ജാപ്പനീസ് കാർ നിർമാതാക്കളായ ഹോണ്ടയുടെ വാഹന നിരയിലെ എസ്യുവി മോഡൽ ആയ സിആർ-വിയുടെ പരിഷ്കരിച്ച പതിപ്പ് ഇന്ത്യയിൽ സ്പെഷ്യൽ എഡിഷൻ മോഡലായി അവതരിപ്പിച്ചു. ഒരൊറ്റ വേരിയന്റിൽ അവതരിപ്പിച്ചിരിക്കുന്ന സിആർ-വി സ്പെഷ്യൽ എഡിഷൻ മോഡലിന് 29.50 ലക്ഷം രൂപയാണ് എക്സ് ഷോറൂം വില. ഇപ്പോൾ വില്പനയിലുള്ള സിആർ-വി മോഡലിനേക്കാൾ 1.23 ലക്ഷം രൂപ കൂടുതലാണ് സ്പെഷ്യൽ എഡിഷൻ മോഡലിന്. കൂടുതൽ തുകയ്ക്ക് സ്റ്റൈലിംഗ് പരിഷ്കാരങ്ങളോടൊപ്പം കൂടുതൽ ഫീച്ചറുകളും ഹോണ്ട കാർസ് ഇന്ത്യ ചേർത്തിട്ടുണ്ട്.
ക്രോമിന്റെ സാന്നിദ്ധ്യം കുറച്ച് ഗ്ലോസ് ബ്ലാക്ക് ഫിനിഷിലുള്ള ഗ്രിൽ, കുത്തനെയുള്ള ക്രോം ലൈനിംഗും പുതിയ എയർ ഡാമുമുള്ള റീഡിസൈൻ ചെയ്ത ബമ്പർ, ക്രോം ഗാർണിഷുള്ള പിൻ ബമ്പർ, പുത്തൻ ഡിസൈനിലുള്ള 18-ഇഞ്ച് വീലുകൾ എന്നിവയാണ് എക്സ്റ്റീരിയറിൽ സിആർ-വി സ്പെഷ്യൽ എഡിഷൻ മോഡലിന്റെ ആകർഷണങ്ങൾ.
ഉത്സവകാലം കളറാക്കാൻ ഹോണ്ട അമെയ്സ് സ്പെഷ്യൽ എഡിഷൻ വിപണിയിൽ
ഇന്റീരിയറിൽ മാറ്റങ്ങൾ ഒന്നും തന്നെയില്ല എങ്കിലും ഫീച്ചറുകൾ വർദ്ധിപ്പിച്ചിട്ടുണ്ട്. നാല് രീതിയിൽ ക്രമീകരിക്കാവുന്ന പാസഞ്ചർ സീറ്റ്, ഹാൻഡ്സ്- ഫ്രീ ടെയിൽ ഗെയ്റ്റ്, ഓട്ടോ ഫോൾഡിങ് റിയർവ്യൂ മിററുകൾ മുൻപിൽ പാർക്കിംഗ് സെൻസറുകൾ, കൊർന്നേറിങ് ഫങ്ക്ഷനുള്ള എൽഇഡി ഹെഡ്ലാംപ് എന്നിവയാണ് പ്രധാന ഫീച്ചറുകൾ. ഇത് കൂടാതെ റണ്ണിങ് ബോർഡ്, ഡോർസ്റ്റെപ് ഇല്ല്യൂമിനേഷൻ, മിറർ ഗാർണിഷ് എന്നിവയും സ്പെഷ്യൽ എഡിഷൻ മോഡലിൽ കൂട്ടിച്ചേർത്തിട്ടുണ്ട്.
ഇപ്പോൾ വില്പനയിലുള്ള സിആർ-വി മോഡലിലെ മികച്ച ഫീച്ചറുകളായ പനോരമിക് സൺറൂഫ്, ഡ്യുവൽ-സോൺ ക്ലൈമറ്റ് കൺട്രോൾ, ആൻഡ്രോയിഡ് ഓട്ടോ / ആപ്പിൾ കാർപ്ലേയുള്ള ഏഴ് ഇഞ്ച് ടച്ച്സ്ക്രീൻ, ഡിജിറ്റൽ ഇൻസ്ട്രുമെന്റ് ക്ലസ്റ്റർ, ലെയ്ൻ-വാച്ച് ക്യാമറ, ഓട്ടോ ഹെഡ്ലാമ്പുകളും വൈപ്പറുകളും, ആംബിയന്റ് ലൈറ്റിംങ് തുടങ്ങിയവ സ്പെഷ്യൽ എഡിഷൻ മോഡലിലും മാറ്റമില്ലാതെ തുടരുന്നുണ്ട്. ഫ്രണ്ട്, സൈഡ്, കർട്ടൻ എയർബാഗുകൾ, ഹിൽ-സ്റ്റാർട്ട് അസിസ്റ്റ്, ഡ്രൈവർ അറ്റൻഷൻ മോണിറ്റർ, ഇലക്ട്രോണിക് പാർക്കിംഗ് ബ്രേക്ക് എന്നീ സുരക്ഷാ ഫീച്ചറുകളും ഇതിൽ പെടുന്നു.
മുഖം മിനുക്കി 2020 ഹോണ്ട ഡബ്ള്യുആർ-വി വിപണിയിൽ
2.0 ലിറ്റർ നാച്ചുറലി ആസ്പിറേറ്റഡ് നാല് സിലിണ്ടർ പെട്രോൾ എൻജിനിൽ മാത്രമേ ഹോണ്ട സിആർ-വി വാങ്ങാൻ സാധിക്കൂ. 6,500 ആർപിഎമ്മിൽ 154 പിഎസും പവറും 4,300 ആർപിഎമ്മിൽ 189 എൻഎം ടോർക്കും ഉത്പാദിപ്പിക്കുന്ന എൻജിൻ സിവിടി ഓട്ടോമാറ്റിക് ട്രാൻസ്മിഷനുമായാണ് ബന്ധിപ്പിച്ചിരിക്കുന്നത്. ലിറ്ററിന് 14.4 കിലോമീറ്റർ ആണ് ഹോണ്ട അവകാശപ്പെടുന്ന ഇന്ധനക്ഷമത.