സ്വിഫ്റ്റിന് ലിമിറ്റഡ് എഡിഷൻ കിറ്റുമായി മാരുതി സുസുക്കി; 24,990 രൂപ മാത്രം
സ്വിഫ്റ്റിന്റെ ഏതു വേരിയന്റ് തിരഞ്ഞെടുക്കുന്ന ഉപഭോക്താവിനും 24,990 രൂപ അധികമായി ചിലവഴിച്ചാൽ ലിമിറ്റഡ് എഡിഷൻ കിറ്റിലെ അക്സെസ്സറികൾ കൂട്ടിച്ചേർക്കാം.
Samayam Malayalam 19 Oct 2020, 5:12 pm
ഉത്സവകാലമല്ലേ, ഒരു കാർ വാങ്ങാൻ പദ്ധിതിയുണ്ടോ? മാരുതി സുസുക്കി സ്വിഫ്റ്റ് ആണോ മനസ്സിൽ? സ്വിഫ്റ്റിന്റെ ഒരൽപം സ്പോർട്ടി ലുക്കോടെ വാങ്ങണം എന്നാഗ്രഹമുണ്ടെങ്കിൽ മാരുതി സുസുക്കി ലിമിറ്റഡ് എഡിഷൻ കിറ്റ് അവതരിപ്പിച്ചു. മാരുതിയുടെ ഔദ്യോഗിക അക്സെസ്സറികൾ ചേർന്ന ഒരു ആഫ്റ്റർ മാർക്കറ്റ് കിറ്റാണ് ലിമിറ്റഡ് എഡിഷനായി അവതരിപ്പിച്ചിരിക്കുന്നത്. സ്വിഫ്റ്റിന്റെ ഏതു വേരിയന്റ് തിരഞ്ഞെടുക്കുന്ന ഉപഭോക്താവിനും 24,990 രൂപ അധികമായി ചിലവഴിച്ചാൽ ലിമിറ്റഡ് എഡിഷൻ കിറ്റ് കൂട്ടിച്ചേർക്കാം.
കറുപ്പിൽ പൊതിഞ്ഞ അക്സെസ്സറികളാണ് സ്വിഫ്റ്റ് ലിമിറ്റഡ് എഡിഷൻ കിറ്റിന്റെ ആകർഷണം. കറുപ്പ് നിറത്തിലുള്ള എയ്റോഡൈനാമിക്കായ സ്പോയ്ലർ, സൈഡ് സ്കേർട്ടിന് സമാനമായി നാല് വശത്തും ബോഡി കിറ്റ്, ഡോർ സൈഡ് മോൾഡിങ്, ഡോർ വൈസറുകൾ എന്നിവയാണ് എക്സ്റ്റീരിയറിലെ ആകർഷണങ്ങൾ. മുൻപിലെ ഗ്രില്ലും പൂർണമായി കറുപ്പിൽ പൊതിഞ്ഞിട്ടുണ്ട്. ടെയിൽ ലാമ്പിനും, ഫോഗ് ലാമ്പിനും സ്മോക് എഫക്ടുമുണ്ട്.
കിയ സെൽറ്റോസ് ആനിവേഴ്സറി എഡിഷൻ; 10 കാര്യങ്ങൾ അറിയാം
പൂർണമായും കറുപ്പിൽ പൊതിഞ്ഞ സീറ്റ് ഫാബ്രിക്സ് ആണ് ഇന്റീരിയറിൽ ആകർഷണം. ഒപ്പം ഫ്ലാറ്റ് ബോട്ടം സ്റ്റിയറിങ്ങും കറുപ്പിൽ പൊതിഞ്ഞിട്ടുണ്ട്. മേല്പറഞ്ഞ എല്ലാ അക്സെസ്സറികളും ഔദ്യോഗിക അക്സെസ്സറികളാണെന്നും ഇവ ഘടിപ്പിക്കുമ്പോൾ കാറിന്റെ വാറന്റി നഷ്ടപ്പെടുമോ എന്ന പേടി വേണ്ട എന്നും മാരുതി സുസുക്കി വ്യക്തമാക്കിയിട്ടുണ്ട്.
2018 ഓട്ടോ എക്സ്പോയിലൂടെ ഇന്ത്യയിൽ വില്പന ആരംഭിച്ച മൂന്നാം തലമുറ സ്വിഫ്റ്റ് ഇപ്പോൾ ഒരൊറ്റ പെട്രോൾ എൻജിൻ ഓപ്ഷനിൽ 7 വേരിയന്റുകളിൽ ലഭ്യമാണ്. 82 എച്ച്പി പവറും 113 എൻഎം ടോർക്കും ഉത്പാദിപ്പിക്കുന്ന 1.2 ലിറ്റർ K12B 3-സിലിണ്ടർ പെട്രോൾ എൻജിനാണ് സ്വിഫ്റ്റിൽ. 5 സ്പീഡ് മാന്വൽ, 5 സ്പീഡ് ഓട്ടോമേറ്റഡ് മാന്വൽ (എഎംടി) എന്നിവയാണ് ഗിയർബോക്സ് ഓപ്ഷനുകൾ. 5.23 ലക്ഷം മുതൽ 8.08 ലക്ഷം വരെയാണ് സ്വിഫ്റ്റിന്റെ കേരളത്തിലെ എക്സ്-ഷോറൂം വില.
ഉത്സവകാലം കളറാക്കാൻ ഹോണ്ട അമെയ്സ് സ്പെഷ്യൽ എഡിഷൻ വിപണിയിൽ
അതെ സമയം 40,000 രൂപ വരെ ഡിസ്കൗണ്ടിൽ ഉത്സവകാലം പ്രമാണിച്ച് മാരുതി സുസുക്കി സ്വിഫ്റ്റ് ഇപ്പോൾ വാങ്ങാം. 15,000 രൂപ ക്യാഷ് ഡിസ്കൗണ്ട്, 5,000 രൂപ കോർപ്പറേറ്റ് ബോണസ്, 20,000 രൂപ എക്സ്ചേഞ്ച് ഓഫർ എന്നിങ്ങനെയാണ് സ്വിഫ്റ്റിനായുള്ള ഓഫർ ചില മാരുതി സുസുക്കി ഡീലര്ഷിപ്പുകൾ ഒരുക്കിയിരിക്കുന്നത്.