Mahindra XUV300 W6 Automatic: എക്സ്‌യുവി 300ന്‌ ഇതാ ഒരു പുതുപുത്തൻ ഡീസൽ ഓട്ടോമാറ്റിക്ക് വേരിയന്റ് കൂടി!

മഹീന്ദ്രയുടെ എക്കാലത്തെയും വലിയ ഹിറ്റുകളിലൊന്നാണ്‌ എക്സ്‌യുവി 500 എന്ന എസ്‌യുവി. ഈ വാഹനത്തിന്റെ വർദ്ധിച്ച ജനപ്രീതി ‘എക്സ്‌യുവി’ എന്ന പേരിനെ ഒരു ബ്രാൻഡായി വളർത്തിക്കൊണ്ടു വരുവാൻ മഹീന്ദ്രയെ പ്രേരിപ്പിച്ചു. അതിന്റെ ഫലമായി ഈയിടെ എക്സ്‌യുവി 300 എന്ന പേരിൽ സാങ്ങ്‌യോങ്ങ് ടിവോലി എന്ന ചെറു എസ്‌യുവിയെയും ഇവർ ഇന്ത്യയിൽ എത്തിച്ചിരുന്നു.

ആകർഷകമായ രൂപവും സാങ്കേതികപരമായി ഏറെ പുതുമകളും ഒക്കെയായി എത്തിയ എക്സ്‌യുവി300 വളരെ വേഗമാണ്‌ ജനപ്രിയമായത്. മഹീന്ദ്രയുടെ ഓട്ടോഷിഫ്റ്റ് എഎംടി ഓട്ടോമാറ്റിക്ക് ഗിയർബോക്സിന്റെ സാന്നിധ്യമായിരുന്നു മറ്റൊരു പ്രധാന ആകർഷണം. എന്നാൽ ഇത്രനാളും ഉയർന്ന വേരിയന്റുകളിലാണ്‌ ഈ ഗിയർബോക്സ് ലഭ്യമായിരുന്നത്. എന്നാൽ ഇപ്പോൽ താരതമ്യേന വിലകുറഞ്ഞ ഡബ്ല്യു 6 വേരിയന്റിനെയും ഓട്ടോമാറ്റിക്ക് ആക്കിയിരിക്കുകയാണ്‌ കമ്പനി.

എക്സ്‌യുവി നിരയിൽ പെട്രോൾ, ഡീസൽ ഹൃദയങ്ങളുള്ള വാഹനങ്ങളുണ്ട്. പെട്രോളിൽ അഞ്ചും ഡിസലിൽ എട്ടുമായി ആകെ 13 വേരിയന്റുകളാണുള്ളത്. എന്നാൽ ഡീസലിൽ മാത്രമാണ്‌ ഓട്ടോമാറ്റിക്ക് ഗിയർബോക്സുകൾ ലഭ്യമാവുക. സൗകര്യങ്ങളിലും ആഡംബരങ്ങളിലും താരതമ്യേന ‘ചെറുത്‌’ ആയ ഡബ്ല്യു 6 നും ഇപ്പോൾ എഎംടി ലഭ്യമായിട്ടുണ്ട്. 1.5 ലീറ്റർ ടർബോ ഡീസൽ എൻജിൻ ആണ്‌ ഈ വാഹനത്തിനും ഉള്ളത്. 117 എച്ച് പിയാണ്‌ കരുത്ത്. ഹിൽ സ്റ്റാർട്ട് അസിസ്റ്റ്, ഇലക്ട്രോണിക്ക് സ്റ്റബിലിറ്റി പ്രോഗ്രാം (ഇഎസ്‌പി) എബിഎസ്, ഇരട്ട എയർബാഗുകൾ എന്നിങ്ങനെ അനേകം സുരക്ഷാ സംവിധാനങ്ങളും ഇതിലുണ്ട്.

ഡബ്ള്യു 8, ഡബ്ല്യു 8 ഓപ്ഷൻ എന്നീ മോഡലുകളിലൂടെ പുറത്തിറങ്ങിയ മഹീന്ദ്രയുടെ എഎംടി അനേകം ആരാധകരെയാണ്‌ ചുരുങ്ങിയ സമയം കൊണ്ടു സൃഷ്ടിച്ചത്. ഇറ്റാലിയൻ ബ്രാൻഡായ മറെലിയാണ്‌ മഹീന്ദ്രയ്ക്കു വേണ്ടി ഓട്ടോമാറ്റിക്ക് ബോക്സുകൾ നിർമ്മിക്കുന്നത്. ഗിയറുകൾ മാറുന്നതിലെ തന്റെ വേഗതയ്ക്കു പേരു കേട്ടതാണ്‌ ഈ ഗിയർബോക്സ്. എഎംടികളുടെ പതിവ് ‘മന്ദത’ ഇല്ലാതെയുള്ള ഇതിന്റെ പ്രവർത്തനം ഈ വിഭാഗത്തിലെ തന്നെ ഏറ്റവും മികച്ചതെന്നു പറയാം. ആവശ്യമായ സമയത്ത് അനുയോജ്യമായ ഗിയർ മാറ്റങ്ങളിലൂടെ ഈ ബോക്സ് വാഹനത്തിനു സമ്മാനിക്കുക രസകരമായ ആക്സിലറേഷനും അനായാസമായ ഓവർടേക്കിങ്ങുകളുമാണ്‌. എതിരാളികളിൽ പലരും 5 സ്പീഡ് എഎംടികളുമായി എത്തുമ്പോൾ മഹീന്ദ്രയ്ക്ക് ഉള്ളത് 6 സ്പീഡ് എഎംടിയാണ്‌! ആറാം ഗിയറിന്റെ വരവോടെ വാഹനത്തിന്റെ പ്രകടനത്തിൽ എന്ന പോലെ ഇന്ധനക്ഷമതയിലും കാര്യമായ മെച്ചം ഉണ്ടായിട്ടുണ്ട്. ലീറ്ററിന്‌ 20 കിലോമീറ്ററുകളോളമാണ്‌ ഡീസൽ എക്സ്‌യുവി 300ന്റെ മൈലേജ്.

നിത്യജീവിതത്തിൽ അത്യന്തം മഹത്തരമായ അനേകം സംവിധാനങ്ങളും പ്രത്യേകതകളും ഈ ഗിയർബോക്സിനുണ്ട്. ആക്സിലറേറ്റർ കൊടുക്കാതെ തന്നെ ഡ്രൈവ് മോഡിൽ വാഹനം മന്ദഗതിയിൽ മുന്നോട്ടു നീങ്ങുന്ന ‘ക്രീപ്പ്’ ഫംഗ്ഷനാണ്‌ ഒന്നാമത്തേത്. പുതിയ കാലത്തെ വാഹനങ്ങളിൽ സാധാരണ കണ്ടുവരാറുള്ളതാണ്‌ ഈ സൗകര്യം. നഗരങ്ങളിലെ ‘ബമ്പർ ടു ബമ്പർ’ യാത്രകളിൽ ‘ക്രീപ്പ്’ ഏറെ സഹായകമാണ്‌. അതുപോലെ തന്നെ ‘കിക്ക്-ഡൗൺ ഷിഫ്റ്റുകൾ’ എന്നു കമ്പനി വിളിക്കുന്ന സംവിധാവും പ്രത്യേകം ‘ഡൗൺ ഹിൽ’ മോഡും, ഇന്ധനക്ഷമമായ ഡ്രൈവിംഗ് സാധ്യമാക്കുന്നതിനായി കാര്യക്ഷമമായ ഗിയർമാറ്റം ഉറപ്പാക്കുന്ന ‘ ഗിയർ ഡിസ്പ്ലേയും’ ഒക്കെ എക്സ്‌യുവിലുണ്ട്.

9.99 ലക്ഷത്തോളമാണ്‌ ഡീസൽ എൻജിനും 6 സ്പീഡ് എഎം ടി ഓട്ടോമാറ്റിക്ക് ഗിയർബോക്സുമുള്ള മഹീന്ദ്ര എക്സ്‌യുവി 300യുടെ എക്സ് ഷോറൂം വില. എക്സ്‌യുവി 300ന്റെ ഏറ്റവുമധികം സ്വീകാര്യമായ വേരിയന്റുകളിൽ ഒന്നാണ്‌ ഡബ്ള്യു 6 ഡീസൽ. ഇതിൽ ഇന്നത്തെ ചൂടൻ സാങ്കേതികവിദ്യകളിൽ ഒന്നായ എഎംടി കൂടി എത്തുന്നതോടെ കച്ചവടം പൊടിപൊടിക്കുമെന്നാണ്‌ മഹീന്ദ്രയുടെ കണക്കു കൂട്ടൽ. രാജ്യത്തെ എല്ലാ മഹീന്ദ്ര ഡീലർഷിപ്പുകളിലൂടെയും ഇപ്പോൾ ഓട്ടോമാറ്റിക്ക് ഡീസൽ എക്സ്‌യുവി 300 ബുക്ക് ചെയ്യുവാനാകും.

ALSO READ: മഹീന്ദ്ര വാങ്ങാൻ ഇനി മുഴുവൻ വില കൊടുക്കേണ്ട!