ഹ്യുണ്ടേയുടെ 'ഇമ്മിണി ബല്യ' എസ്യുവി, ആൽക്കസാർ എത്തി; വില 16.30 ലക്ഷം മുതൽ
ടാറ്റ സഫാരി, എംജി ഹെക്ടർ പ്ലസ്, മഹീന്ദ്ര എക്സ്യുവി500 എന്നീ എസ്യുവികളോട് മത്സരിക്കാനാണ് മൂന്ന് നിരകളിലായി 6,7 സീറ്റർ പതിപ്പുകളിൽ ഹ്യുണ്ടേയ് ആൽക്കസാറിനെ അവതരിപ്പിച്ചിരിക്കുന്നത്.
ടാറ്റ സഫാരി, എംജി ഹെക്ടർ പ്ലസ്, മഹീന്ദ്ര എക്സ്യുവി500 എന്നീ എസ്യുവികളോട് മത്സരിക്കുന്ന ആൽക്കസാർ യഥാർത്ഥത്തിൽ കഴിഞ്ഞ വർഷം തുടക്കത്തിൽ എത്തിയ പുത്തൻ തലമുറ ക്രെറ്റ എസ്യുവിയുടെ ചേട്ടനാണ്. മൂന്ന് നിരകളിലായി 6,7 സീറ്റർ പതിപ്പുകളിൽ വില്പനക്കെത്തിയിരിക്കുന്ന ആൽക്കസാറിൻ്റെ വിശേഷങ്ങൾ അറിയാം.
16.30 ലക്ഷം മുതൽ 19.99 ലക്ഷം രൂപ വരെ
പ്രസ്റ്റീജ്, പ്രസ്റ്റീജ് (O), പ്ലാറ്റിനം, പ്ലാറ്റിനം (O), സിഗ്നേച്ചർ, സിഗ്നേച്ചർ (O) എന്നിങ്ങനെ 6 വേരിയന്റുകളിൽ 6 എക്സ്റ്റീരിയർ നിറങ്ങളിലാണ് (ടൈഗാ ബ്രൗൺ, ടൈഫൂൺ സിൽവർ, പോളാർ വൈറ്റ്, ടൈറ്റൻ ഗ്രേ, ഫാന്റം ബ്ലാക്ക്, സ്റ്റാർറി നൈറ്റ്) ഹ്യുണ്ടേയ് ആൽക്കസാർ വില്പനക്കെത്തിയിരിക്കുന്നത്. ഡ്യുവൽ ടോൺ ഓപ്ഷനിലും ലഭ്യമായ ആൽക്കസാറിൻ്റെ എക്സ്-ഷോറൂം വിവരങ്ങൾ ചുവടെ
പെട്രോൾ
- പ്രസ്റ്റീജ് 7 സീറ്റർ മാന്വൽ: 16.30 ലക്ഷം രൂപ
- പ്രസ്റ്റീജ് 6 സീറ്റർ മാന്വൽ: 16.45 ലക്ഷം രൂപ
- പ്രസ്റ്റീജ് 7 സീറ്റർ ഓട്ടോമാറ്റിക്: 17.93 ലക്ഷം രൂപ
- പ്ലാറ്റിനം 7 സീറ്റർ മാന്വൽ: 18.22 ലക്ഷം രൂപ
- പ്ലാറ്റിനം 6 സീറ്റർ ഓട്ടോമാറ്റിക്: 19.56 ലക്ഷം രൂപ
- സിഗ്നേച്ചർ 6 സീറ്റർ മാന്വൽ: 18.71 ലക്ഷം രൂപ
- സിഗ്നേച്ചർ 6 സീറ്റർ ഓട്ടോമാറ്റിക്: 19.85 ലക്ഷം രൂപ
ഡീസൽ
- പ്രസ്റ്റീജ് 7 സീറ്റർ മാന്വൽ: 16.53 ലക്ഷം രൂപ
- പ്രസ്റ്റീജ് 7 സീറ്റർ ഓട്ടോമാറ്റിക്: 18.01 ലക്ഷം രൂപ
- പ്രസ്റ്റീജ് 6 സീറ്റർ മാന്വൽ: 16.68 ലക്ഷം രൂപ
- പ്ലാറ്റിനം 7 സീറ്റർ മാന്വൽ: 18.45 ലക്ഷം രൂപ
- പ്ലാറ്റിനം 6 സീറ്റർ ഓട്ടോമാറ്റിക്: 19.79 ലക്ഷം രൂപ
- സിഗ്നേച്ചർ 6 സീറ്റർ മാന്വൽ: 18.94 ലക്ഷം രൂപ
- സിഗ്നേച്ചർ 6 സീറ്റർ ഓട്ടോമാറ്റിക്: 19.99 ലക്ഷം രൂപ
പ്രീയം നേടി ലൈഫ്സ്റ്റൈൽ പിക്ക്അപ്പുകൾ; 3 വമ്പന്മാർ ഇന്ത്യയിലേക്ക്
ഒറ്റ നോട്ടത്തിൽ ക്രെറ്റയുടെ ചേട്ടൻ
പുത്തൻ ക്രെറ്റ എസ്യുവിയെ അടിസ്ഥാനമാക്കി തയ്യാറാക്കിയ ചേട്ടൻ എസ്യുവിയാണ് ഹ്യുണ്ടേയ് ആൽക്കസാർ. അതുകൊണ്ട് തന്നെ ആൽക്കസാറിൻ്റെ പല ബോഡി പാനലുകളും, ഫെൻഡറുകളും, മുൻ നിര ഡോറുകൾ എന്നിവ ക്രെറ്റയ്ക്ക് സമാനമാണ്. സ്റ്റഡ്ഡ് ചെയ്ത കൂടുതൽ പ്രീമിയം ലൂക്കിലുള്ള ഗ്രിൽ ആണ് ആൽക്കസാറിനെ ക്രെറ്റയിൽ നിന്നും മുൻകാഴ്ചയിൽ വ്യത്യസ്തമാക്കുന്ന ഘടകം. പുത്തൻ ടെയിൽ ലൈറ്റുകൾ, പൂർണമായും റീഡിസൈൻ ചെയ്ത ടെയിൽ ഗേറ്റ് എന്നിവയാണ് ആൽക്കസാറിൻ്റെ മറ്റുള്ള ആകർഷണങ്ങൾ. മൂന്ന് നിര സീറ്റുകൾ ഉള്ളതുകൊണ്ട് തന്നെ വീൽബേസ് കൂടുതലാണ് അൽക്കസാറിന്, 2,760 എംഎം (ക്രെറ്റയേക്കാൾ 150 എംഎം കൂടുതൽ). ക്രെറ്റയേക്കാൾ 200 എംഎം നീളവും 40 എംഎം ഉയരവും കൂടുതലാണ് ആൽക്കസാറിന്. വീതിയിൽ മാറ്റമില്ല.
ഉടൻ ഇന്ത്യയിൽ വില്പനക്കെത്തുന്ന 7 ഇലക്ട്രിക്ക് കാറുകൾ
ഫീച്ചർ സമൃദ്ധം ഇന്റീരിയർ
ടാൻ, ബ്ലാക്ക് നിറങ്ങളുടെ ഡ്യുവൽ ടോൺ അപ്ഹോൾസ്റ്ററിയാണ് ഹ്യുണ്ടേയ് ആൽക്കസാറിന്. ആൻഡ്രോയിഡ് ഓട്ടോ, ആപ്പിൾ കാർപ്ലേയ് കണക്ടിവിറ്റിയുള്ള 10.25-ഇഞ്ച് ടച്ച്സ്ക്രീൻ ഇൻഫോടെയ്ൻമെന്റ് സിസ്റ്റം, 360-ഡിഗ്രി കാമറ, പനോരാമിക് സൺറൂഫ്, വയർലെസ്സ് ഫോൺ ചാർജിങ്, ഓട്ടോമാറ്റിക് ക്ലൈമറ്റ് കണ്ട്രോൾ എന്നിവയാണ് ഹ്യുണ്ടേയ് ആൽക്കസാറിലെ ശ്രദ്ധേയമായ ഫീച്ചറുകൾ. 8 സ്പീക്കറുള്ള ബോസ് പ്രീമിയം സൗണ്ട് സിസ്റ്റം, ട്രാക്ഷൻ കണ്ട്രോൾ മോഡുകൾ (സ്നോ, സാൻഡ്, സ്പോർട്ട്), 64 നിറങ്ങളുള്ള ആമ്പിയന്റ് ലൈറ്റിംഗ്, ഹ്യുണ്ടേയ് ബ്ലൂ ലിങ്ക് കണക്ടഡ് കാർ സിസ്റ്റം എന്നിവ ഉയർന്ന വേരിയന്റുകളുടെ ഭാഗമാണ്.
കഴിഞ്ഞ 5 വർഷത്തിനിടെ ഇന്ത്യയിൽ ദയനീയമായി പരാജയപ്പെട്ട കാറുകൾ
എൻജിൻ, ഗിയർബോക്സ്, മൈലേജ്
എലാൻട്ര, റ്റ്യൂസോൺ മോഡലുകളെ ചലിപ്പിക്കുന്ന 2.0-ലിറ്റർ, 4-സിലിണ്ടർ എൻജിൻ ആണ് അൽകാസറിന്റെ ഒരു എൻജിൻ ഓപ്ഷൻ. 159 എച്പി പവറും 192 എൻഎം ടോർക്കും ഈ എൻജിൻ നിർമിക്കും. 1.5-ലിറ്റർ, 4-സിലിണ്ടർ ടർബോ ഡീസൽ ആണ് മറ്റൊരു എൻജിൻ. 115 എച്പി പവറും 250 എൻഎം ടോർക്കുമാണ് ഈ എൻജിൻ നിർമ്മിക്കുന്നത്. 6-സ്പീഡ് മാന്വൽ 6-സ്പീഡ് ഓട്ടോമാറ്റിക് ഗിയർബോക്സ് ഓപ്ഷനുകളിൽ ഇരു എൻജിനുകളും ലഭിക്കും. കംഫർട്ട്, ഇക്കോ, സ്പോർട്ട് എന്നീ റൈഡിങ് മോഡുകളും സാൻഡ്, സ്നോ, മഡ് എന്നീ ട്രാക്ഷൻ കണ്ട്രോൾ മോഡുകളും ഹ്യുണ്ടേയ് അൽകാസറിലുണ്ട്.
പെട്രോൾ മാനുവൽ വേരിയന്റുകൾക്ക് ലിറ്ററിന് 14.5 കിലോമീറ്ററും ഓട്ടോമാറ്റിക് പതിപ്പിന് ലിറ്ററിന് 14.2 കിലോമീറ്ററുമാണ് ഹ്യുണ്ടേയ് അവകാശപ്പെടുന്ന മൈലേജ്. ഡീസൽ മാനുവൽ ഗിയർബോക്സ് പതിപ്പുകൾക്ക് ലിറ്ററിന് 20.4 കിലോമീറ്ററും, ഓട്ടോമാറ്റിക് പതിപ്പിന് 18.1 കിലോമീറ്ററും ഇന്ധനക്ഷമതയാണ് ഹ്യുണ്ടേയ് ഉറപ്പ്നൽകുന്നത്.