽ, സഫാരി എന്നെഴുതിയ ക്രോം ഡീറ്റൈലിങ്ങുള്ള റൂഫ് റെയിൽ എന്നിവയാണ് ആദ്യകാഴ്ചയിൽ പ്രകടമായ വ്യത്യാസങ്ങൾ. സി-പില്ലറിന് ശേഷമാണ് പുത്തൻ സഫാരി ഹാരിയറിൽ നിന്നും തികച്ചും വ്യത്യസ്തമാവുന്നത്. പരമ്പരാഗത എസ്യുവി സങ്കല്പത്തിന് യോജിക്കുംവിധം ബോക്‌സിയാണ് പുത്തൻ സഫാരിയുടെ പിൻവശം. പുതിയ ബൂട്ട് ലിഡ്, റീഡിസൈൻ ചെയ്ത ടെയിൽ ലാംപ്, പുതിയ സ്പോയ്ലർ എന്നിവയാണ് മറ്റുള്ള ആകർഷണങ്ങൾ. ഹരിയറിന് സമാനമായ ഇംപാക്റ്റ് ഡിസൈൻ 2.0 ഡിസൈൻ ഭാഷ്യം അനുസരിച്ചാണ് പുത്തൻ സഫാരിയും ഒരുക്കിയിരിക്കുന്നത്. റോയൽ ബ്ലൂ, ഡേറ്റോണാ ഗ്രെ, ഓർക്കസ് വൈറ്റ് എന്നിങ്ങനെ 3 നിറങ്ങളിൽ മാത്രമേ 2021 സഫാരി വാങ്ങാൻ സാധിക്കൂ.
ലുക്ക് മാറ്റിപ്പിടിച്ച് 2021 ജീപ്പ് കോമ്പസ് വിപണിയിൽ; വില 16.99 ലക്ഷം മുതൽ
മൂന്നാം നിര സീറ്റിനായി നീളം കൂട്ടി
ഹാരിയറിന് സമാനമായി ലാൻഡ് റോവറിന്റെ D8ൽ നിന്ന് വേർതിരിച്ചെടുത്ത ഒമേഗ പ്ലാറ്റ്‌ഫോമിലാണ് 2021 സഫാരിയും നിർമിച്ചിരിക്കുന്നത്. 4,661 എംഎം നീളം, 1,894 എംഎം വീതി, 1,786 എംഎം ഉയരം എന്നിങ്ങനെയാവും പുത്തൻ സഫാരിയുടെ അളവുകൾ. ഹാരിയറിനേക്കാൾ 63 എംഎം നീളവും 80 എംഎം ഉയരവും കൂടുതലാണ് വീണ്ടുമെത്തുന്ന സഫാരിയ്ക്ക്. വീൽബേസ് മാറ്റമില്ലാതെ 2741 എംഎമ്മിൽ തുടരും.
അളവുകളിലെ മേല്പറഞ്ഞ മാറ്റങ്ങൾ വരുത്തിയിരിക്കുന്നത് ഇന്റീരിയറിൽ മൂന്നാം നിര സെറ്റിങ് ഉൾപ്പെടുത്താനാണ്. 889 എംഎം ഹെഡ്റൂം, 832 എംഎം ലെഗ്‌റൂം എന്നിവ മൂന്നാം നിരയിൽ യാത്ര ചെയ്യുന്നവർക്കുണ്ടാവും. ഒപ്പം പ്രത്യേക എസി വെന്റുകൾ, യുഎസ്ബി മൊബൈൽ ചാർജർ, ഹോൾഡർ, റീഡിങ് ലാംപ് എന്നിവ മൂന്നാം നിരയ്ക്കായി ഒരുക്കിയിട്ടുണ്ട്.
ലക്ഷ്വറി എസ്യുവി മുതൽ സൂപ്പർബൈക്ക് വരെ; ജോജു ജോർജിന്റെ വാഹന ശേഖരം
ഇന്റീരിയർ, ഫീച്ചറുകൾ
ഹാരിയറിന് സമാനമാണ് സഫാരിയുടെയും. പക്ഷെ ഓയിസ്റ്റർ വൈറ്റ് ഇന്റീരിയർ തീമും, ആഷ് വുഡ് ഡാഷ്ബോർഡ് ഇൻസേർട്ടുകളും 2021 സഫാരിയുടെ ഇന്റീരിയർ അല്പം കൂടെ റിച്ച് ആക്കും. 8.8-ഇഞ്ച് ഫ്ലോട്ടിങ് ഡിസ്പ്ലെയുള്ള ഡാഷ്ബോർഡ്, മൂന്ന് സ്പോക് സ്റ്റിയറിംഗ് വീൽ, 9-സ്പീക്കർ ജെബിഎൽ സൗണ്ട് സിസ്റ്റം, പനോരമിക് സൺറൂഫ്, ആംബിയന്റ് ലൈറ്റിംഗ്, പുഷ്-ബട്ടൺ സ്റ്റാർട്ട്, റെയിൻ സെൻസിംഗ് വൈപ്പറുകൾ, ഇലക്ട്രിക്കലി അഡ്ജസ്റ്റബിൾ, ഫോൾഡബിൾ റിയർവ്യൂ മിററുകൾ എന്നിവയാണ് പ്രധാന ഫീച്ചറുകൾ. 7 സീറ്റർ, 6 സീറ്റർ എന്നിങ്ങനെ 2 സീറ്റിംഗ്‌ കോൺഫിഗറേഷനിൽ പുത്തൻ സഫാരി ലഭ്യമാണ്. 6 സീറ്റർ പതിപ്പിൽ രണ്ടാം നിരയിൽ ബക്കറ്റ് സീറ്റുകളാണ്. XE, XM, XT, XT+, XZ, XZ+ എന്നിങ്ങനെ 6 വേരിയന്റുകളിലാണ് 2021 ടാറ്റ സഫാരി വില്പനക്കെത്തുക.
ഡിസ്‌പ്ലേയ്ക്ക് വച്ച കാർ വിറ്റു, അടുത്ത ദിവസം തിരികെ ചോദിച്ച് ഡീലർഷിപ്പ്
എൻജിൻ ഗിയർബോക്‌സ്
ഹാരിയറിനെ ചലിപ്പിക്കുന്ന 2.0-ലിറ്റർ ക്രയോടെക്‌ ഡീസൽ എൻജിൻ തന്നെയാണ് പുത്തൻ ടാറ്റ എസ്‌യുവിയെയും ചലിപ്പിക്കുക. ഭാരത് സ്റ്റേജ് 6 (BS6) മലിനീകരണ നിയന്ത്രണ മാനദണ്ഡങ്ങൾ പാലിക്കും വിധം പരിഷ്കരിച്ച എൻജിൻ 170 എച്ച്പി പവർ നിർമ്മിക്കും. 6-സ്പീഡ് മാന്വൽ, 6-സ്പീഡ് ഓട്ടോമാറ്റിക് എന്നിവയാണ് ഗിയർബോക്‌സ് ഓപ്ഷനുകൾ.