Seltos Price Hike: വില കൂട്ടാനൊരുങ്ങി കിയ, സെൽറ്റോസ് വാങ്ങുന്നെങ്കിൽ ഇപ്പോൾ വാങ്ങണം

കിയ മോട്ടോഴ്സിന്റെ സെൽറ്റോസ് വാങ്ങാൻ പദ്ധതിയുണ്ടോ? ലാഭകരമായി സെൽറ്റോസ് സ്വന്തമാക്കണമെങ്കിൽ അടുത്തുള്ള ഡീലർഷിപ്പിലോ ഓൺലൈനായോ ഉടൻ ബുക്ക് ചെയ്യുക. ജനുവരി ഒന്ന് മുതൽ സെൽറ്റോസിന്റെ വില കൂട്ടുകയാണ് കിയ മോട്ടോർസ് ഇന്ത്യ. എത്ര ശതമാനമാണ് സെൽറ്റോസിന്റെ വില കൂട്ടുക എന്ന് കിയ മോട്ടോർസ് വ്യക്തമാക്കിയിട്ടില്ല എങ്കിലും എല്ലാ വേരിയന്റുകൾക്കും കാര്യമായ വർധനയുണ്ടാകും എന്ന് കമ്പനിയുടെ ഡീലർഷിപ്പുകൾക്കുള്ള കത്ത് വ്യക്തമാക്കുന്നു.

ഡിസംബർ 31 വരെ സെൽറ്റോസ് ഡെലിവറി ലഭിക്കുന്ന ഉപഭോക്താക്കൾ ഇപ്പോഴുള്ള ഇൻട്രൊഡക്ടറി വില തന്നെ മുടക്കിയാൽ മതി. പക്ഷെ, ജനുവരി ഒന്ന് മുതൽ സെൽറ്റോസ് ഡെലിവറിയെടുക്കുന്നവർ വർധിപ്പിച്ച തുക മുടക്കേണ്ടി വരും. സെൽറ്റോസിന്റെ ഓരോ വേരിയന്റിനും ഏകദേശം 25,000 രൂപ മുതൽ 30,000 വരെയാണ് വില കൂടുക.

Also read: കിയ സെൽറ്റോസ് എക്‌സ്-ലൈൻ കോൺസെപ്റ്റുകൾ, ഇത് എജ്ജാതി മോഡിഫിക്കേഷൻ!

ഓഗസ്റ്റിൽ വില്പനക്കെത്തിയപ്പോൾ എതിരാളികളെ മലർത്തിയടിച്ച വില തന്നെയായിരുന്നു കിയ സെൽറ്റോസിന്റെ പ്രധാന ആകർഷണം. Rs 9.69 ലക്ഷം മുതൽ Rs 15.99 ലക്ഷം വരെ എക്‌സ്-ഷോറൂം വിലയിൽ ഏകദേശം 16 വേരിയന്റുകളിലാണ് സെൽറ്റോസ് ഇപ്പോൾ വിപണിയിലുള്ളത്. 1.5-ലീറ്റർ സ്മാർട്ട് സ്ട്രീം പെട്രോൾ, 1.5-ലീറ്റർ സിആർഡിഐ ഡീസൽ, 1.4-ലീറ്റർ സ്മാർട്ട്സ്ട്രീം ടർബോ-പെട്രോൾ എന്നിങ്ങനെ മൂന്ന് എൻജിൻ ഓപ്ഷനുകൾ 6-സ്പീഡ് മാനുവൽ, 6-സ്പീഡ് ടോർക്ക് കൺവെർട്ടർ ഓട്ടോമാറ്റിക്ക്, 7-സ്പീഡ് ഡിസിടി, ഐവിടി എന്നിങ്ങനെ നാലു ട്രാൻസ്മിഷനുകൾ, HTE , HTK, HTK+, HTX, HTX+, GTK, GTX, GTX+ എന്നീ ഗ്രേഡുകൾ എന്നിവ പല രീതിയിൽ യോജിപ്പിച്ചാണ് കിയ സെൽറ്റോസിന് പതിനാറോളം വേരിയന്റുകൾ. മേല്പറഞ്ഞ എല്ലാ എൻജിനുകളും അടുത്ത വർഷം നിലവിൽ വരുന്ന BS6 മലിനീകരണ നിയന്ത്രണ മാനദണ്ഡങ്ങൾ പാലിക്കുന്നവയുമാണ്.

Also read: സത്യം...സെൽറ്റോസിന്റെ കോപ്പിയടിയല്ല ചൈനയിലെ കെഎക്സ്3

ഇന്ത്യൻ വിപണിയിലെത്തിയതിൽ പിന്നെ കിയ സെൽറ്റോസിന് തിരിഞ്ഞു നോക്കേണ്ടി വന്നിട്ടില്ല. ഇന്ത്യയിൽ ഒരു പുതിയ വാഹന നിർമ്മാതാവായിരുന്നിട്ടും ആദ്യ 9 ദിവസം കൊണ്ട് 6,200-ലധികം വില്പനയാണ് സെൽറ്റോസ് നേടിയത്. സെപ്റ്റംബറിൽ 7,754 സെൽറ്റോസ് യൂണിറ്റുകൾ വിറ്റഴിച്ച കിയ മോട്ടോർസ് ഒക്ടോബറിൽ നില കൂടുതൽ ഭദ്രമാക്കി 12,800 യൂണിറ്റിന്റെ വില്പന നേടി. നവംബർ അവസാനിക്കാനിരിക്കെ ഈ മാസത്തെ വിൽപ്പനയിലും സെൽറ്റോസ് സ്വന്തം റെക്കോർഡ് തിരുത്താനാണ് സാധ്യത.

Also read: വില്പനയിൽ സ്വന്തം റെക്കോർഡ് തിരുത്തി കിയ സെൽറ്റോസ്

അര ലക്ഷത്തിലധികം ബുക്കിങ്ങ് ഇതുവരെ നേടിയ കിയ സെൽറ്റോസ് വേരിയന്റുകൾക്ക് മൂന്നു മാസത്തിൽ കൂടുതലാണ് പലയിടത്തും വെയ്റ്റിംഗ് പീരീഡ്. ഇപ്പോഴും കുറയാത്ത സെൽറ്റോസിന്റെ ഡിമാൻഡ് കണക്കിലെടുക്കുമ്പോൾ ഇനി വരുന്ന മാസങ്ങളിലും വില്പനയിൽ മുന്നേറ്റം പ്രതീക്ഷിക്കാം. ഹ്യൂണ്ടായ് ക്രെറ്റ, എംജി ഹെക്ടർ, ടാറ്റ ഹാരിയർ, മഹിന്ദ്ര എക്‌സ്യുവി500, ജീപ്പ് കോമ്പസ് എന്നീ മോഡലുകളെക്കാൾ വിപണിയിൽ കിയ സെൽറ്റോസിന്റെ എതിരാളികൾ. വിപണയുടെ കാര്യത്തിൽ എല്ലാ എതിരാളികളെക്കാളും ബഹുദൂരം മുന്നിലാണ് കിയ സെൽറ്റോസ്.