7-സീറ്റുമായി ഫോക്സ്‌വാഗൺ ടിഗ്വാൻ ഓൾസ്പേസ് വിപണിയിൽ

ഇന്ത്യയ്ക്കായി പ്രത്യേകം തയ്യാറാക്കിയ കോംപാക്ട് എസ്‌യുവി ടൈഗൺ, മിഡ് സൈസ് എസ്‌യുവി ടി-റോക്ക്, 7-സീറ്റർ എസ്‌യുവി ടിഗ്വാൻ ഓൾസ്പേസ്, ഇലക്ട്രിക്ക് എസ്‌യുവി കോൺസെപ്റ്റ് ഐഡി.ക്രോസ് എന്നീ നാല് എസ്‌യുവികൾ കഴിഞ്ഞ മാസം ഓട്ടോ എക്‌സ്‌പോയിൽ അവതരിപ്പിച്ച ഫോക്സ്‌വാഗൺ ഇക്കൂട്ടത്തിലെ ആദ്യ എസ്‌യുവി ഇന്ത്യയിൽ ലോഞ്ച് ചെയ്തു. 7 സീറ്റർ എസ്‌യുവിയായ ടിഗ്വാൻ ഓൾസ്പേസ് ആണ് ആണ് വില്പനക്കെത്തിയത്.

എല്ലാ ഫീച്ചറുകളും നിറച്ച ഒരൊറ്റ വേരിയന്റിൽ വില്പനക്കെത്തിയിരിക്കുന്ന ടിഗ്വാൻ ഓൾസ്പേസ് Rs 33.12 ലക്ഷം ആണ് എക്‌സ്-ഷോറൂം വില. ഇന്ത്യയിൽ വില്പനയിലുള്ള 5-സീറ്റർ ടിഗ്വാൻ എസ്‌യുവി മോഡലിനേക്കാൾ ഏകദേശം 5 ലക്ഷം രൂപ കൂടുതലാണ് 7-സീറ്റർ വകഭേദമായ ടിഗ്വാൻ ഓൾസ്പേസിന്. മൂന്നാം നിര സീറ്റ് കൂട്ടിച്ചേർക്കാൻ ഓൾസ്പേസിന്റെ നീളം 215 എംഎമ്മും വീൽബേസ് 110 എംഎം വൊൽക്‌സ്വാഗൺ വർദ്ധിപ്പിച്ചുട്ടുണ്ട്. ഓൾസ്പേസിന്റെ മറ്റെല്ലാ അളവുകളും അഞ്ച് സീറ്റർ ടിഗ്വാന് സമാനമാണ്.


ടിഗ്വാനേക്കാൾ അല്പം വലിപ്പം കൂടിയ പിൻ സ്പോയ്ലർ ആണ് ഓൾസ്പേസിന്. മാത്രമല്ല ഇത് കറുപ്പിൽ പൊതിഞ്ഞിട്ടുണ്ട്. ചെറുതായി രൂപമാറ്റം വരുത്തിയ മുൻ,പിൻ ബമ്പറുകൾ, പുത്തൻ ഡിസൈനിലുള്ള ഡ്യുവൽ-ടോൺ 17-ഇഞ്ച് അലോയ് വീൽ, ക്രോമിൽ പൊതിഞ്ഞ വിൻഡോ ലൈൻ, ട്വിൻ എക്സ്ഹോസ്റ്റ് പൈപ്പ് എന്നിവ ഓൾസ്പേസിനെ 5-സീറ്റർ ടിഗ്വാനിൽ നിന്ന് വ്യത്യസ്തമാക്കുന്നു. പെട്രോളിയം ബ്ലൂ, പൈറിറ്റ് സിൽവർ, പ്യൂർ വൈറ്റ്, റൂബി റെഡ്, ഹബാനേരോ ഓറഞ്ച്, ഡീപ് ബ്ലാക്ക് പേൾ, പ്ലാറ്റിനം ഗ്രേ എന്നിങ്ങനെ 7 നിറങ്ങളിലാണ് ടിഗ്വാൻ ഓൾസ്പേസ് വിപണയിലെത്തിയിരിക്കുന്നത്.

വെല്‍ഫയർ മാത്രമല്ല, മോഹൻലാലിന്റെ വാഹനശേഖരം കാണാം

പനോരമിക് സൺറൂഫ്, പൂർണ്ണ ഡിജിറ്റൽ ഇൻസ്ട്രുമെന്റ് ക്ലസ്റ്റർ, 3-സോൺ ഓട്ടോമാറ്റിക് ക്ലൈമറ്റ് കൺട്രോൾ, ബീജ് 'വിയന്ന' ലെതർ സീറ്റുകൾ, കീലെസ് എൻട്രി, ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റം എന്നിങ്ങനെ ഫീച്ചർ സമൃദ്ധമാണ് ടിഗ്വാൻ ഓൾസ്പേസ്. സുരക്ഷയ്ക്കായി ഏഴ് എയർബാഗുകൾ, എബി‌എസ്, ഇ‌എസ്‌പി, ടയർ പ്രഷർ മോണിറ്ററിംഗ് സിസ്റ്റം, റിയർ പാർക്കിംഗ് ക്യാമറ എന്നിവ സജ്ജീകരിച്ചിട്ടുണ്ട്.

187 ബിഎച്ച്പി പവർ, 320 എൻഎം ടോർക്ക് നിർമിക്കുന്ന ബിഎസ്6 മലിനീകരണ നിയന്ത്രണ മാനദണ്ഡങ്ങൾ പാലിക്കുന്ന 2.0 ലിറ്റർ ടിഎസ്ഐ എഞ്ചിൻ ആണ് ടിഗ്വാൻ ഓൾസ്പേസിന്റെ ഹൃദയം. ഈ എൻജിൻ 7-സ്പീഡ് ഡിഎസ്ജി ഓട്ടോമാറ്റിക് ട്രാൻസ്മിഷനുമായാണ് ബന്ധിപ്പിച്ചിരിക്കുന്നത്. ടിഗ്വാൻ ഓൾസ്പേസിൽ 4 മോഷൻ ഓൾ-വീൽ ഡ്രൈവ് (എഡബ്ല്യുഡി) സംവിധാനവുമുണ്ട്. ഡ്രൈവിംഗ് കൂടുതൽ ഇഷ്‌പ്പെടുന്നവരെ തൃപ്തിപ്പെടുത്തും വിധം പാഡിൽ ഷിഫ്റ്ററുകൾ ടിഗ്വാൻ ഓൾസ്പേസിൽ ഉൾക്കൊള്ളിച്ചിട്ടുണ്ട്.

ടിഗ്വാൻ ഓൾസ്പേസിൻ്റെ വരവോടെ 5-സീറ്റർ ടിഗ്വാൻ ഫോക്സ്‌വാഗൺ ഇന്ത്യ പിൻവലിക്കും. പകരം സ്‌പോർട്ടി ക്രോസ്സ്ഓവർ എസ്‌യുവിയായ ടി-റോക്ക് ഉടൻ വില്പനക്കെത്തും. സ്‌കോഡ കൊഡിയാക്ക് ആണ് ഫോക്സ്‌വാഗൺ ടിഗ്വാൻ ഓൾസ്പേസിന്റെ പ്രധാന എതിരാളി.