Hyundai | അടിമുടി മാറി, അഴകും സുരക്ഷയും കൂട്ടി പുതിയ ഹ്യുണ്ടായ് ക്രെറ്റ വരുന്നു

Hyundai | ഹ്യുണ്ടായ് ക്രെറ്റയുടെ ഫേസ്ലിഫ്റ്റ് പതിപ്പ് വരുന്നു. ADAS ഉൾപ്പെടെ പുതിയ നിരവധി ഫീച്ചറുകളുമായിട്ടായിരിക്കും എസ്‌യുവി വരുന്നത്. ഡിസൈനിലും ഹ്യുണ്ടായ് മാറ്റങ്ങൾ വരുത്തും.

Authored byദീനദയാൽ എം | Samayam Malayalam 29 Mar 2023, 1:42 pm

ഇന്ത്യയിലെ എസ്‌യുവി വിഭാഗത്തിൽ അതിശയങ്ങൾ സൃഷ്ടിച്ച വാഹനമാണ് ഹ്യുണ്ടായ് ക്രെറ്റ (Hyundai Creta). 2015ൽ ക്രെറ്റ ലോഞ്ച് ചെയ്തതോടെ രാജ്യത്തെ ഉപഭോക്താക്കൾക്കിടയിൽ എസ്‌യുവിയോടുള്ള താല്പര്യം തന്നെ വർധിച്ചു. വളരെ വേഗത്തിൽ ജനപ്രിതി നേടുകയും നിരത്തുകൾ കീഴടക്കുകയു ചെയ്ത ക്രെറ്റയ്ക്ക് പിന്നീടൊരു ഫേസ്ലിഫ്റ്റ് ലഭിച്ചിരുന്നു. ഇതിലൂടെ കൂടുതൽ പ്രീമിയം ഡിസൈനും വാഹനത്തിന് നേടാനായി. ഇപ്പോഴിതാ പുതിയൊരു ഫേസ്ലിഫ്റ്റിന് ഒരുങ്ങുകയാണ് ക്രെറ്റ. ഇതിൽ ഏറ്റവും ശ്രദ്ധേയം പുതിയ ADAS ഫീച്ചറുകളാണ്.

hyundai creta facelift will be launched soon — Hyundai | അടിമുടി മാറി, അഴകും സുരക്ഷയും കൂട്ടി പുതിയ ഹ്യുണ്ടായ് ക്രെറ്റ വരുന്നു

ADAS ഫീച്ചർ

ഹ്യുണ്ടായ് ക്രെറ്റ ഫെയ്‌സ്‌ലിഫ്റ്റിൽ വരാൻ പോകുന്ന ഏറ്റവും ശ്രദ്ധേമായ മാറ്റം ADAS ആണ്. അടുത്തിടെയാണ് ഹ്യുണ്ടായ് വെർണ ADAS ഫീച്ചറുമായി പുറത്തിറങ്ങിയത്. ഈ സെഡാനിൽ ഉപയോഗിച്ചിരിക്കുന്ന പുതിയ പല ഫീച്ചറുകളും ഹ്യുണ്ടായ് ക്രെറ്റയുടെ പുതിയ പതിപ്പിൽ ഉണ്ടാകുമെന്ന് പ്രതീക്ഷിക്കുന്നു. ബ്രാന്റിന് ക്രെറ്റ എന്ന വാഹനമാണ് ഇന്ത്യൻ വിപണിയിൽ ഏറ്റവും പ്രധാനപ്പെട്ടത് എന്ന കാര്യം കണക്കിലെടുക്കുമ്പോൾ ADAS ഫീച്ചർ തീർച്ചയായും പുതിയ പതിപ്പിൽ നൽകുമെന്ന് ഉറപ്പിക്കാം.

വിപണിയിലെ മത്സരം

ഇന്ത്യയിൽ ഹ്യുണ്ടായ് ക്രെറ്റയോട് മത്സരിക്കുന്ന വാഹനങ്ങളിൽ പലതിലും ഇതിനകം തന്നെ ADAS ഫീച്ചറുണ്ട്. എംജി ആസ്റ്റർ ഇപ്പോൾ ADAS ഫീച്ചറുമായി വരുന്നു. കിയ സെൽറ്റോസിലും ഈ സംവിധാനം വൈകാതെ ലഭിക്കുമെന്നാണ് റിപ്പോർട്ടുകൾ നൽകുന്ന സൂചനകൾ. അതുകൊണ്ട് തന്നെ വിപണിയിൽ പിടിച്ചുനിൽക്കാൻ ഹ്യുണ്ടായ് ക്രെറ്റയ്ക്ക് ADAS അത്യാവശ്യമാണ്. പുതിയ മോഡലിൽ ഈ ഫീച്ചർ ഹ്യുണ്ടായ് നൽകുമെന്ന് കരുതാം.

മറ്റ് ഫീച്ചറുകൾ

തെക്കുകിഴക്കൻ ഏഷ്യൻ രാജ്യങ്ങളിൽ അവതരിപ്പിച്ച പുതിയ ഹ്യുണ്ടായ് ക്രെറ്റയിൽ നിന്ന് വ്യത്യസ്തമായിരിക്കും ഇന്ത്യയിൽ വരുന്ന ഫെയ്‌സ്‌ലിഫ്റ്റ് മോഡൽ. അതുകൊണ്ട് തന്നെ കൂടുതൽ സവിശേഷതകൾ വ്യക്തമായിട്ടില്ല. ട്യൂസൺ പോലെയുള്ള ഡിസൈൻ ആയിരിക്കില്ല ഈ വാഹനത്തിൽ ഉണ്ടായിരിക്കുക. നിലവിലെ ഡിസൈനിനെ തന്നെ ചെറിയ മാറ്റങ്ങളോടെ കൂടുതൽ മികച്ചതാക്കി മാറ്റും. ഹ്യുണ്ടായ് ഈ വാഹനത്തിന്റെ ഹെഡ്‌ലാമ്പുകളും ബമ്പറുകളും അൽപ്പം മാറ്റിയേക്കും.

ഇന്റീരിയർ സവിശേഷതകൾ

ഹ്യുണ്ടായ് ക്രെറ്റയുടെ പുതിയ പതിപ്പിന്റെ സൈഡ് പ്രൊഫൈലിൽ മാറ്റങ്ങളൊന്നും വരുത്തില്ലെന്നാണ് സൂചനകൾ. നിലവിലെ മോഡലിൽ കാണുന്ന സൈഡ് പ്രൊഫൈൽ കമ്പനി അതേപടി നിലനിർത്തിയേക്കും. വാഹനത്തിന്റെ പിൻഭാഗത്ത് കണക്റ്റഡ് ടെയ്‌ലാമ്പ് ഡിസൈനായിരിക്കും നൽകുന്നത്. വാഹനത്തിന്റെ ഇന്റീരിയറിൽ പുതിയ അപ്ഹോൾസ്റ്ററിയും 360-ഡിഗ്രി ക്യാമറയും പുതിയ ഡിജിറ്റൽ ഇൻസ്ട്രുമെന്റ് ക്ലസ്റ്ററും പോലെയുള്ള ഫീച്ചറുകൾ പ്രതീക്ഷിക്കാം.

ലോഞ്ച്

ഹ്യുണ്ടായ് ക്രെറ്റ ഫെയ്‌സ്‌ലിഫ്റ്റ് 2023ൽ പുറത്തിറക്കുമെന്നാണ് പ്രതീക്ഷിച്ചിരുന്നത്. എന്നാൽ കമ്പനി ലോഞ്ച് നീട്ടിയിരിക്കുകയാണ്. റിപ്പോർട്ടുകൾ പ്രകാരം, ഇന്ത്യയ്ക്കായി വ്യത്യസ്തമായ രീതിയിൽ ഹ്യുണ്ടായ് ക്രെറ്റയെ ഡിസൈൻ ചെയ്യുകയാണ് കമ്പനി. ഇതുവരെ ഡെലിവറി ചെയ്യാനാകാത്ത ബുക്കിങ്ങും പ്രൊഡക്ട് ഉൽ‌പാദനത്തിലെ പരിമിതികളും കാരണം 2024ൽ മാത്രമേ ക്രെറ്റ ഫെയ്‌സ്‌ലിഫ്റ്റ് അവതരിപ്പിക്കാൻ സാധ്യതയുള്ളു. വൈകാതെ തന്നെ വാഹനത്തിന്റെ കൂടുതൽ വിവരങ്ങൾ പുറത്ത് വരും.