ഇന്ത്യയിലെ കിയ സെൽറ്റോസ്, ചൈനയിൽ KX3; കോപ്പിയടിച്ചതല്ല

ദക്ഷിണ കൊറിയൻ വാഹന നിർമാതാക്കളായ ഹ്യുണ്ടായിയുടെ സഹോദര ബ്രാൻഡ് കിയ മോട്ടോർസ് തങ്ങളുടെ ഇന്ത്യയിലെ ആദ്യ വാഹനം സെൽറ്റോസ് എസ്‌യുവി കഴിഞ്ഞ മാസം (ഓഗസ്റ്റ്) 22-നാണു പുറത്തിറക്കിയത്. ഇന്ത്യൻ വിപണിയിൽ പുതിയൊരു വാഹന ബ്രാൻഡാണെങ്കിലും സെൽറ്റോസ് എന്ന ആദ്യ വാഹനം ഉപഭോക്താക്കൾക്ക് 'ക്ഷ' പിടിച്ച മട്ടാണ്. വില്പനയിൽ വർഷങ്ങളോളം വിപണിയിലുള്ള പല വാഹനനിർമാതാക്കളുടെയും മോഡലുകളെ പിന്തള്ളി മുന്നേറുകയാണ് കിയ സെൽറ്റോസ്. ഇതിനിടയിൽ, ഈയടുത്തു സെൽറ്റോസിന്റെ ചൈനീസ് വേർഷൻ പുറകെ ലോകം കണ്ടു.

ആകാശത്തിനു കീഴിലെ എന്ത് വസ്തുവിന്റെയും പകർപ്പ് ചൈനയിൽ കിട്ടുമെന്നാണല്ലോ വെപ്പ്. പകർപ്പവകാശ നിയമങ്ങൾക്കൊക്കെ കടലാസിന്റെ വില പോലെ ഇല്ലാത്ത സ്ഥലത്തു ഏതോ ഒരു വിരുതൻ സെൽറ്റോസിനെ കോപ്പിയടിച്ചതൊന്നുമല്ല. ഡോങ്‌ഫെങ് യുഎഡ കിയ (Dongfeng Yueda Kia) എന്ന ചൈനയിലെ കിയ മോട്ടോർസ് സബ്സിഡിയറിയാണ് സെപ്റ്റംബർ 5-ന് ആരംഭിച്ച ചെങ്ടൂ ഓട്ടോ ഷോയിൽ സെൽറ്റോസിൻ്റെ ചൈനീസ് പതിപ്പിനെ അവതരിപ്പിച്ചത്. പേര് പക്ഷെ സെൽറ്റോസെന്നല്ല, KX3.

Also read: വരവറിയിച്ച്‌ കിയാ മോട്ടോർസ്, സെൽറ്റോസ് എസ്‌യുവിക്ക് കിടിലൻ വില്പന

ചെങ്ടൂ ഓട്ടോ ഷോയിലെ അവതരണത്തോടൊപ്പമാണ് മുൻപ് SP2c എന്ന കോഡ് നാമത്തിലറിയപ്പെട്ടിരുന്ന എസ്‌യുവിക്ക് KX3 എന്ന പേര് കിട്ടിയത്. ഒറ്റനോട്ടത്തിൽ KX3 ഇന്ത്യയിലെ സെൽറ്റോസിൻ്റെ തനി പകർപ്പെന്നു തോന്നാം. യഥാർത്ഥത്തിൽ, ചൈനീസ് വിപണിക്കനുസരിച്ചു ചില മാറ്റങ്ങൾ വരുത്തിയാണ് KX3 തയ്യാറാക്കിയിരിക്കുന്നത്.

രണ്ടാം നിരയിൽ ഇന്ത്യൻ ഉപഭോക്താക്കളെക്കാൾ ലെഗ് സ്പേസ് ആവശ്യപ്പെടുന്നവരാണ് ചൈനയിലെ ഉപഭോക്താക്കൾ. അതുകൊണ്ട് KX3-ക്കു നീളം കൂട്ടിയാണ് അധികം ലെഗ് സ്പേസ് കിയ കണ്ടെത്തിയത്. വീൽബേസിലും, ഉയരത്തിലും KX3 സെൽറ്റോസിനേക്കാൾ മുമ്പനാണ്. സെൽറ്റോസിൻ്റെ 2,630 എംഎം വീൽബേസിനേക്കാൾ 20 എംഎംവും, 1,675 എംഎം ഉയരത്തേക്കാൾ 25 എംഎം ഉയരവും കൂടുതലാണ് KX3-ക്ക്. ഇത് കൂടുതൽ ഇന്റീരിയർ സ്പേസ് KX3-ക്ക് നൽകുന്നു. വീതിയുടെ കാര്യത്തിൽ സെൽറ്റോസും KX3-യും തുല്യരാണ്.

കുറച്ചു ഫീച്ചറുകളും KX3-യിൽ അധികമായുണ്ട്. സെൽറ്റോസിലുള്ള ഫീച്ചറുകൾക്കു പുറമെ വലിപ്പം കൂടിയ പാനരോമിക് സൺറൂഫും, അഡാപ്റ്റീവ് ക്രൂസ് കണ്ട്രോളും KX3-യിൽ കിയ ചേർത്തിട്ടുണ്ട്. ബാക്കിയെല്ലാ കാര്യങ്ങളിലും KX3-യും സെൽറ്റോസും തുല്യരാണ്.

115 എച്ച്പി പവാർ ഉല്പാദിപ്പിക്കുന്ന 1.5-ലീറ്റർ പെട്രോൾ എൻജിൻ, സിവിടി ഗിയർബോക്സിനൊപ്പമാണ് KX3-യിൽ. ഈ എൻജിനോടൊപ്പം 1.5-ലീറ്റർ സിആർഡിഐ ഡീസൽ, 1.4-ലീറ്റർ സ്മാർട്ട്സ്ട്രീം ടർബോ-പെട്രോൾ എന്നീ എൻജിൻ ഓപ്ഷനുകളും 6-സ്പീഡ് മാനുവൽ, 6-സ്പീഡ് ടോർക്ക് കൺവെർട്ടർ ഓട്ടോമാറ്റിക്ക്, 7-സ്പീഡ് ഡിസിടി, ഐവിടി എന്നിങ്ങനെ 4 ഗിയർബോക്‌സ് ഓപ്ഷനുകളുമാണ് സെൽറ്റോസിൽ.

ഇന്ത്യക്കു ശേഷം സെൽറ്റോസ് പുറത്തിങ്ങുന്ന രണ്ടാമത്തെ രാജ്യമല്ല ചൈന. കിയ തങ്ങളുടെ മാതൃരാജ്യമായ ദക്ഷിണ കൊറിയയിലും സെൽറ്റോസിനെ അതെ പേരിൽ ലോഞ്ച് ചെയ്തിട്ടുണ്ട്. ലോഞ്ച് ചെയ്തു 10 ദിനങ്ങൾക്കുള്ളിൽ സെൽറ്റോസിൻ്റെ 6109 യൂണിറ്റുകൾ കൊറിയയിൽ വിറ്റഴിച്ചപ്പോൾ, ഇന്ത്യയിൽ 6200 ഉപഭോക്താക്കൾ സെൽറ്റോസ് വാങ്ങി.

Also read: സെൽറ്റോസിൻ്റെ വില്പനയിൽ കൊറിയയെ കടത്തിവെട്ടി ഇന്ത്യ!

കഴിഞ്ഞ മാസം (ഓഗസ്റ്റ്) 22-നാണു കിയ മോട്ടോർസ് സെൽറ്റോസിനെ ഇന്ത്യൻ വിപണിയിൽ അവതരിപ്പിച്ചത്. Rs 9.69 ലക്ഷത്തിൽ തുടങ്ങി Rs 15.99 ലക്ഷം വരെയാണ് സെൽറ്റോസിൻ്റെ എക്‌സ്-ഷോറൂം വില. മോഹിപ്പിക്കുന്ന വിലയിൽ സെൽറ്റോസിനെ അവതരിപ്പിച്ചത് എസ്‌യുവിയുടെ സ്വീകാര്യത വർധിപ്പിച്ചിട്ടുണ്ട്. 35,000-ൽ അധികം ബുക്കിംഗ് നേടി ഇപ്പോൾ തന്നെ സെൽറ്റോസിനുണ്ട്. ബുക്ക് ചെയ്താൽ ഇപ്പോൾ തന്നെ 3 മാസം വരെ കാത്തിരിക്കണം ഡിമാൻഡ് കൂടുതലുള്ള സെൽറ്റോസ് വേരിയൻ്റുകൾ സ്വന്തമാക്കാൻ.

HTE , HTK, HTK+, HTX, HTX+, GTK, GTX, GTX+ എന്നിവയാണ് ഗ്രേഡുകൾ. എൻജിൻ, ഗിയർബോക്‌സ്, ഗ്രേഡുകൾ എന്നിവ പലതരത്തിൽ ചേരുംപടി ചേർത്താൽ ഏകദേശം 16 വേരിയൻ്റുകളിൽ സെൽറ്റോസ് ലഭ്യമാണ്. എല്ലാ എൻജിനുകളും അടുത്ത വർഷം ഏപ്രിലിൽ നിലവിൽ വരുന്ന ബിഎസ്6 മലിനീകരണ നിയന്ത്രണ മാനദണ്ഡങ്ങൾ പാലിക്കുന്നവയാണ്‌. ടെക്ക് ലൈൻ, ജിടി ലൈൻ എന്നിങ്ങനെ രണ്ട് ട്രിമ്മുകളിലാണ്‌ സെൽറ്റോസ് എത്തിയിരിക്കുന്നത്. ടെക്ക് ലൈൻ കുടുംബങ്ങളെ മുന്നിൽ കണ്ടുള്ളതാണെങ്കിൽ ജിടി ലൈൻ ഡ്രൈവിങ്ങ് ഒരുപാടു ഇഷ്ടപ്പെടുന്നവരെ ലക്‌ഷ്യം വച്ചുള്ളതാണ്. 6 എയർബാഗുകൾ, ഇലക്ട്രോണിക്ക് സ്റ്റെബിലിറ്റി കണ്ട്രോൾ, വെഹിക്കിൾ സ്റ്റെബിലിറ്റി മാനേജ്മെൻ്റ് എന്നിങ്ങനെയാണ് സുരക്ഷാ സന്നാഹങ്ങൾ. 8 സിംഗിൾടോൺ, 5 ഡ്യുവൽടോൺ അടക്കം ആകെ 13 നിറങ്ങളിൽ സെൽറ്റോസ് ലഭ്യമാണ്‌.